Read ngakarimojong Sir 2 Bible Online

Sir 2 - ngakarimojong bible

Sir 2

¹Ŋiticisyo ŋulu emaikina kitiyae neni ka Akuj Ikaakoku, ani ibuni iyoŋ akitiyanakin Ekapolon, tosubakina aŋuna ka akikatakino.

²Tosubak ekonitau torae ŋolo iyookino ka ŋolo nyiryaŋiryaŋa ka nyiryairyai apaki ŋina eponiata ŋican.

³Kimiidikin neni ka Akuj, ido nyiesik iŋes, ikotere ejokyata ŋirwa kon ŋulu esidyok.

⁴Tocamu ŋican ŋulu etakanunete neni kon ka totitinyik anapakio a ŋuna a ŋican.

⁵Ikatanakinio egolid ka akim, ido ikatanakinio ŋipitesyo a ŋituŋa alocan a ŋulu amwanak pe ikwa akim a ekitet.

⁶Kikinyom Ekapolon, ido ikiŋarakini iŋes iyoŋ; kituruwo ŋipetesyo kon ŋulu iyookino, ido kigeno neni keŋ.

⁷Iyes ŋulu itopoloorito Ekapolon, kidarutu akeekisyon, nyioliyosi, acepaki iesikinete akiwuapit iŋes.

⁸Iyes ŋulu itopoloorito Ekapolon, kikinyoma iŋes, ido nyeŋopiyari eropit kus.

⁹Iyes ŋulu itopoloorito Ekapolon, toyakatar akigeno ŋiboro ŋulu ajokak, aŋuna ka alelyanu ka akisyon ŋinaruba.

¹⁰Totamatamata mono iyes ŋuna a ŋanyameta a ŋuna akoloŋ, ido kiŋolikisi nu; eyai mono idio ŋini abu kikinyom Ekapolon, ido nyeryamu akiŋarakino a? Kori abu idio torubak itopoloorit Ekapolon, ido toesik Ekapolon iŋes a? Kori eyai mono ŋini abu tonyara Ekapolon, ido tojamakinae a?

¹¹Erae Ekapolon ŋolo erimaana ka isyoniono; isyonene iŋes ŋulu esecito ka eiununui ŋulu eyakasi locan.

¹²Ekaŋ iyes ŋulu ekuryaka ŋitai ka tokalanyaka ŋakan ka ekasecan ŋolo italalat ŋirotin ŋulu ka akiyar kon!

¹³Ekaŋ iyes ŋulu ililimiyorito alotai kus ŋulu imamukatar akikinyomit! Aŋun, emamukaun neni iunotor iyes.

¹⁴Ekaŋ iyes ŋulu iŋero akigeno kus! Nyaanu ŋuna itiyakinete iyes apaki ŋina ebunio atubokino aneni ke Ekapolon?

¹⁵Nyeŋerito ŋituŋa ŋulu itopoloorito Ekapolon ŋakiro keŋ, ido iwuapito ŋulu eminasi Ekapolon ŋuna ebala iŋes kiwuapa.

¹⁶Iwarito ŋulu itopoloorito Ekapolon alakanar neni keŋ, ido eyenete nooi ŋituŋa ŋulu itopoloorito Ekapolon ŋikisila keŋ.

¹⁷Itemonokinete ŋituŋa ŋulu itopoloorito Ekapolon ŋitai kec, ido itiditeuna ikes make alokiŋaren Ekapolon.

¹⁸Oyakaunos napedor ŋina ke Ekapolon, nai meere napedor a ŋituŋa; anerae eriyan ailiil keŋ ka akisyon keŋ, ido eriyan ŋiticisyo keŋ ka ekiro keŋ.