Read ngakarimojong Sir 1 Bible Online

Sir 1 - ngakarimojong bible

Sir 1

¹ŊUNA EGEUNETE Erae ŋakiro ŋuna igiritae lokitaabo lo ŋuna a Yesu alokoku a Sirak, enyaritae daŋ ekitaabo lo Ekalimonokinan. Arae ekile ŋolo anyaritae Yosua, (Kori Yesu) egiri iŋes a Ŋaburaniyae, ido abu lopapait keŋ ekaku kilocok Nagirik. Eyakasi lokitaabo lo ŋakiro ŋuna ka aosou a Ŋiyudayan, ido itoodiunito epite ŋolo egelaania edin a Ŋiyudayan anakisileereunit atemar ainaki Akuj aosou neni kec a ŋituŋa keŋ. Igiritae lokitaabo lo ŋakiro ŋuna alalak ŋuna a ŋidinio, ŋuna ka akiyar a ŋina ajokan ka ŋuna a epite a ŋolo eyakar akiyar alopite a ŋolo esubunitere ŋinibore, eya daŋ lokitaabo lo ŋakitadapeta ŋuna aoyak ka ŋuna euruwuaka. Akipuro Ekapolon aŋuna ka aosou Ebunit aosou daadaŋ aneni ke Ekapolon, ido erubakini jik aosou aneni ke Ekapolon.

²Ŋae epedori akimar asinyon ŋina ka anam, ŋakilimes ŋuna ka akiru ka ŋirwa ŋulu a ŋikaru ka ŋikaru?

³Ŋae epedori ayenun aoyau, ameun alokwap tari nakuj, alolomu ka akwap ameun alowae ke epei tari ŋoloce, aoyau ŋina ka auwuat ka aosou?

⁴Aponi aosou tosubunae eriŋa ŋiboro daadaŋ, ka asubunio koloŋ sek ayenut.

⁵Ŋae aponi kitoodikinae akisyakinet ŋina ka aosou?

⁶Ŋae eyeni atyonis ŋina yenunet aosou?

⁷Nai eyai ipei bon ŋini eyakar aosou, iŋes emaikina kitopolooroe nooi,

⁸erae iŋes Ekapolon ŋolo iboi alokicoloŋ keŋ.

⁹Erae Ekapolon abu tosub aosou; abu Ekapolon kiŋolik aosou ka abu tocamu ajokis keŋ, ido abu kilelebik aosou neni a ibore a daadaŋ a ŋini abu iŋes tosub,

¹⁰abu inak aosou neni a ŋisubuna a ŋulu eyarete a daadaŋ lopite ŋolo etemokinitor iŋes; abu inak aosou ŋina alalan neni a ŋulu eminasi iŋes. Aosou ŋina a kire iŋes akitopoloorit Ekapolon

¹¹Ani kitopoloorit ituŋanan Ekapolon, eryamuni apolou ka akitopolooro, eryamuni alakara ka ebokot ŋolo ka alelyan.

¹²Ani kitopoloorit ituŋanan Ekapolon, eryamuni alakara alotau keŋ, eryamuni alakara, alelyanu ka eryamuni akiyar ŋina aoyan.

¹³Eryamunete ŋituŋa ŋulu itopoloorito Ekapolon alakara ekaku ka akiyar a na; iterereŋio ikes akoloŋit ŋina etwakyata.

¹⁴Erae akitopoloorit Ekapolon akisyakinet ŋina ka aosou; einakinitae aosou neni a ŋulu ikinyoma eriŋa eya nakookyes.

¹⁵Iboit aosou aneni a ŋituŋa ŋinapei koloŋ anakisyakinet ka iboi aneni a ŋiletok kec anakikinyoma.

¹⁶Erae akitopoloorit Ekapolon akilelebikina aosou; ilelebianakini aosou ŋituŋa a ŋainakineta keŋ;

¹⁷ilelebianakini nakais kec ŋiboro ŋulu ajokak ŋulu iitanito ikes, ilelebianakini aosou lodulae kec akimuj ŋina itaunete ikes.

¹⁸Erae akitopoloorit Ekapolon ebokot ŋolo ka aosou, ikiinakini aosou ekisil ka ituruwori akuwan ŋina eyai eŋale.

¹⁹Ebukununui aosou ka ayenut ŋuna ajokak ka ŋuna aronok lopite ŋolo etamia ituŋanan, iyatanakini aosou apolou a ŋulu apotu kikinyoma aosou.

²⁰Erae akitopoloorit Ekapolon ataagorete ŋina ka aosou, ido erae ŋaten keŋ akiyar ŋina aoyan. [1]

²²Nyetemaryo iyookino ŋakiro ŋuna ka aŋoit koŋin, anerae eyauni aŋoit koŋin ŋican neni a ŋini eŋoit koŋin.

²³Epedorete ŋituŋa ŋulu etitinyikinito ŋakiro akiboi pa iyaloloŋete, akitodol apaki ŋina eryamuniata ibore ŋini iitanito, ido nai bu alakara neni kec nabo.

²⁴Ililiŋiyarete ŋituŋa ŋul ŋakiro kec akitodol ŋina edolio apaki ŋina iyookino; ido elimunete ŋulu elalak ŋuna ka akitam kec ejok.

²⁵Eyakar aosou lobari keŋ ŋalimununiyeta ŋuna ka aosou, nai erae amamukau ayenut Akuj asiilyo ŋina eyai neni a ekasecan.

²⁶Ani kiitanit iyoŋ aosou, kiwuap ŋakiciketa, ido ebuni Ekapolon ainakin iyoŋ aosou ŋina alalan;

²⁷anerae erae akitopoloorit Ekapolon aosou ka ŋipitesyo ŋulu ajokak. Elakara Ekapolon erae kitopoloorit ituŋanan iŋes ka kitiditeuna iŋes bon.

²⁸Nyiŋerit akitopoloorit Ekapolon; Nyilot akilip iŋes iyakar ŋatameta ŋuna ka aŋayaŋayat.

²⁹Nyiruwor ikaŋisoswae alokiŋaren ŋuluce ka tocoikinite anakiro a ŋuna irworo iyoŋ.

³⁰Nyitopolooro bon, acepaki iruwor ikoŋinait, ido yau ajamuwaro nakuwan kon. Isileereuni Ekapolon ŋuna imunonit iyoŋ, ido ikisurumi iyoŋ ŋileec alokiŋaren atukot, anerae ibu iyoŋ toloma natukot pa itopoloorit Ekapolon ka eleleba amodiyo lotau kon.