Read ngakarimojong Aos. 6 Bible Online

Aos. 6 - ngakarimojong bible

Aos. 6

¹Aŋun, okoe ŋirwosi, topupokisi, ido toyenut ŋakiro; okoe ŋikatubok ŋakiro ŋulu a ŋakwapin a daadaŋ, toyenutu ŋakiro.

²Kiirasi iyes ŋulu ipukato ŋituŋa ŋulu alalak; ido kituros aŋuna ipukatotor ŋakwapin ŋuna alalak

³anerae Ekapolon ikiinakini iyes apolokin ŋuluce ka erae neni a Ekapolon a ŋolo etiron ebunitor apedor ŋina ipukatotor iyes; eripiripi Ekapolon ŋuna itiyaete iyes ka iŋitiŋitiuni ŋuna iyeete iyes akitiya.

⁴Irae iyes ŋiketiyak ŋulu ka apukan keŋ, nai nyitiya iyes ŋuna iyookino, kori nyiwuapa iyes ŋikisila, kori nyiwuapa iyes ŋuna ecamit Akuj,

⁵ebuni Akuj neni kus eryenyaana ka itiyae ka atipei, anerae etubokinio erono nooi ŋulu epolokinito ŋuluce.

⁶Epedori Akuj anakisyon keŋ akisyon ŋulu itiditeuna make, nai ŋikapolok, itilimoryo ejok ŋuna kepotu kitiyata.

⁷Nyeriito Ekapolon ŋolo a ŋituŋa a daadaŋ ka ituŋanan idio, kori nyeriito ka ŋikapolok a ŋituŋa, anerae iŋes elope abu tosub ŋulu ipukatae ka ŋikepukak ka etami aŋuna a daadaŋ emam atyakatyakat.

⁸Nai iŋadatae ŋakiro ŋuna iŋisyo ŋulu epolokinito ŋuluce.

⁹Neni kus nai okoe ŋikapolok a ŋakwapin, ileerete ŋakiro kaŋ aneni kus, ikotere iyes iyenunete ŋakiro ŋuna ka aosou, ido nyitiyata aronis.

¹⁰Ituruworyo ŋituŋa ŋulu asegak ŋulu esegak aŋuna aponiata kitiyaata ŋakiro daadaŋ anasegis, ido ikes ŋulu aponi kitatamae ŋakiro ŋun, eryamunete ŋakiro ŋuna eiunete.

¹¹Aŋun, kiwuakisi akiitanit kus nakiro kaŋ; kiitana ŋakiro kaŋ, ido ikitatamikinio iyes.

¹²Ileerete ŋakiro ŋuna ka aosou nooi, emam nyeŋopiyanarete jik, etenito ŋituŋa ŋulu eminasi aosou ayenun ŋakiro ŋuna ka aosou, eryamunete aosou ŋituŋa ŋulu iwarito aosou.

¹³Epatana aosou akiteyenikin neni a ŋulu iburit ayenun iŋes.

¹⁴Ituŋanan daadaŋ ŋini isyokakinit akiwarit aryamun aosou, eryamuni emam atyonis, anerae eryamuni ituŋanan ŋin aosou idarit iŋes alopuke.

¹⁵Erae ayenut ŋina ajokan nooi akiwuakin ituŋanan ŋatameta keŋ naosou, ido ituŋanan ŋini erubakini eyai naosou eruwor alotooma apaki ŋina euruwuana ŋini emamukar ŋatyokisyo,

¹⁶anerae iwarit aosou ayakaun neni a ŋulu emaikina iŋes toyai, ido anajokis a ŋina apolon nooi, eryamununete ŋituŋa ŋul aosou anakiro a daadaŋ a ŋuna ecamito ikes akitiya, ebuneene aosou neni kec ŋapakio daadaŋ ŋuna etamyata ikes.

¹⁷Akisyakinet ŋina ka aosou, iŋes akiitanit ŋina a kire aryamun iŋes anakitatamo ka akimukekinit akitatamo iŋes amina aryamun aosou,

¹⁸ido amina aosou iŋes akiwuapit ŋikisila keŋ, akiwuapit ejok ŋikisila ŋulu ka aosou, iŋes erae ayenut atemar nyimunaara

¹⁹ka ayenut atemar nyimunaara, iŋes itaapiyari ituŋanan neni ka Akuj.

²⁰Aŋun, akiitanit aosou iŋes ikirikori aruwor ekapolon.

²¹Aŋun, okoe ŋikapolok a ŋakwapin, ani kejok aneni kus akipuka ka apolokin ŋuluce, kitopoloosi aosou, ikotere iyes iruwor ŋikapolok ŋikaru ka ŋikaru.

²²Akalimokini ayoŋ iyes ibore ŋini erae aosou ka epite ŋolo ayakaunor, emam ŋakiro ŋuna imunono ŋuna ekemunoni ayoŋ iyes, nai alimori ayoŋ akisyakinet ŋina ka aosou ŋinapei anasubunet akwap, eketeyenikini ayoŋ iyes ileere ayenut ŋina ka aosou nyemunoni ayoŋ aneni kus ŋuna a kire;

²³nyayakaun ayoŋ natukot a ŋulu eyakatar akiitanit ŋina ka arakao, anerae nyerukito arakao ka aosou.

²⁴Nalalau a ŋituŋa a ŋulu aosok, iŋes eryamuniata ŋituŋa ŋulu ka akwap aiuno, ido napukan a erwosit a ŋolo aosou iŋes epedoryata ŋituŋa akiboi emam ŋace.

²⁵Aŋun, kimyekisi ŋakiro kaŋ ikitatam iyes, ido eruworosi aŋuna a ekiboiye kus ŋolo ajokan.