Read ngakarimojong Sir 22 Bible Online

Sir 22 - ngakarimojong bible

Sir 22

¹Ŋulu ekalanyaka Ituŋanan ŋini erae ikalanyanot, ikwaan ka amoru ŋina inyasuna ka ijutujuta aŋuna nyejokia iŋes.

²Ikwaan akinyasuna a ikalanyanot ka akinyasuna a ŋikamukumukui a ŋulu ileleba ŋacin ituŋanan daadaŋ ŋini idepuni ŋacin ŋun ilakilakaari anakan keŋ. Ajoŋ akipit ŋidwe

³Mam ajokis aruwor papa a ikoku a ŋinisapat a ŋini nyeyakar ŋipitesyo ŋulu ajokak ka erae atwaniyar akidoun ikoku ŋinipese,ŋini aronon a ŋipitesyo.

⁴Ikoku ŋinipese ŋini etami iŋes atemar eseuni ekile keŋ a alope, nai ŋini eleeceno, eyauni akiyaloloŋ neni a papa keŋ.

⁵Eyauni ikoku ŋinipese ŋini eryanyaana pa irumito ŋileec akiyaloloŋ neni a papa keŋ ka neni alokile keŋ, ido ejamuwarete ikes iŋes.

⁶Ikwaan erwor ŋolo aronon ka ŋieosyo ŋulu eoi apaki ŋina igworore, nai akisican ka akitatamo, erae aosou a ŋinapaki daadaŋ.

⁷Ŋidwe ŋulu itopolounitoe anakiyar a ŋina ajokan, nyililiŋiyarete akiyapara ŋina ayakatar ŋikauruunak kec.

⁸Ŋidwe ŋulu nyitopolounitoe anakiyar a ŋina ajokan, ŋulu iturosi, ŋulu itopolooro bon, emunaarete akitopoloorit ŋina sek eyakatar ŋituŋa a ekal kec. Aosou ka abaŋao

⁹Ituŋanan ŋini itatami ibaŋaanot, ikwaan ka ŋini imiinianakini ŋataboka, kori ka ŋini itekenyuni ikajoton ŋini ilura nooi.

¹⁰Ituŋanan ŋini itatamikini eemut neni a ibaŋaanot, itatamyanakini neni a ituŋanan a ŋini ilura; ido ekaku elimuni iŋes ebe, “Inyoni?”

¹¹Kigworo aŋuna a ikatwan, anerae arotoki iŋes anakica ka kigworo aŋuna a ibaŋaanot, anerae arotoki iŋes anapiiryanut. Kigworo pa ikinomorit nooi aŋuna a ikatwan, anerae eyai iŋes nakieŋun; nai erono nooi akiyar aibaŋ iloit tari atwanare.

¹²Igworoi ikatwan ŋarwa ŋakanikaarei nai akigworo aŋuna a ibaŋaanot, kori a ŋini nyiwuapit ŋuna ka Akuj, erae ŋina a ŋirwa a daadaŋ a ŋulu ka akiyar.

¹³Nyirwor ŋuna alalak neni a ituŋanan a ŋini nyetami, kori nyilot apeyo neni a ituŋanan a ŋini nyepiiryana. Kiboiye iyeni iŋes nooi, acepaki ilomari iyoŋ locan, ido torotok aneni keŋ apaki ŋina erotokinio iŋes. Toŋer iyoŋ iŋes, ido iryamuni iyoŋ akieŋun, emam ŋuna ituupa iyoŋ aŋuna nyetamya iŋes.

¹⁴Nyo epot akilo asuwat ŋina enyaritae lead? Ŋae ekiro keŋ akilo “Ibaŋaanot?”

¹⁵Epatana akidaŋidaŋ apotis a asinyon, a acumbi ka atutubet a asuwat akilo akidaŋidaŋ ituŋanan ŋini ebaŋaana.

¹⁶Nyepedori amaran ŋina ka akwap aditar akitoe ŋina eenikinitae kai ejok, aŋun, ŋatameta ŋuna eyakar ituŋanan ekaku a ŋican erae ŋuna nyiryaŋiryaŋasi ka nyekuryaka erae kepotu ŋican.

¹⁷Ŋatameta ŋuna eya inapakina neni a ituŋanan a ŋini apiiryanan, ikwaan ka ibore ŋini itedelesesi arwatata kibusyar.

¹⁸Ŋawuasin ŋuna ewuatae nakiboisyo ŋuna aoyak, nyepedorete akiwo egogoŋ apaki ŋina ekutunia ekuwuam; aŋun, ŋatameta ŋuna ekuryaka ŋuna eyakar ibaŋaanot, nyiturubakinete ituŋanan ŋin eŋirikinit apaki ŋina ka akisicanio. Akiturubakin akoneo

¹⁹Ituŋanan ŋini icumi akoŋu, itolomuni ŋakiyo ka ŋini icumi eliŋa, isileereuni ŋuna eya tooma keŋ.

²⁰Ituŋanan ŋini imasari amoru lokyeny, esuri ikes toporosi nariet, ŋini itoŋoi ekone keŋ, emunaari akoneo.

²¹Tari kiut iyoŋ ekileŋ kon anakuraro aŋuna icamitor akiar ekone, nyikikadanak, anerae eyakaun ŋuna kitiya ekaku.

²²Ani kilimu iyoŋ ŋuna aronok itoroniyarit ekone kon, nyiyaloloŋ, anerae ipedorete iyes acamun nabo. Nai aŋuna ka akitoŋoyenen, ajamuwarit, alimonor ŋuna imunono, kori araakau ŋini nyikikinyomitae, itorotokinete ŋun ekone aneni kon.

²³Toryamu akikinyoma aneni a ikidunyet kon anakulyako keŋ, ikotere ilelyanete iyoŋ ka iŋes anapaki a ŋina ebaritor iŋes. Torubak irukito ka iŋes anapaki a ŋina a ŋican keŋ, ikotere imorete iyoŋ ka iŋes ŋiboro apaki ŋina eruworotor ŋulu keŋ.

²⁴Eure ka akim ka apuru isyaunete alomun alokitet eriŋa akim, aŋun, ŋiyany isyaunete eriŋa nyebukoro ŋaokot.

²⁵Nyekerumito ayoŋ ŋileec aŋuna ka aikin ekone, ido nyaŋopi ayoŋ eŋolikini iŋes.

²⁶Nai ani kebu awana neni kaŋ aŋuna keŋ, ŋini daadaŋ iirari ŋun ecoikini aruwor ekone keŋ. Akilip ŋina ikiŋarakini tojoŋo asecenen.

²⁷Ŋae egolokini akituk kaŋ kiwuak akipucet lopon kaŋ, ikotere ayoŋ nyaryamu ŋican aŋuna a erwor kaŋ ka ikotere nyakamunaiya ayoŋ aŋajep kaŋ?