Read ngakarimojong Sir 16 Bible Online

Sir 16 - ngakarimojong bible

Sir 16

¹Akisicanet a Akuj ŋikasecak. Nyiitanit aryamun ŋidwe ŋulu alalak ŋulu emam ajokis eyai ka nyilelyani aŋuna a ŋiletok a ŋulu nyiwuapito ŋuna ka Akuj.

²Ani kepitut ikes, nyilelyan aŋuna kec, mati eyakatar ikes akitopoloorit Ekapolon.

³Nyikinyomit eyare kec, kori nyikinyomit alalau kec; anerae epedori ipei ajokyar akilo aliput, ido atwanare emam ikoku, ejok akilo ayakau ka ŋidwe ŋulu nyiwuapito ŋuna ka Akuj;

⁴anerae alotooma ipeituŋanan ŋini epiiryana, ilelebun ŋituŋa lotaun, nai alotooma ateker ŋina nyiwuapit ŋikisila, eruwor etaun ereŋorot.

⁵Adau ayoŋ akiŋolikin ŋakiro ŋuna alalak ŋuna ikote ŋun ka adau ayoŋ akiirar ŋakiro ŋuna ikinomorete akilo ŋun.

⁶Eyakaun anyunyura ŋina ke Ekapolon natukot a ŋikasecak, ido eriraununui anyunyura ŋina ke Ekapolon anakwap a ŋina nyiwuapitere ŋuna ke Ekapolon.

⁷Abu Ekapolon nyisyoni ŋituŋa ŋulu koloŋ, ŋulu aoyak toburok, ŋulu apotu aŋuna ka agogoŋ kec toŋero iŋes.

⁸Abu Ekapolon nyimyek ŋikidunyet a Lot, ŋulu abu iŋes toŋer aŋuna ka akituro kec.

⁹Abu iŋes nyitoodiu akisyon keŋ neni a akwap a ŋina alosikinit iŋes amunyar, neni a ŋulu abu iŋes toŋer aŋuna a ŋasecisya kec;

¹⁰kori neni a ŋasigarya a ŋuna alosete a ŋakejen a ŋuna arae ŋalipyo ŋamiae ŋakanikapei, a ŋuna apotu tocunakin aŋuna ka akisyanu kec.

¹¹Tari daŋ kerae toyai nen ipeituŋanan ŋini itogogoŋit akou keŋ, keruworo ŋakiro ŋuna ka aumokin kerae kebucar iŋes nyisicana. Erae neni a Ekapolon eponitotor akisyon ka anyunyura, eyakar iŋes apedor ŋinakisyoniyet, nai epedori daŋ abukun anyunyura.

¹²Lopite ŋolo epoloo nooi akisyon ŋina a Ekapolon epol daŋ akekisicanet, etubonokini iŋes ituŋanan lopite ŋolo itiyator ituŋanan.

¹³Nyebucaror ekasecan ibore ŋini ekokounit, ido nyimikio ŋulu idarito ainakino ibore anakiwuapit kec ŋuna ka Akuj.

¹⁴Einakinit iŋes ŋituŋa apaki ŋinakitiyaet ŋuna eryamuniata akisyonio; eryamununui ŋinituŋanan ibore lopite ŋolo itiyator iŋes. [4]

¹⁶Itoodiununui Ekapolon akisyon keŋ neni a ŋisubuna keŋ a daadaŋ, atyaka iŋes akica anakirwonut isitiyat akipimet.

¹⁷Nyitema, “Aŋopikinit ayoŋ Ekapolon,” ka ŋae alokidiama nooi akatamunit ayoŋ? Nyakayenete ayoŋ ŋituŋa ŋulu alalak, anerae ŋae ayoŋ alotooma ŋisubuna ŋulu alalak nooi?

¹⁸Utukui, emaranikinete nakuj ka kidiama nooi, emaranikinete auwuat ka akwap apaki ŋina ebunio Ekapolon.

¹⁹Emaranikinete ka iryaŋiryaŋakin ŋimoru ka ŋakisyakinet a akwap apaki ŋina iŋolikinia Ekapolon ikes.

²⁰Nai mam ŋatameta a ituŋanan ŋuna eyenunete ŋakiro ŋun ka ŋae epedori ayenun ŋuna ecamit iŋes kiwuapae?

²¹Nyitatakanunitae ŋiticisyo a Ekapolon ŋulu alalak lopite ŋolo nyetakania aneni a ituŋanan a idio ekuwuam ŋolo ekusi nooi.

²²Ŋae erae kiserau ŋiticisyo a Ekapolon ŋulu ka akiyookino, kori ŋae epedori akidarun? Anerae ŋuna atubu iŋes elwaka akilo.

²³Erae ŋun ŋatameta a ŋini edit ayenun, ituŋanan ŋini nyetamatamae ka ŋini emodyanakinio, etami iŋes ebaŋaana. Etakani aosou a Akuj alosubuna

²⁴Topupokinae ayoŋ, ikaakoku, ido toryamu aosou, ido topupok ejok ŋakiro kaŋ.

²⁵Eketatami ayoŋ iyoŋ ŋuna iyookino ŋuna emaikina kiwuap, ido akalimokini ayoŋ iyoŋ ŋuna iyookino ŋuna ka aosou.

²⁶Ani esubuni Ekapolon ŋisubuna keŋ anakisyakinet, abu kiwuak ŋolosubuna nakibois ŋina emaikina eyai.

²⁷Abu iŋes kiwuanak ŋisubuna keŋ lopite ŋolo emaikina eyakatar ŋikaru ka ŋikaru ka amaikina eyakae kec ikoni nen ananyameta a daadaŋ. Nyemaikina ikes tonyam akoro, kori toryamut eupanu, ido nyemaikina ikes kimyekis ŋuna emaikina kitiyata.

²⁸Nyemaikina ikes tocunakin neni a ŋinice, ido apotu ŋisubuna nyeŋero ŋakiro a Ekapolon.

²⁹Abu nai Ekapolon kiŋolik akwap, ido kilelebik nakwap ŋiboro ŋulu ajokak.

³⁰Abu kilelebik nakwap ŋisubuna ŋulu a ŋolokabila, ido kwap pei emaikina ikes toboŋosi.