Read ngakarimojong Aos. 5 Bible Online

Aos. 5 - ngakarimojong bible

Aos. 5

¹Epote nai ŋulu iyookino akiwo erae ŋulu eyakatar ayenut atemar emam ŋuna ikitoroniyaritere, ewoete ikes aneni eyakasi ŋulu apotu kisicana ikes ka aneni eyakasi ŋulu apotu tojamuwasi ŋuna etiyaete ikes.

²Ani iŋolikinete ŋulu nyiyookino ŋulu iyookino, emaranikinete ikes ebulit nooi, eumokinete ikes aŋuna ka aiuno a ŋulu iyookino a ŋina sek pa atamakinito ikes.

³Irworikinosi ikes make erae ŋulu irworosi ŋakiro ŋuna ka akiki kec, ido aŋuna eryebeta ikes ŋakiro ŋitai ka aŋuna eumenioto, etemarete,

⁴“Erae lu ŋituŋa ŋulu paaran aponi iwon tojamuwarae, kituruworoe ŋikiyenya yok, okoe keraakae iwon ŋibaŋaanotin! Atamakinitae iwon atemar arae akiyar kec ŋina ka abaŋao ka emam apolou eryamunete ikes ekaku ka akiyar ana.

⁵Kaanukiro emarakinere ikes lokimar ŋolo a ŋidwe a ŋulu ka Akuj? Kaanukiro ainakinere ikes akibois aneni a ŋiseuna a ŋulu ka Akuj?

⁶Aŋun, iwon keponi tooliyoroe anakiro aŋuna a kire, kebu akiyookino ŋina a ŋulu iyookino nyemin neni yok, kebu abaŋao torubak eyai neni yok.

⁷Aponi iwon kimwonikinetei anakiwuapit ŋakiro ŋuna nyecamito ŋikisila ka kiwuapae ŋuna ka amunyaro, aponi iwon kiwuapae ŋakiro ŋuna emam neni ikirikorete, aponi iwon nyeyenun erot ŋolo ke Ekapolon.

⁸Aliropit aryamun iwon anakituro a ŋina a ebari yok? Anijokis abu neni yok anakituro a ŋina a ebari yok?

⁹“Aŋopiyasi ŋiboro ŋul daadaŋ lopite ŋolo eŋopiyaryata etolim ka lopite ŋolo eŋopiyarya ŋakiro ŋuna isudunitoe,

¹⁰aŋopiyasi lopite ŋolo eŋopiyarya ameeli ŋina enaŋanaŋaari ŋikaguragurae a ŋakipi, nyetakunu neni sek etori, nyeyenu ituŋanan atemar keyai sek ameeli nen.

¹¹Aŋopiyasi lopite ŋolo itoryo ikenyit kidiama. ido mam ituŋanan etemari, kitorit sek ikenyit ne; iwuakiwuakaari ikenyit ekuwuam alokidiama, ido tonaŋ ka agogoŋu a ŋina ipumari iŋes epori, iŋarakinete iŋes ŋabebenuk keŋ ŋuna epetara kiwuakiwuakas, ido ekaku, emam ŋini iŋolikini atemar kitoruni iŋes ama.

¹²Aŋopiyasi lopite ŋolo nyepedorya ituŋanan akiŋolikin erot a ekaleŋeleŋet ipimi ibore, egolokin atipei ekuwuam neni sek etorit ekaleŋeleŋet, ido emam ituŋanan eyenuni erot ŋolo sek etori.

¹³Aŋun iwon daŋ, apaki ŋinapei ikidounere, aponi toŋopiyarae, mam akiyookino aponi kitoodiunae, abu aronis yok ikitoŋopiya iwon.”

¹⁴Erae ŋun anerae ikwaan akigeno a ŋulu eŋerito Akuj ka apuwa ŋina eyai lokuwuam, ikwaan ka ikuno ŋini eyai lokuwuam ŋolo apolon nooi; eŋopiyarete ŋulu eŋerito Akuj lopite ŋolo eŋopiyarya apuru alokuwuam, ikwaan ikes ka epeyonon ŋolo iriyae akoloŋit apei bon torotok.

¹⁵Iboiyete ŋulu iyookino ŋikaru ka ŋikaru, eyai eropit kec neni a Ekapolon; iyoki ikes Ekapolon ŋolo alokidiama nooi.

¹⁶Aŋun, eryamunete ikes ebokot ŋolo ka apolou, eryamunete ikes ebokot aneni ke Ekapolon, anerae iyokiuni Ekapolon ikes a apedor keŋ, eiuni Ekapolon ikes a apedor keŋ.

¹⁷Ituruwori Ekapolon alelakinit keŋ ikes aupal keŋ ŋina eiuni ikes ka einakini ŋisubuna daadaŋ apedor ŋinakisicanet ŋimoe keŋ;

¹⁸ituruwori Ekapolon akiyookino iupal ŋini ipakarit ŋuna aronok aneni keŋ; ituruwori Ekapolon akitiya ŋuna a kire iupal ŋini ipakarit ŋuna aronok aneni keŋ;

¹⁹ituruwori iŋes asegis iupal ŋini eiunit iŋes nyereut ŋulu nyiyookino,

²⁰eŋoi iŋes enyunyura nooi tolemu ekileŋ, imorikinosi iŋes ka ŋisubuna kitijioto ŋibaŋaanotin ŋulu itepegete iŋes.

²¹Imilyaunete ŋasinina alokidiama iyooro neni egumaritae, eporonori Ekapolon alodou ke epei tari ŋoloce neni egumaritae ejok,

²²edounete ŋakako ŋuna aryenyaanak esibit ŋuna egumaritae ka agogoŋu; eleleunete neni a ŋimoe keŋ ŋakipi ŋuna ka anam kinyasut ikes eburusiyarete ŋakipi ŋuna aŋaŋolin ikes;

²³ekutuni ekuwuam ŋolo aryenyaan kiwok ikes, epyataryo ikes kiwok ekuwuam ikwa ŋamilo. Eruwor akwap akoŋinait aŋuna a ŋituŋa a ŋulu eŋerito akiwuap ŋuna a Ekapolon, emunaari akitiya ŋuna aronok ekipukae a ŋituŋa.