Read ngakarimojong Sir 13 Bible Online

Sir 13 - ngakarimojong bible

Sir 13

¹Ŋunacoikina aŋuna a ŋulu irukitotor Ani kitap iyoŋ ibore ŋini imidiyere ŋamoru lorukude, idoŋokini ibore ŋin neni kon, ido ituŋanan ŋini erukito ka ŋini iturono, ikwaan iŋes ka iketuron.

²Nyikeununui ibore ŋini epot aneni kon, kori nyirukito ka ŋini epol ka tobarite akilo iyoŋ. Ikokini mono amot ŋina itiyaunitae a ecoto ikwaanikin ka ebinika ŋolo itiyaunitae a asuwat ai? Epedori amot abwaŋa erae kenaŋakin lobinika.

³Epedori ekabaran adyekar ka epedori daŋ akiyat ŋiyany nadyakeret keŋ; Eryamunit ikulyakanot ŋican aŋuna ka adyakaret keŋ ka emaikina torubak iyasi atemar kisyoni iŋes.

⁴Epedori ekabaran akisitiya iyoŋ jik erae kirae iyoŋ ŋini ijok aneni keŋ. Nai ani kiyakar iyoŋ akiitanit, ikiesikini iŋes iyoŋ.

⁵Ani kiyakar iyoŋ idiobore ŋini erae ŋini kon, irukete iyoŋ iboiyete ka iŋes, isunyari iŋes ibore ŋini iyakar iyoŋ daadaŋ, ikisidoŋ iyoŋ emam ibore.

⁶Ani ikiitanit iŋes iyoŋ, ikimodikini, ido emaisyanikini iŋes aloŋaren kon ka ikisimukek iyoŋ. Ikisirworikini iŋes iyoŋ erimaana, ido ikiŋit tema, “Nyo iitanit iyoŋ?”

⁷Ikitakadakini iŋes iyoŋ a ŋamuja keŋ a ŋuna abobok, akitodol ŋina isunyarya iŋes aneni kon ŋarwa ŋaarei kori ŋauni ibore ŋini sek iyakar iyoŋ, ido ekaku itokyenar iyoŋ. Ani kikiyanyuwa iŋes iyoŋ ekaku, itori iŋes nawae, ido kimuŋumuŋak akou keŋ.

⁸Tocoikinite nyikitooliyor ka nyikijamuwar apaki ŋina iyakar iyoŋ nalelyanu kon.

⁹Ani kikinyar iyoŋ ituŋanan ŋini eyenen alotuŋa nooi, emaikina iyoŋ toruwor ŋini nyiwonyakini nen atipei, ido erubakini iŋes ikinyarit iyoŋ.

¹⁰Nyemaikina iyoŋ kiboiyo kiŋaren ikinyarao, acepaki ikisolooryo iyoŋ, Nyiwoiya nawae, acepaki imuryakin iyoŋ a nen.

¹¹Nyitamakinit atemar ikwaan iyoŋ ka iŋes, kori nyikinyomit erwor keŋ ŋolo aoyan; anerae ikitemi iŋes iyoŋ alorwor keŋ a ŋolo aoyan, ido ani emaisyani iŋes, ikiripiripi iyoŋ.

¹²Eryenyaaka ŋituŋa ŋulu nyimunonito ŋakiro kon ŋuna nyemaikina ŋituŋa toyenut; nyikimyekinete ŋituŋa ŋul iyoŋ akitolomar nawana kori lojera.

¹³Totenite ka tocoite nooi, anerae ilosi iyoŋ irimit pa iyeni atemar eaunito ŋakiro kon a ilope atwanare nakuwan kon.

¹⁴Ani ca eriŋa iyoŋ iyari, tominak Ekapolon, ido tonyara iŋes ikilaku iyoŋ.

¹⁵Emina ŋinisubuna ikekikwaanet ka emina ŋinituŋanan ikekidunyet.

¹⁶Erukito ŋisubuna ŋulu eyarete a ŋikabilae kec, ŋituŋa daŋ erukito make.

¹⁷Nyo epedori akisiboi epeot ka imesek kaapei? Emam ŋuna epedorete akisiboi kaapei ekasecan ka ŋini einakina neni ka Akuj.

¹⁸Alikisil eyai kidiŋ ebu ka iŋok? Alikisil eyai kidiŋ ikabaran ka ikulyakit?

¹⁹Erae ŋitukoi anariet akimuj a ŋiŋatunyo; ikwaŋinapei, erae ŋikulyak itiyaununeete akimuj a ŋikabarak.

²⁰Erae akitiditeuna bon asiilyo aneni a ŋulu iturosi, ikwaŋinapei, erae ŋikulyak asiilyo aneni a ŋikabarak.

²¹Ani epalagagauni ekabaran, erae ŋikonei keŋ iŋarakinete iŋes, nai ani epalagagauni ŋini sek itiditeuna bon, ijukarete iŋes nawae ŋikonei keŋ.

²²Ani kibutor ekabaran, epote ŋulu alalak alakun; ido irwori iŋes ŋakiro ŋuna pa amaikina tolimu, nai elimunete ŋituŋa atemar iyookinit iŋes. Ani kibutor alorwor keŋ ŋini itiditeuna bon, isoloorete ŋituŋa iŋes; tari kirwor iŋes ŋakiro ŋuna ka apolou, emam ituŋanan epupokini ŋuna irworo iŋes.

²³Ani kirworik ekabaran, ililiŋete ŋituŋa daadaŋ; ecelunete ikes itopoloorito iŋes todolo ŋitoilon kec lodouwon. Ani kirworik ikulyakit temasi ikes, “Ŋae ituŋanan en?” Ani nai kitiditeun ituŋanan ŋin aneni kec, ijukarete ikes iŋes kwap.

²⁴Ejok ebari erae kemam asecit eyai tooma keŋ, erae akulyako aronis anatameta a ŋituŋa a ŋulu nyiwuapito ŋuna ka Akuj.

²⁵Erae ŋuna eya lotau a ituŋanan ikes itoodiunit ereet a ituŋanan, kerae ŋuna ajokak, kori ŋuna aronok.

²⁶Emacar ke etau a ŋolo elakara iŋes ereet ŋolo emaisyani, nai alimunun ŋakitadapeta, iitanit atamatam nooi.