Read ngakarimojong Sir 11 Bible Online

Sir 11 - ngakarimojong bible

Sir 11

¹Amodiyo ŋina a etakane a ituŋanan Isiturokini aosou ŋulu itiditeuna, kisiboik ikes nakiboisyo a ŋikapolok.

²Nyipuro ŋituŋa iŋolikini akibuses a ŋawat kec, kori nyijamuwa idiotuŋanan alotakane keŋ.

³Erae ao ibore ŋini edit alosubun a ŋulu eporete, nai akimuj ŋina elomunit aneni keŋ, ewinyiwinyi akilo ŋamuja ŋuna ewinyiwinyete.

⁴Nyituro aŋuna inapitor ŋilowi ŋulu amilimilak ka nyitopoloor bon ikitopoloorito ŋituŋa; anerae eumokina ŋiticisyo ŋulu ke Ekapolon ka nyepatana ŋituŋa ayenun ŋiticisyo keŋ.

⁵Alemar anakiboisyo kec ŋirwosi ŋulu alalak, esiboikin ikes kwap, nai etanapikin ŋibokoto kec neni a ŋulu sek pa atamakinitae.

⁶Alemar ajokis alokepukak a ŋulu alalak, ido epotokin apolou neni a ŋuluce. Ŋuna kitiya ka ŋuna ecoikinitae.

⁷Nyemaikina ayenun adyakaret eriŋa nyimimauna; kiŋitiŋit mono, ido kitoroniya ekaku.

⁸Nyiboŋok ŋakiro eriŋa nyepupokina; nyitemokino iyoŋ akirworikin eriŋa ŋinice irworo.

⁹Nyiloma akimoco ŋakiro ŋuna nyikitapito iyoŋ ka nyiboikinosi ka ŋikasecak apaki ŋina etubioto ikes ŋakiro.

¹⁰Ikaakoku, nyituupa aŋuna a ŋakiro a ŋuna alalak, ani kitalala iyoŋ ŋiticisyo, emamukaun ŋolo ikitojokere iyoŋ. Ani kiwuapana iyoŋ ŋiticisyo, mam ŋolo itiyakini, ani kiem iyoŋ loticisyo, nyibucar iyoŋ.

¹¹Eyakasi ŋulu itiyaete eŋirikinito ka iburiburete, nai torubakinito iitanito ŋuna alalak.

¹²Eyakasi ŋulu iyapete, ido kiitanito akiŋarakino, ŋulu emamukatar agogoŋ, ido toyakatar akulyako; nai ite Ekapolon ikes alotooma arimao keŋ, iŋarakini ikes anayakau kec locan.

¹³itabarenene Ekapolon ikes, ido toumokis ŋulu alalak.

¹⁴Eponeneete aneni ke Ekapolon ŋuna ajokak ka ŋuna aronok ka atwanare, ebuneene aneni ke Ekapolon akulyako ka ebari.

¹⁵Eponito nu daadaŋ aneni a Ekapolon: Aosou, ayenut, aosou ŋina ka ayenut ŋikisila, amina ka akitiya ŋuna ajokak.

¹⁶Arukito ŋikasecak ka adyakanar ta akirwonut ŋinapei anakisyakinet; ŋulu eminasi aronis, erukete ka ikes tari namojoŋu kec.

¹⁷Erubakini ainakinet a Ekapolon eyai neni a ŋulu einakina, ido eyauni amina keŋ ekitiyae ejok ŋoloruba.

¹⁸Eruwor ituŋanan ikabaran a ŋuna ka akitiya ka agogoŋu ka kimik akuwan keŋ ŋuna iitanit, ido eropit ŋolo itemokinitoe aŋuna keŋ iŋes lo:

¹⁹Ani ketema iŋes, “Adau ayoŋ aryamun akieŋun, ido tokona eboikin eleile akimuj kaŋ ŋina ajokan!” Nyeyeni iŋes etyae ŋolo ka apaki a ŋina eyarya iŋes akitodol ŋina eesikinia iŋes ŋiboro ŋul aŋuna a ŋuluce totwan.

²⁰Torubak iwuapit ŋuna idau iyoŋ acamun, ido kitiya ŋunapei, tomojoŋik lotic kon.

²¹Nyiumonok aŋuna a ŋiticisyo a ekasecan, nai kikinyom Ekapolon ka torubak iyai lotic kon; anerae epatana aneni a Ekapolon akitabar ikulyakanot atipei anapaki a ŋina euruwuana.

²²Arereŋu a Ekapolon iŋes eropit a ŋulu einakina akiwuapit ŋuna keŋ, ka eyauni Akuj atipei arereŋ keŋ kitalalau.

²³Nyitema, “nyo eitanit ayoŋ ka nyo icebore aryamuni ayoŋ ŋini eruwor ŋini kaŋ?”

²⁴Nyitema, “Ikiyakar ayoŋ ŋini eketemokino ka ŋuna aronok, anu etakanunete neni kaŋ tokona?”

²⁵Anapaki a ŋina iboiyoto ŋituŋa emam ŋace, imuryakin ŋican ka anapaki a ŋina a ŋican, imuryakin apaki ŋina iboiyoto ŋituŋa emam ŋace,

²⁶anerae epatana Ekapolon akoloŋit ŋina elwania ituŋanan akirop ŋinituŋanan alopite a ŋolo a ŋipitesyo keŋ.

²⁷Epedorete ŋican ŋulu etakanunete esaa epei bon akisimuryakin alakara ŋina a ŋapakio a ŋuna alunyar. Anasalunet akiyar a ituŋanan, isileereunio ŋuna a ŋiticisyo keŋ.

²⁸Nyitemasi erae ituŋanan idio ŋini elakara eriŋa nyetwana; epite ŋolo eŋetakinia ituŋanan akiyar keŋ, iŋes eyenunere iŋes. Tocoikinite epite ŋolo iseunia ŋikonei

²⁹Nyitemokino tonyara ŋituŋa daadaŋ lore kon, anerae ŋulu alalak ŋulu itoososi amodyanakin iyoŋ,

³⁰ikwaan ikes ka ŋikalokak ŋulu isurumete ŋabaaŋa, aŋun ikote ŋatameta a ŋiketurok nen, ido ikote ikes ŋikaripiripak ŋulu ekebito ŋuna ka apalagu kon,

³¹anerae eperete ikes edapito ŋuluce, iloconokinete ŋuna ajokak toruwor ŋuna aronok, ido ilocokinete ŋuna emaikina kitiyae toruwor ŋunakitoroniyaret.

³²Ekatyenyityenyit epei bon itenepuni ŋatotol ŋuna alalak, ido eperi ekasecan edapit akiar ŋituŋa ŋuluce.

³³Tocoikinito ŋasyaanisya, anerae eyeete ikes akitiya aronis ka epedorete ikes amunaar ŋikaru ka ŋikaru ŋipitesyo kus ŋulu ajokak.

³⁴Ani kijaununuyete iyes ŋigelaanotin lorerya kus, epedorete ikes ayaun egurigur neni kus, ido ikituruwosi ikes iyes ŋigelaanotin alokalya kus.