Read ngakarimojong Aos. 7 Bible Online

Aos. 7 - ngakarimojong bible

Aos. 7

¹Ayoŋ daŋ arae ituŋanan, ikikwaan ka ŋituŋa ŋuluce daadaŋ, eletonit a ituŋanan a ŋini a ekiŋaren a ŋini etiyaunio a ŋalup; aponi ayoŋ okoyeun anakook a toto kaŋ oruwor ituŋanan,

²alotooma ŋilapyo ŋitomon, apotu ŋaokot toyakaun neni kaŋ, atakanuni ayoŋ anakiryamakin a ekile ka aberu.

³Ani ekedounio ayoŋ, abu esyak akieŋa ekuwuam ŋolo ieŋasi ŋisubuna daadaŋ, abu olomu nakwap ŋina eyakatar ituŋanan ŋiyeneta, abu ayoŋ ekiŋaren jik ekalou, lopite ŋolo eraakatar ŋun ŋuna a kire ŋuna itiyakini ŋinituŋanan apaki ŋina idounere.

⁴Aponi ayoŋ ekedari alopite a ŋolo ajokan anapit ŋilowi ŋulubutur.

⁵Emam erwosit esyakini akiyar keŋ alopite ke ece,

⁶ŋituŋa daadaŋ, eyai erot epei bon ŋolo alomuniata nakwap ka eyai erot epei bon ŋolo elomaryata anakwap.

⁷Aŋuna abunio ayoŋ oyenu atemar arae ituŋanan, abu elip, ido aponi okoinakin ayoŋ ayenut; abu ayoŋ onyara Akuj, ido abu etau ŋolo ka aosou bu neni kaŋ.

⁸Abu ayoŋ etojok aosou nooi akilo apolou ka akipuka, abu emarak ebari erae ibore koŋin kisikwaani ka aosou.

⁹Abu ayoŋ nyesikwaan aosou tari ka ibore idio ŋini epol nooi egyelit keŋ, anerae erae egolid daadaŋ isinyon koŋin aneni ka aosou, imaritae aneni ka aosou esilipa erae ecoto koŋin.

¹⁰Abu ayoŋ ominak aosou akilo ebari ka akibuses, abu oseu aryamun aosou akilo alomar anakiryonut neni ecai; anerae nyedaunun akica ŋina ka aosou.

¹¹Abu ayoŋ oryamu ŋiboro daadaŋ kaapei ka aosou, abu oryamu anaosou ebari ŋolo nyimarun.

¹²Abu ayoŋ olelyan aŋuna ka aosou ka ŋiboro ŋul daadaŋ, anerae aosou eyauni ŋiboro ŋul, nai pa ayeni ayoŋ atemar aosou iŋes erae toto a ŋiboro a ŋul.

¹³Abu ayoŋ esisa ŋakiro amamukar ŋisoswae, ido etatami ŋuluce amamukar ŋikarune; nyemunonit ayoŋ ebari ŋolo ka aosou,

¹⁴anerae mam ituŋanan isunyari ebari ŋolo ka aosou; eruwor ŋituŋa ŋulu eryamunete aosou ŋikonei ŋulu ka Akuj, eruwor ikes ŋulu elimunit Akuj atemar toryamut ŋainakineta anakitatamo ŋuna ka aosou.

¹⁵Elipi ayoŋ okoinak ayoŋ Akuj erwor lopite ŋolo italakarit iŋes, ido oryamu ŋatameta ŋuna iryamara ka ŋakiro ŋuna adau ayoŋ aryamun; anerae Akuj iŋes erae aketenan tari ka aosou, iŋes ieyanakini tari ŋikaosok toesikis ŋuna aronok.

¹⁶Iwon ka ŋakiro yok, ikiya napedor keŋ, ŋulu eyakatar ayenut daŋ ka apiiryanut ŋinakitiyaet ŋiboro, eyakasi napedor keŋ.

¹⁷Akuj iŋes abu okoinak ayoŋ aosou ŋina nyadyakanarya aloboro a ŋulu etakanete, Akuj iŋes abu okoinak ayoŋ aosou ŋinayenunet ŋiboorei ŋulu esubunitere akwap ka epite ŋolo eyarya ŋinibore.

¹⁸Akuj iŋes abu okoinak ayoŋ aosou ŋinayenunet akisyakinet a apaki, kidiŋ a apaki ka asalunet a apaki. Akuj iŋes abu okoinak ayoŋ aosou ŋinayenunet ŋakiloconokineta ŋuna ka akoloŋ alotooma ekaru ka ŋakiloconokineta ŋuna ke ekaru,

¹⁹iŋes abu okoinak ayoŋ aosou ŋinayenunet ŋapakio ŋuna ke ekaru ka ŋikacer ŋulu etakanete alokidiama,

²⁰iŋes einanakini ŋityaŋ ŋipitesyo kec ka iŋes einanakini ŋityaŋ ŋulu ka ariet adedeŋu kec, iŋes einanakini ŋapedorosyo neni a ŋitai ka ŋatameta neni a ŋituŋa, iŋes asubuni ŋikito ŋulu egelegelya ka iŋes einanakini ŋataagor akitowo ŋikito.

²¹Abu ayoŋ oyenu ŋakiro ŋuna imunono ka ŋuna sek eyenio,

²²anerae abu aosou ŋina itemonokini ibore daadaŋ ejok eketatam ayoŋ. Eyakar aosou etau ŋolo epiiryana, ŋolo eseg, ŋolo emam ibore ikwaanatar, ŋolo etakanununi anakiro aŋuna egelegelya, ŋolo emam ibore itiyaunitere, ŋolo epedori alosit neni daadaŋ ecamit, ŋolo ileerete ŋuna irworo, ŋolo ejok nooi, ŋolo nyikwaan ka ibore idio, ŋolo emam ibore epedori akiwan, ŋolo emina ajokis, ŋolo epedorit ibore daadaŋ, ŋolo emam ibore epedori areun,

²³ŋolo erimaana nooi, ŋolo ekoneono alotuŋa, ŋolo nyiryaŋiryaŋa, ŋolo eyeni ŋuna itiyae, ŋolo emam akiyaloloŋ, ŋolo eyakar apedor aŋuna a ŋinibore daadaŋ, ŋolo ite ibore daadaŋ, ŋolo iloit ŋitai daadaŋ ŋulu epiiryaka, ŋulu iyookino ka ŋulu daadaŋ emam ibore itiyaunitere.

²⁴Elosi aosou atipei neni daadaŋ ecamit akilo ibore daadaŋ ŋini elosi, aŋuna ka akiyookino keŋ, ielakina aosou neni a ŋinibore daadaŋ ka iloit ŋinibore daadaŋ.

²⁵Erae ŋun anerae, erae aosou ekieŋanu ŋolo ka apedor a ŋina ka Akuj, erae aosou akica ŋina ka ajokis a ŋina a ŋolo etiron; aŋun, emam ibore ŋini emunaaritae ŋini epedori alomar neni ka aosou;

²⁶anerae erae aosou akiloreyet ŋina ka akica a ŋina nyedaun, erae aosou aroet ŋina emam neni emunaara ŋuna inwakunit ŋuna itiyae Akuj ka erae etorube ŋolo ka ajokis ka Akuj.

²⁷Tari kerae aosou ibore ipei bon, itiyae ŋiboro daadaŋ, tari kerubakinit aosou ikoni nenipei sek ekoni, ikiteteuni aosou ŋiboro daadaŋ; einanakini ŋanyameta a ŋituŋa ŋunakitet ŋitai ŋulu asegak ka ituruwonori ikes ŋikonei ŋulu ka Akuj ka ŋikadwarak.

²⁸Emam ibore emina Akuj nooi akilo ituŋanan ŋini iboi eyakar aosou.

²⁹Ibus aosou nooi akilo akoloŋ, iloit akibuses ŋina ka aosou ŋina a ŋikacer. Ani kisikwaanikin aosou ka akica, iloit aosou akica,

³⁰anerae itoŋopiyanari akuwar akica, nai nyitoŋopiyanari aronis aosou.