Read ngakarimojong Sir 15 Bible Online

Sir 15 - ngakarimojong bible

Sir 15

¹Ŋini daadaŋ itopoloorit Ekapolon itiyae nu ka ŋini daadaŋ einakina nakiwuapit ŋikisila, eryamuni aosou.

²Ebuni aosou akisiryamun iŋes ikwa toto ka ijauni aosou iŋes ikwa ateran.

³Isimuji aosou iŋes a akimuj ŋina ka ayenun ŋakiro, einakini aosou iŋes tomat aosou ikwa ŋakipi.

⁴Egwaŋakin iŋes neni ka aosou ka nyibusokin iŋes, ido eyarikini iŋes neni ka aosou ka nyisurumyo iŋes ŋileec.

⁵Itopoloori aosou iŋes akilo ŋikidunyet keŋ, ido eruwor ituŋanan ŋin ikerworon anatukot a ŋituŋa.

⁶Eryamuni iŋes alakara ka ebokot ŋolo ka alelyanu, ido eryamuni iŋes ekiro ŋolo a ŋikaru ka ŋikaru.

⁷Nyeryamunete ŋibaŋaanotin aosou. Ido nyiŋolikinete ŋikasecak aosou.

⁸Elwana aosou aneni a ŋulu ituroko ka nyepedorete ŋikalyokonok atamatam ŋuna ka aosou.

⁹Nyemaikina ŋikasecak ipurosi Ekapolon, anerae meere neni a Ekapolon ebunitor akipuro kec iŋes.

¹⁰Erae naosou emaikina tolomunia akipuro Ekapolon, ido ituruwori Ekapolon akipuro ŋin ŋina iyookino. Eyakar ŋinituŋanan apedor aseun ŋuna ecamit

¹¹Nyitema, “Erae Ekapolon abu eketesec ayoŋ;” anerae nyitiyae Ekapolon ŋuna eremokino.

¹²Nyitema, “Erae Ekapolon abu eketooliyo ayoŋ;” anerae emam ŋuna iitanit Ekapolon aneni a ŋikasecak.

¹³Eremokino Ekapolon ka asiilyo daadaŋ; nyeminasi ŋulu itopoloorito Ekapolon ŋakiro ŋuna ikote ŋun.

¹⁴Erae ekapolon abu tosub ŋituŋa anakisyakinet, ido abu kimyek ikes anapedor kec a ŋina ka aseun ŋuna ecamito.

¹⁵Ani kiseut iyes iŋes iwuapete ŋakiciketa ka akitiya alotooma akikinyoma, erae aseunet kon a ŋinituŋanan.

¹⁶Ewuak Ekapolon kiŋaren kon akim ka ŋakipi; ido kiopeiyo iyoŋ akonikan neni a ŋini a daadaŋ iseuni iyoŋ. Topeta ŋakan kon aŋuna a ŋini iseuni iyoŋ.

¹⁷Kiŋaren ŋinituŋanan eyakasi akiyar ka atwanare, ido ŋinibore eseuni ŋinituŋanan einakinio;

¹⁸anerae epol nooi aosou ŋina ke Ekapolon; erae iŋes ŋolo ka apedor ka ite iŋes ŋiboro daadaŋ.

¹⁹ite iŋes ŋulu itopoloorito iŋes ka eyeni iŋes ŋuna daadaŋ itiyaete ŋituŋa.

²⁰Nyelimokina iŋes ituŋanan idio akitiya ŋuna aronok ka nyecamakina iŋes ituŋanan idio akisec.