Read ngakarimojong Sir 12 Bible Online

Sir 12 - ngakarimojong bible

Sir 12

¹Ani kitiya iyoŋ ajokis, toyeni atemar aŋuna a ŋae itiya iyoŋ ajokis ŋin,

²kitiya ajokis neni a ŋulu einakina, ido ikitaco iyoŋ. Ani kerae ikes ikitacete iyoŋ, kire jik ikitaci iyoŋ Akuj ŋina alokidiama nooi.

³Emam ajokis ebuni neni a ŋini erubakini itiyae aronis, kori neni a ŋini nyeinanakini ŋainakineta.

⁴Inanak neni a ŋulu itopoloorito Akuj, nai nyiŋarak ekasecan.

⁵Kitiya ŋuna ajokak neni a ŋulu itiditeuna, nai nyiinak ibore neni a ŋulu nyitopoloorito Akuj; kinyaku akimuj kec, nyiinak ikes, anerae epedorete ikes akisitiya ainakinet kon akimania iyoŋ; ido nai toryamu iyoŋ aronis ŋarwa ŋaarei ka akilo neni sek aŋuna ka ajokis a daadaŋ a ŋina ibu iyoŋ kitiya neni kec.

⁶Eremokino daŋ Ekapolon ŋolo alokidiama nooi ŋikasecak ka isicani iŋes ŋulu nyitopoloorito Akuj.

⁷Inak ibore neni a ŋini ajokan, nai nyiŋarak ekasecan.

⁸Nyeyenun ŋini erae ekone apaki ŋina ejokya ibore daadaŋ; kori nyeŋopi ayenun ŋini erae emoit apaki ŋina a ŋican.

⁹Eruwor ŋimoe a ituŋanan ŋikonei keŋ apaki ŋina eyarya ituŋanan emam ŋace, nai apaki ŋina a ŋican, eŋopiyarete tari ŋikonei ŋul.

¹⁰Nyikinyomit emoit kon, anerae ikwaan aronis keŋ ka eroiroi ŋolo eyai nasuwat ŋinanyaŋ.

¹¹Tari daŋ keruwor iŋes ŋini itiditeuna bon bu neni kon ekudat a ŋakuŋin, tocoikinite irae ŋini iyokiunit akiyar kon pa icamit iŋes. Emaikina iyoŋ kikwaanikin ka ituŋanan ŋini epwasi aroet, ikotere erubakini jik emam eroiroi.

¹²Nyituruwo iŋes ŋini iboi alodiyete kon, acepaki epedori iŋes ademar iyoŋ apolou kon kilunyokin nakibois kon. Nyicamu iŋes iboikin diyete kon, acepaki epedori iŋes akiboikin lokicoloŋ kon, ido ekaku ibuni iyoŋ akinup ŋuna a kire anakiro kaŋ, ido ikinomosi ŋakiro ŋuna alimu ayoŋ.

¹³Ŋae isyoni ŋini emina akitapatanunun ŋimuno apaki ŋina ekonyia emun iŋes, kori isyoni daadaŋ ŋulu eminasi aapiyanar lotyaŋ ŋulu adedeŋak?

¹⁴Aŋun emam ituŋanan isyoni ŋini emina arukit ka ekasecan, ido toloma akitiya ŋasecisya ŋuna itiyaete ŋikasecak.

¹⁵Epedori emoit akiboi ka iyoŋ apaki ŋina euruwuana, nai kiryamu iyoŋ ŋican, eŋopiyari iŋes aneni kon.

¹⁶Irworo emoit itobobot ŋakiro keŋ, nai alotooma etau keŋ eye iŋes ŋuna ka akimasakin iyoŋ nakipany. Ikikaloikini iyoŋ emoit, nai ani keryamu iŋes apaki ŋinaaret iyoŋ, nyikiesikini iŋes iyoŋ tari kikitereŋu iŋes iyoŋ.

¹⁷Ani kebu aronis neni kon, iryamuni iyoŋ iŋes kisyau kiŋaren kon, esibit ecamit akiŋarakin iyoŋ, nai ikitelerokini iŋes iyoŋ.

¹⁸Ebuni nai iŋes imuŋimuŋi akou keŋ, ido kibapibapaki ŋakan keŋ, ido ikiŋaiŋaar iyoŋ irworo ŋakiro ŋuna alalak, emam akimunonit aronis keŋ.