Read ngakarimojong Aos. 8 Bible Online

Aos. 8 - ngakarimojong bible

Aos. 8

¹Edolit aosou erae ŋina etiron lowaetin ka akwap a daadaŋ ka itiyae ibore daadaŋ ejok.

²Abu ayoŋ ominak aosou ka ewar iŋes ŋinapei anasoroko kaŋ; abu ekeburak ayoŋ aryamun iŋes ikwapei arukitos kaŋ, abu akibuses keŋ ekesupa ayoŋ.

³Itopoloorit aosou apolou ŋina ka akisyakinet keŋ anakiboi keŋ ka Akuj, emina Ekapolon ŋolo a daadaŋ aosou;

⁴anerae erae aosou arukitos anayenut a ŋina ka Akuj ka erae arukitos ka Akuj aloticisyo keŋ.

⁵Ani kerae ebari ibore ŋini ecamit ituŋanan anakiyar keŋ aryamun, nyo erae ebari ŋolo apolon akilo aosou ŋina erae iŋes isitiyao akitiyaunia ŋinibore?

⁶Ani kerae ayenut ibore ŋini itiyae ka agogoŋu, nyo ibore ice ŋini iloit aosou ŋina eyeuni ibore ŋini eyai tokona?

⁷Ani kemina ituŋanan idio akiyookino, erae ŋiticisyo keŋ ŋulu iyookino, anerae itatami ituŋanan ŋin akiyokiuno bon ka ayenut akitub ŋakiro iyookino ka atitinyikinit; emam ibore ice anakiyar a ŋituŋa ŋini eyakar akiŋarakinet.

⁸Ani kecamit ituŋanan idio aryamun ayenut akitiya ŋuna alalak, eyeni aosou ŋunakoloŋ ka epedori ayenun ŋuna eponito; eyeni aosou ŋuna irworosi ŋituŋa ka isileereununui ŋuna irworosi ŋituŋa etedete; eyakar aosou ayenut ŋina a ŋakujuwuanisya ka ŋaumonokineta, eyakar ayenut ŋuna etakanunete anatutubeta a ekaru ka anapakio.

⁹Aŋun abu ayoŋ oŋirik nooi akiya aosou eboiyoto ka ayoŋ, anerae ayeni ayoŋ atemar ekesirworiuni iŋes ayoŋ ejok ka ekesimukekini anapakio a ŋuna a ŋican ka akiyaloloŋ.

¹⁰Aŋuna ka aosou, aryamuni ayoŋ apolou aneni a ŋulu alalak nooi, aryamuni ayoŋ akitopolooro aneni a ŋikasikou tari karae ayoŋ esorokit.

¹¹Akaryamunio ayoŋ arae ŋolo atubi ŋakiro ejok, ajoikini ayoŋ ŋikepukak apaki ŋina ekeŋolikiniata ayoŋ.

¹²Ani keliliŋ ayoŋ, idarunete ikes olimu ayoŋ ŋakiro, ido ani erworikini ayoŋ, epupokinete ikes ejok ŋakiro kaŋ; ani kerwor ayoŋ ekaoyan, erapete ikes ŋakitukwa kec a ŋakan epupokinito ejok nooi.

¹³Aŋuna ka aosou, aryamuni ayoŋ akiyar ŋina nyedaun ka eboi ayoŋ ŋikaru ka ŋikaru atamunit ŋulu epote ekaku kaŋ.

¹⁴Epukae ayoŋ ŋituŋa ka epukae ayoŋ ŋakwapin;

¹⁵Ebuli ŋapukasinei a ŋirwosi ka ekuryaketa aŋuna kaŋ iirarete ŋakiro kaŋ, etoodikin ayoŋ lotuŋa arae ŋolo apedorit ka ŋolo atitiny alojie.

¹⁶Ani apaki ŋina alomarya ayoŋ kai kaŋ, eeŋuni ayoŋ ayakar aosou, anerae emam aŋoit anayakau ka aosou, emam aryebo anakiyar a ŋina eyakar aosou, nai eyai alakara ka alelyanu.

¹⁷Ani atamatamae ayoŋ ŋakiro nu daadaŋ ekililiŋat ka otamatama alotau atemar ayakau ka aosou, iyakaunor akiyar ŋina nyedaun

¹⁸ka akoneo ka aosou, iyakaunor alakara ŋina ejok, ani kitiya anaosou, iyakaunor ebari ŋolo nyedaun ka ani kitiya iyakar aosou, ayenut ka iyenikinit akiwuapit ŋuna ka aosou, ikitopolooryo, abu ayoŋ ewar epite ŋolo aryamunia aosou aŋuna kaŋ.

¹⁹Abu ayoŋ eriŋa arae ikoku oryamu ainakinet ŋina ka aosou ka abu ayoŋ oryamu akiyar ŋina ajokan erae akorakinet kaŋ;

²⁰nabo daŋ anaraakau ŋolo ajok, abu ayoŋ oyakaunor akuwan ŋina amam neni amunaara.

²¹Nai abu ayoŋ oyenu atemar nyapedori ayoŋ aryamun aosou mati erae Akuj akainakini ayoŋ, abu nen toruwor akitoodikinet ŋina ayenun atemar neni a ŋae ebunitor ainakinet ŋina ka aosou. Aŋun, abu ayoŋ emaima Ekapolon ka odyek iŋes ka abu ayoŋ a etau kaŋ a daadaŋ otema,