Read ngakarimojong Sir 20 Bible Online

Sir 20 - ngakarimojong bible

Sir 20

¹Akililiŋ ka akirworo. Eyai akiŋenyakin ituŋanan ŋina eŋesun ka eyai ituŋanan ŋini eos nooi ŋini epedori akililiŋ.

²Ejok nooi akiŋenyakin ituŋanan edyakari akilo akililiŋia aŋoit kon.

³Ituŋanan ŋini ecamuni atemar adyakarit, iyokiyo iŋes nyisicanio.

⁴Ituŋanan ŋini ereikinit ŋakiro atemar tocamunae ikwaan ka ekile ŋolokolup ŋolo ikamuni apese kitiŋak akiryamakin.

⁵Ililiŋete ŋicetuŋa, ido totamakinae atemar kori eosok, ido ŋice itoroniaritae aŋuna irworyaketa.

⁶Ililiŋete ŋicetuŋa, anerae emamukatar ŋunalimuno, ido ŋice ililiŋete, anerae eyenete ikes apaki ŋinakirworikinet.

⁷Erubakini ituŋanan ŋini aoson ililiŋi tari ŋina edolyo apaki ŋina itemokino kirworikinia, nai ibaŋaanot ŋini eturon nyeyeni apaki ŋinakirworikinet.

⁸Ituŋanan daadaŋ ŋini irworo ekaoyan a ŋinapaki, itoroniyaryo ka ituŋanan daadaŋ ŋini ilopiyari akirworo aneni a ŋikapolok eremokinoi. Akijulujul ŋakiro

⁹Acepaki eyakaunun ŋuna ajokak neni a ituŋanan a ŋini isicanitae ka epedori akisicanio aŋuna ka aryamun ibore ŋini ajokan akitotwaniar aryamun ibore ŋin.

¹⁰Eyai ainakinet ŋina nyikiteryamuni iyoŋ ibore idio ka ainakinet ŋina ideniunitoe eruwor ŋina etacio iyatakina.

¹¹Eyakaunun atwaniyar ibore aŋuna ka aryamun apolou, ido eyakasi ŋituŋa ŋice ŋulu aryamut apolou aŋuna ka akitiditeuna kec anakiro a daadaŋ.

¹²Ipigaete ŋituŋa ŋice ibore ŋini alalan a ibore a ŋini edit, nai totaca ekaku ibore ŋini alalan adepar.

¹³Eruwonor ŋikaosok ŋulu eminae anakiro kec a ŋuna ekudyoko, nai akitojoka a ŋibaŋaanotin alorwor kec, erae akicanican erwor.

¹⁴Emam idiobore iryamuni iyoŋ anainakinet a ibaŋaanot, anerae iwarit iŋes atemar okotacakin ŋini edolit ŋarwa ŋakanikaarei a ainakinet a ŋin.

¹⁵Ikiinakini ibaŋaanot ibore ŋini edit, nai ikirworor nooi irworo ecela nooi ecamit kiirasi ŋituŋa daadaŋ, ikidenikini iŋes iyoŋ ibore nakuwar na, ani moi taparacu kiitan akinyakakino; nyejok aneni ka Akuj ka aneni a ŋituŋa ituŋanan ŋini ikoni nen.

¹⁶Ebala ibaŋaanot, “Emam ayoŋ ŋikonei ka emam ŋini akalimonokini ayoŋ atemar alakara aŋuna a ŋiticisyo kaŋ a ŋulu ajokak, ekerworotor ayoŋ ŋulu imujete akimuj kaŋ.”

¹⁷Ŋiyai elimunete atemar erae iŋes ibaŋaanot ka ŋarwa ŋayai elimokiniata? Erwor ŋolo nyiyookino.

¹⁸Ejok akicurutiyar anenidelet akilo akibutor irworo, iburuburuun akinyasuno a ŋulu aronok atipei.

¹⁹Ikwaan ituŋanan ŋini aryenyaanan ka eemut ŋolo nyemaikina kiyanunae, ŋolo irworosi ŋituŋa a ŋinapaki ŋulu nyeyenete apolou keŋ.

²⁰Epedorete ŋituŋa akiŋer akitadapet ŋina elimuni ibaŋaanot, anerae nyelimuni iŋes akitadapet ŋin anapaki a ŋina iyookino.

²¹Epedori akulyako akiretakin ituŋanan asecesec; aŋun ani ieŋuni iŋes, eryamuni atemar mam ŋuna iilitor iŋes aŋuna ka asecit.

²²Epedori ituŋanan acakar akiyar keŋ aŋuna a ŋileec, kori epedori acakar aŋuna ka akitopoloorit ŋituŋa.

²³Epedori ice acakar akiyar keŋ aŋuna ka akiiyanakin ŋikonei keŋ ibore, ido toruwor emoit a ŋituŋa koŋin. Alyokonu

²⁴Erae alyokonu ibore ŋini ka asiilyo aneni a ituŋanan, eyakaunun a ŋinapaki nakituk a ituŋanan a ŋini emam ibore eyeni akirworo alyokonu.

²⁵Ejok ekokolan akilo ituŋanan ŋini anaiya akirworo alyokonu, nai ibore ŋini eryamunete ikes daadaŋ iŋes amunaaro.

²⁶Ŋuna iwuapit ekalyokonon, erae ŋuna eyaete iŋes neni emam ajokis, ido eyakasi ŋileec neni keŋ a ŋinapaki. Ŋakiro ŋuna irworoe aŋakitadapeta

²⁷Isirworiunun ituŋanan ŋini aoson bon anakiro keŋ a ilope ka ituŋanan ŋini etami ejok, elakar ŋikapolok aŋuna keŋ.

²⁸Ŋulu itaete, etukete ŋikinyom ŋulu adaut alemun ka ŋulu elakara ŋikapolok aŋuna kec, emookun anakitiya ŋuna nyiyookino.

²⁹Erae akitojokyo ka ŋainakineta ibore ŋini elemari aosou aneni a ŋikaosok, ido ikitojoŋoete ikes iyoŋ akirworo ŋuna akire.

³⁰Aosou ŋina nyetakani ikwaan ka ebari ŋolo iwuaitae erae ikes daadaŋ ŋicaryo.

³¹Ejokak ŋulu iwuaito abaŋao kec akilo ŋulu iwuaito aosou kec.