Read ngakarimojong Sir 14 Bible Online

Sir 14 - ngakarimojong bible

Sir 14

¹Elakara ŋulu nyirworosi ŋakiro car, nyemaikina ikes kisicanae aŋuna ka asecit.

²Elakara ŋulu nyiilit alotai kec aŋuna itoroniyaritere, ŋulu nyimyekina akigeno kec. ekesitiyae ebari anayenut epite ŋolokisitiyaet.

³Ituŋanan ŋini nyetami nooi, icana ebari ka ekainyo ebari aneni a ituŋanan a ŋini emini?

⁴Ecunakini iŋes aŋuna a ŋuluce ibore ŋini eŋerit iŋes; ido eyarete ŋuluce a eleilei a ŋolo eryamunito aloboro keŋ.

⁵Ani kemini ituŋanan aryamun ibore aŋuna keŋ, neni a ŋae nai einakini iŋes ka alakara?

⁶Emam ŋini erono nooi akilo ŋini emini aryamun ibore aŋuna keŋ; erae ŋin akisicanet aŋuna ka aminiu keŋ.

⁷Ani acepaki kitiya iŋes ŋuna ajokak, erae adyekaret, ido ekaku isileereuni iŋes aminiu keŋ.

⁸Erae ituŋanan ŋini emini ŋini aronon, emuleni iŋes ŋituŋa anakiitanit kec.

⁹Nyimwonikina ituŋanan ŋini erorokana a ibore a ŋini einakinio; itajamaani etau arorokanut ŋina nyitiyaere ŋuna iyookino.

¹⁰Ituŋanan ŋini emini nyeryamuni akimuj, ido icana ŋina kiwuakina lomesa keŋ.

¹¹Ikaakoku, kidarite akuwan kon ejok, lopite ŋolo ipedoritor iyoŋ, ido inanak ŋainakineta ŋuna ajokak neni ke Ekapolon.

¹²Totamunito atemar nyedidi atwanare ka nyitoodikina iyoŋ ŋinyas ŋulu a akibois a ŋikatwak.

¹³Kitiya ŋuna ajokak neni a ŋikonei eriŋa nyetwana, ido todolonok ikes ka inanak lopite ŋolo ipedoritor.

¹⁴Nyimik akuwan kon akileile ibore ŋini ka akoloŋit ka adio; nyimyek ibore ŋini ajokan ŋini icamit iyoŋ aryamun ebucar.

¹⁵Nyimyekinia mono iyoŋ ŋuluce ibore ŋini idau iyoŋ akitiya? Nyekoryo mono ilamilamyo ibore ŋini ibu iyoŋ toryamu a ŋakinyinyir kon a?

¹⁶Inak ka kijaa, ido kileile, anerae nyiryamuni iyoŋ akileile adio anakibois a ŋikatwak.

¹⁷Emojoŋeneneete ŋisubuna daadaŋ ŋulu eyarete lopite ŋolo enyamunor elou, anerae ŋuna etubunitoe koloŋ sek ikes nu, “Emaikina iwon ikitwaki.”

¹⁸Ikwa ŋakwii ŋuna alalak ŋuna eya lokitoe, ŋolo epetarit ŋaten, ekitoe ŋolo erarae ŋakwii ŋace, ido kitolomu ŋace, ikwaŋinapei ŋanyameta a ŋituŋa daŋ ikote nen; etwani apei, ido kidoŋ ŋinace.

¹⁹Eŋorotoniyari ibore daadaŋ ŋini erae ituŋanan itiyaunit, ido todaun, ŋini etiyauni ibore ŋin daŋ, emojoŋi toŋopiyasi ka ibore ŋin. Alakara ŋina ka akiwarit aosou.

²⁰Elakara ituŋanan ŋini etamatamae ŋuna ka aosou, ido kirworo erae ŋini epiiryana,

²¹ŋini etamatamae alotau keŋ ŋuna ka aosou, ido kiitanite ayenun ŋuna imunono ŋuna ka aosou.

²²Kiwarite aosou lopite ŋolo iwaritor ekerikan ŋityaŋ, ido toperi idarit aryamun aosou alorotin a ŋulu eryamunere;

²³ŋini eripi alodirisa akiirar ŋuna ka aosou, ido topupi ŋuna ka aosou alopuke keŋ.

²⁴Ŋini iboi alodiyete neni eyai aosou, ido kibubukinite ŋases a eema keŋ narwatata a ŋini eyakar aosou.

²⁵Ŋini igurokinit eema keŋ diyete neni eyai aosou, ido iboikin iŋes nakibois ŋina ajokan nooi.

²⁶Ŋini iwuakini ŋidwe keŋ nakiuryaro ŋina ka aosou, ido kiboi alotolim a ŋolo ka aosou.

²⁷Ŋini imukunit etolim ŋolo ka aosou alocan, ido kiboi iŋes alotooma akica ŋina ka aosou.