Read ngakarimojong Sir 23 Bible Online

Sir 23 - ngakarimojong bible

Sir 23

¹Okoe Ekapolon, Papa ka Ekapolon ŋolo ka akiyar kaŋ, nyikimyek ayoŋ edupor anakiro kaŋ ka nyikimyek ayoŋ aryamuni ŋican a ŋuna a erwor kaŋ.

²Ŋae epedori alemun ŋadase todaya ŋatameta kaŋ? Ŋae epedori akitatam ŋatameta kaŋ ŋakiro ŋuna ka aosou? Ikotere nyakaesikin ayoŋ etiyae ŋuna nyiyookino, ido ojamak akiyenen ŋasecisya kaŋ.

³Acepaki elalata ŋadyakanareta kaŋ ka elalata ŋasecisya kaŋ, omunaar ayoŋ alokiŋaren ŋimoe kaŋ, ido tolelyana ŋimoe kaŋ aŋuna ka amunaar kaŋ.

⁴Okoe Ekapolon, Papa, Akuj ŋina ka akiyar kaŋ, nyikicamak ayoŋ aruwor ŋini etopolooro bon

⁵ka tolema aneni kaŋ ekibure ŋolo aronon.

⁶Nyicamak adakanu, kori ekibure ŋolo aronon akareuni ayoŋ, nyikiinak ayoŋ neni a ekibure a ŋolo a ŋileec. Akiyokiunit aŋajep

⁷Topupokisi ŋidwe kaŋ ŋakitatameta ŋuna a epite a ŋolo a erwor, ituŋanan ŋini iwuapakini nu, nyikamunio aŋuna a erwor keŋ.

⁸Iloununuyo ŋikasecak anakiro a ŋuna elimununuyete ikes ŋilopeyek. Ikamununuyo ŋikasecak ka ŋiketurok anakiro a ŋuna irworosi ikes.

⁹Nyitanaikinit akituk kon akikoŋ, kori nyinaikinit alimunun ekiro ŋolo ka Akuj a ŋina asegan;

¹⁰anerae ikwapei iraakar iyoŋ eketiyan ŋolo ikiteo a ŋinapaki, nyibucar iyoŋ aryamun ŋaruma. Aŋun, ituŋanan daadaŋ ŋini jwi jwi ikoŋi ka ŋini elimit ekiro ka Akuj, nyitesegunio anasecit.

¹¹Ituŋanan ŋini ikoŋi ŋakikoŋieta ŋuna alalak, ileleba ŋasecisya neni keŋ, ido nyeesikinio ekal keŋ nyisicana. Ani kikoŋi iŋes edyakarit, idoŋi asecit keŋ neni keŋ; ani kejamaki iŋes ŋun, iatakin ŋasecisya keŋ; ani kikoŋ iŋes ŋuna ka alyokon, nyituruworyo iŋes ŋini iyookino, anerae eryamuni ekal keŋ daadaŋ ŋican. Akirworo ŋuna aronok

¹²Eyai epite ŋolo irworore ŋolo isikwaanitae ka atwanare; kerae ca nyeryamun erwor ŋol aloletok a Yakob! Emaikina ŋipitesyo ŋul elwaka aneni a ŋulu iwuapito ŋuna ka Akuj, ido nyecamakinete ikes ŋasecisya potu neni kec.

¹³Nyitanaikinit akituk kon akirworo inyunyura ka erwor ŋolo aronon, anerae eyakasi lorwor kon ŋakiro ŋuna ka asecit.

¹⁴Totamunite papa kon ka toto kon apaki ŋina iboikinor iyoŋ neni iboiyoto ŋikapolok, acepaki ikimuryakini iyoŋ atemar ataŋae ikiboiyo a nen, ido kitiya ikwa ibaŋaanot alopitesyo a ŋulu nyejokak, ido ekaku toomomo atemar kerae bo nyekedounitoe daŋ ka togeu akicen akoloŋit ŋina ikidounere iyoŋ.

¹⁵Ŋituŋa ŋulu enaikinito akirworo ŋakiro ŋuna a ŋiyany, nyitatamun jik toriŋa ca ikes eyarete. Asecit ŋina ka akiryamanakin a ŋikilyok ka ŋaberu

¹⁶Ŋituŋa ŋiarei ikes ipitunete ŋasecisya, ido ŋini a ŋiuni eryamuni anyunyura. Erae ekibure ŋolo erirae ikwa akim iŋes nyituduŋeneneo akitodol ŋina eduŋeo bon. Ituŋanan ŋini iryamakin ka apese ŋina erae ayenet keŋ nyejoŋoe akitiya ŋun akitodol ŋina earya ekibure ŋol iŋes.

¹⁷Ituŋanan ŋini ikoni nen, iburito iŋes ŋapesur daadaŋ; nyeupi iŋes akitiya ŋun akitodol ŋina etwania.

¹⁸Etami ituŋanan ŋini nyikinyomit aberu keŋ ebala, “Ŋae mono ekete ayoŋ? Ekemukorit ayoŋ akiryonut, akawuato ayoŋ ŋarwatatain ka emam ituŋanan ekete ayoŋ; kaanukiro emaikina akabulit ayoŋ? Nyetamuni Akuj ŋina alokidiama nooi ŋasecisya.”

¹⁹Eyai akuryanu a ituŋanan a ŋin lotuŋa ŋulu epedorete akiŋolikin iŋes; nyeyeni iŋes atemar ecayete ŋakonyen a Ekapolon ŋarwa ŋalipyo ŋatomon akilo tari neni ecaya akoloŋ, iteete ŋakonyen keŋ ŋakiro daadaŋ ŋuna itiyae ituŋanan aŋuna a ŋipitesyo keŋ, iteete tari neni elosi ituŋanan adukya.

²⁰Eriŋa ibore daadaŋ nyesubuna, ayeni Akuj ibore daadaŋ, aŋun, eyeni iŋes ŋinibore ŋinapei anakisyakinet.

²¹Isicanio ituŋanan ŋin alorotin a ŋulu ke etaun ka aneni sek nyetamakinit iŋes atemar ekekamunere.

²²Ikote nenipei ŋakiro aŋuna ka aberu a ŋina eesikini lokile keŋ, ido ya ikoku a ekile a ece neni alokile keŋ.

²³Ŋina esyaunan a daadaŋ, nyiwuapa iŋes ŋikisila ŋulu ka Akuj a ŋina alokidiama nooi; ŋina a ŋaarei, etiya iŋes ŋuna nyiyookino neni alokile keŋ. Ŋina a ŋauni, aŋuna eryamakinotor iŋes ka ekile ece, aruwor iŋes akaloman ka aurununu ŋidwe ŋulu a ekile a ece.

²⁴Eyaunio iŋes alope kiŋaren atukot, ido edoli akisicanio keŋ tari lodwe keŋ.

²⁵Nyerubakinete ŋidwe keŋ eyakasi, nyepitunete ŋiletok keŋ.

²⁶Eesikini iŋes alokaku keŋ ŋakiro keŋ ŋuna a ŋilam etamunitae ka nyimuryakin ŋuna ka amamukau ajokis aneni keŋ jik.

²⁷Ŋituŋa ŋulu eyarete aloletok keŋ, eyenunete atemar emam ibore ejok akilo akitopoloorit Ekapolon ka emam ibore ebob akilo akiwuapit ŋakiciketa a Ekapolon.