Read ngakarimojong Sir 10 Bible Online

Sir 10 - ngakarimojong bible

Sir 10

¹Ekatubon ŋakiro ŋolo aoson, iŋes ŋolo itatami ŋituŋa keŋ ka ekipukae a ituŋanan a ŋini epiiryana, iŋes ŋolo eryaaritere ŋakiro ejok.

²Epite ŋolo itiyaa ekatubon ŋakiro neni a ŋituŋa, iŋes pei ityaata ŋikapolok ŋulu itiyaete ka iŋes; epite ŋolo itiyaa ekepukan ŋolo a etaun, iŋes pei itiyaata ŋituŋa daadaŋ ŋulu iboiyete alotaun a ŋol.

³Emunaari erwosit ŋolo eyakar ŋipitesyo ŋulu aronok ŋituŋa keŋ, nai epedori etaun aruwor ŋolo iboiyoto ŋituŋa ejok erae keyakatar ŋikepukak ayenut.

⁴Eyai apukan ŋina alokwap napedor ŋina ke Ekapolon, ido eryamuni iŋes alotooma ŋinapaki ekarikon ŋolo iyookino.

⁵Erae napedor ke Ekapolon iŋes itiyaata ŋituŋa ŋiticisyo kec ejok ka iŋes einanakini apolou neni a ŋini itatami ŋikisila. Asecit ŋina ka akituro.

⁶Nyiŋoik ikidunyet kon apaki daadaŋ ŋina ikiwania iŋes iyoŋ ka nyitub akitiya ŋuna itoŋoya iŋes.

⁷Eremokino Ekapolon ka ŋituŋa akituro ka erae akitiya ŋuna nyiyookino ibore ŋini itoŋoi Ekapolon kaapei ka ŋituŋa.

⁸Iloconokin ŋikepukak anakwapin a daadaŋ aŋuna nyitiyaata ŋuna iyookino ka ŋuna a ŋiyany ta aŋuna a ebari.

⁹ikokinete mono apuwa ka ekuron iturosi ai? Emunaar akuwan a ituŋanan tari eriŋa ituŋanan eyari.

¹⁰Einakini adyak ŋina aoyan edakitar akitam nooi; epedori erwosit ŋolo ipukat tokona atwanare moi taparacu;

¹¹anerae ani ketwana ituŋanan, eruwor ŋikur ŋulu keŋ ka eruwor ŋityaŋ ŋulu ka ariet daŋ ŋulu keŋ.

¹²erae akituro a ituŋanan akisyakinet keŋ akiŋer Ekapolon; adau etau keŋ akimyekin ekasubunan keŋ;

¹³anerae erae akisyakinet ŋina ka akituro asecit, ido ŋini imiidikin nakituro, itiyae ŋuna esiilyaka. Aŋun, eyauni Ekapolon neni kec ŋican ŋulu nyiirara ŋinapei, ido emunyari ikes jik.

¹⁴Ikamanari Ekapolon apolou a ŋikepukak, ido kilunyok ŋulu itiditeuna nakiboisyo a ŋul.

¹⁵Elemanari Ekapolon ŋikepukak ŋulu iturosi itowoito ŋakwapin kec, ido kilunyok ŋulu itiditeuna make nakiboisyo a ŋulu iturosi.

¹⁶Ituruwonori Ekapolon ŋakiboisyo a ŋakwapin ŋacaryo, ido emunanari ikes todol amunaara kec tari kwap ŋalup.

¹⁷Elemari iŋes ŋakiboisyo ŋace jik ka emunanari jik, ido ikisanari ikes jik tojoŋoi atamunit anakwap.

¹⁸Pa asubunitae akituro aŋuna a ŋituŋa, kori aryenyeo alotooma aŋoit aŋuna a ŋituŋa. Ŋituŋa ŋulu emaikina toryamut apolou

¹⁹Ŋiletok ataŋae emaikina toryamut apolou? Ŋiletok a ŋituŋa. Ŋiletok ataŋae emaikina toryamut apolou? Ŋiletok a ŋulu itopoloorito Ekapolon. Ŋiletok ataŋae nyemaikina toryamut apolou? Ŋiletok a ŋituŋa. Ŋiletok ataŋae nyemaikina toryamut apolou? Ŋiletok a ŋulu nyiwuapito ŋakiciketa.

²⁰Emaikina ekarikon alotooma ekal erae ŋolo itopoloorito ŋituŋa a ekal, nai ŋulu itopoloorito Ekapolon, emaikina toryamut apolou alokiŋaren Ekapolon. [3]

²²Eryamunito ŋikabarak, ŋituŋa ŋulu eyenen ka ŋikulyak apolou kec aneni a Ekapolon.

²³Nyemaikina tojamuwarae ŋini epiiryana nai tokulyakana, ido nyiyookino akitopoloor ituŋanan ŋini erae ikasecan.

²⁴Itopolooritae erwosit, ekatubon ŋakiro ka ekepukan, nai mam ipei daŋ alokidiŋ kec ŋini epol akilo ŋini itopoloorit Ekapolon.

²⁵Ŋituŋa ŋulu eyakatar alacakina anakwap kec, itiyanakinete ejok eketiyan ŋolo aoson ka nyiŋuruŋura ituŋanan ŋini epiiryana. Ŋuna ka akitiditeuna

²⁶Nyitoodiuna anaosou kon apaki ŋina itiyaa iyoŋ etic ka nyituro apaki ŋina iitanitor iyoŋ aryamun ibore.

²⁷Ejok iketiyan ŋini eyakar ŋiboro ŋulu alalak, akilo iketuron ŋini emamukar tari akimuj.

²⁸Ikaakoku, kitopolooro bon anakitiditeuna ka inakin bon akitopolooro ŋina emaikina iyoŋ iyakar.

²⁹Ŋae irworo eiunit ŋulu etubokina make? Ŋae itopoloori ŋulu nyitopolooro bon?

³⁰Itopolooritae ŋikulyak aŋuna ka aosou kec, ido itopolooritae ŋikabarak aŋuna ka abaru kec.

³¹Ani kitopolooritae ituŋanan tari kekulyakana, etya nai ai apolou eryamuni iŋes erae kebarit! Ani pa kitopolooritae ituŋanan erae ekabaran, etya nai ai apolou eryamuni iŋes erae kekulyakana!