Read ngakarimojong Sir 21 Bible Online

Sir 21 - ngakarimojong bible

Sir 21

¹Ŋasecisya ŋuna egelegelya Isecit iyoŋ ikaakoku a? Nyitiya ŋun nabo, nai kiŋit akisyonio aŋuna a ŋasecisya kon a ŋuna idau iyoŋ akitiya.

²Toem anasecit lopite ŋolo iemia aneni ke emun; anerae ani kiyapiya iyoŋ nasecit ikiwani iyoŋ. Ikwaan awanat keŋ ka ŋina ikiwania eŋatuny, ido epedori asecit amunyar akiyar a ŋituŋa.

³Ŋakiro daadaŋ ŋuna ka aŋerit akiwuapit ŋikisila, ikwaan ka ekileŋ ŋolo ipenitae ŋiwaetin daadaŋ, emam ibore itiiyori neni ikiwani iŋes.

⁴Ibalibalarete ekabule ka ŋiyany ebari; aŋun, ituruworyo ŋakais a ŋiketurok ŋireŋoroto.

⁵Edoli akilip a ŋikulyak ŋina elimunete ikes neni ka Akuj, ido ebuni aboŋokinet keŋ neni kec atipei.

⁶Ŋulu nyecamito akiyayakino, elosete iwuapito ŋuna itiyaete ŋikasecak, nai ikes ŋulu itopoloorito Ekapolon, ekiyete alotai kec.

⁷Eyenen anakiboisyo a ŋuna alalak ŋituŋa ŋulu etirok alorwor, ani kibutorosi ikes alorwor kec, eyenuni ituŋanan ŋini aoson atemar ebutorosi ikes.

⁸Ituŋanan ŋini edukokini akai keŋ isitiyae ŋisiliŋa a ŋuluce, ikwaan ituŋanan ŋin ka ŋini ecunakini ŋamoru aŋuna ka anukio keŋ.

⁹Ikwaan atukot a ŋikaronok ka aenet ŋina a ŋakopit ka erae asalunet kec akim ŋina erirae.

¹⁰Epesitae lorot a ŋikasecak ŋamoru ŋunasulut, nai isalakini erot ŋol nakibois a ŋikatwak. Aosou ka abaŋaanut

¹¹Ituŋanan ŋini iwuapit ŋikisila iyokiunit iŋes ŋatameta keŋ ka akisiyookinet ŋina ka akitopoloorit Ekapolon iŋes aosou.

¹²Ituŋanan ŋini eos sek, nyitatamio, nai eyai aosou ŋina iatanakini aŋoit.

¹³Iatakin aosou a ŋipiiryanotin ikwa akalele ka iatakin ŋakiro ŋuna irworosi ikes ikwa eitanit ŋolo nyedaunun ŋakipi.

¹⁴Ikwaan ŋatameta a ŋibaŋaanotin ka amot ŋina ebwaŋaŋ; emam ŋakiro ŋuna ka aosou ŋuna iricakinete ikes.

¹⁵Ani iirari ituŋanan ŋini epiiryana ŋakiro ŋuna irworo ituŋanan ŋini aoson, ipuri iŋes aosou ŋin, ido kiatak naosou ŋina sek eyakar. Ani iirari ituŋanan ŋini ebaŋaana ŋakiro ŋuna irworo ituŋanan ŋini aoson, ejamuwari iŋes aosou ŋin, ido kimyek akiwuap ŋun.

¹⁶Ikwaan ekiyan a ŋibaŋaanotin ka egogos ŋolo ikituupi ilosi iwace, nai eryamun alelyanu alorwor a ŋulu epiiryaka.

¹⁷Etamatamaete ŋituŋa anatukot ŋakiro ŋuna irworo ituŋanan ŋini aoson ka eomoomoete anatameta kec ŋakiro ŋun.

¹⁸Ikwaan aosou aneni a ibaŋaanot ka akai ŋina eritakina ka aneni a ŋini emam ayenut, ikwaan aosou ka erwor ŋolo emam apolou.

¹⁹Aneni a ituŋanan a ŋini nyetami, ikwaan akisyom ka ŋiriko ŋulu ikirocitere ŋakejen ka ikwaan akisyom ka epite ŋolo ikirocitere a ŋiriko akan ŋina aloteten.

²⁰Ikeunit ibaŋaanot etoil keŋ ekyena, nai emaisyani ŋini aoson ekililiŋat.

²¹Ikwaan akisyom aneni a ituŋanan a ŋini etami ka eborosit ŋolo enapitae ŋolo itiyaunitae a egolid ka ikwaan akisyom ka amulanyaŋ ŋina enapitae anakan a ŋina aloteten.

²²Ikomaari ibaŋaanot kai atipei nyetemara tolomu, nai ituŋanan ŋini itatamitae sek, ewoi alokiŋa kidareu eyakar akitopoloorit ilope akai.

²³Eremokinit ituŋanan ŋini aronon a ŋipitesyo ŋakonyen kai alopuke, nai ituŋanan ŋini itatamitae, idoŋi kiŋa kidareu.

²⁴Erae ŋipitesyo ŋulu aronok akipup alopuke ŋakiro ŋuna irworosi ŋituŋa alokai, ido itoŋoyete ŋakiro ŋun ituŋanan ŋini eosokinit akitiya aronis.

²⁵Ŋituŋa ŋulu irworosi ŋakiro car, irworosi ŋuna nyemaikina ikes kirworo, nai ecoikinito ŋituŋa ŋulu aosok ŋuna itiyakin anakiro a ŋuna irworosi ikes.

²⁶Eyakasi ŋatameta a ŋibaŋaanotin nakituka kec; nai ŋuna irworosi ŋikaosok eyakasi natameta kec.

²⁷Ani iceni ituŋanan ŋini nyenupit neni ka Akuj emoit, iceno iŋes ilope bon.

²⁸Ituŋanan ŋini iŋaiŋa, erae ŋini ejamuwara bon ka itidiŋito iŋes ŋikidunyet keŋ.