Read ngakarimojong Sir 24 Bible Online

Sir 24 - ngakarimojong bible

Sir 24

¹Akipuro ŋina ka aosou Ipuro aosou bon ka irworo ŋuna ka apolou keŋ alokidiŋ ŋikeetuŋa.

²Alotooma atukot ka Akuj a ŋina alokidiama nooi, irworikini iŋes, ido alokiŋaren ŋulu ijaunete iŋes, elimori iŋes ŋuna ka apolou keŋ nu ebe,

³“Abu ayoŋ olomu anakituk ka Akuj a ŋina alokidiama nooi, ido abu orapuwa akwap lopite ŋolo erapuwarya ekuno.

⁴Abu ayoŋ eboi alokidiama nooi, ayai ekicoloŋ kaŋ ŋolo ka apolou lodou ŋolo asipo ikwa epir.

⁵Abu ayoŋ bon erim alosi alokidiama ka abu erim alosi anakibois a ŋina eyai kwap ŋakipi ŋuna ka anam.

⁶Abu ayoŋ epuka akimorokok a ŋakipi ananam ka abu epuka akwap daadaŋ, abu ayoŋ epuka ŋituŋa daadaŋ ka abu epuka akwap, ido adau aryamun apedor ŋinakipukaet.

⁷Alotooma ŋun daadaŋ, abu ayoŋ ewar akibois ŋina kieŋunet, nakibois a ŋae apedorya ayoŋ akiboiyo jik?”

⁸“Abu nai akasuban a ŋiboro a daadaŋ okoinak ayoŋ akiciket, ido abu akasuban kaŋ toseu akibois aŋuna ke eema kaŋ. Okolimok ayoŋ tema, ‘Kiboi aneni a Yakob, toryamu akibois kon alo Isirael.’

⁹Abu Akuj okosub ayoŋ koloŋ sek eriŋa nyisyakina ibore ido, ido arubakini ayoŋ ayai tari ŋikaru ka ŋikaru.

¹⁰Abu ayoŋ etiya aŋuna ka Akuj alokiŋaren keŋ aloeema keŋ a ŋolo asegan, aŋun, aponi ayoŋ ekewuakin Sion.

¹¹Aŋun, abu Akuj okoinak ayoŋ akibois ŋina kieŋunet alotaun a ŋolo amina iŋes, ido abu Yerusalem toruwor neni epukat ayoŋ.

¹²Abu ayoŋ odupakin neni a ŋituŋa a ŋulu etopolooritae, lotuŋa ŋulu abu Ekapolon toseu erae ŋulu keŋ.”

¹³“Abu ayoŋ eleŋor a nen ikwa ŋikito a cedar ŋulu eya Lebanon ka ikwa ŋikito a cipres ŋulu eya nauni a Erimon.

¹⁴Abu ayoŋ eleŋor a nen ikwa edukanit ŋolo eyai En-gedi ka ikwa ŋamoni ŋuna a ŋatur ŋuna eya Yeriko; ikwa ekitoe ŋolo ebusan ŋolo ka olipa alomanikor ka ikwa ekitoe ŋolo elomunit anadipo alodiyete ŋakipi.

¹⁵Abu ayoŋ oinak eure ŋolo akukunyon ikwa ŋikukwa a ekitoe a Akasia ka Kamel ka ikwa aseunet a eminai a ŋolo akukunyon, ido abu eure kaŋ toupia nen; ikwa Galibanum, Onika ka Resin ka ikwa eure a ekinyate a ŋolo eyai loeema a Ekapolon.

¹⁶Abu ayoŋ opeta ŋaten kaŋ ikwa ekuyon ka erae ŋaten kaŋ ŋuna epolok nooi ka ŋuna ajokak nooi.

¹⁷Abu ayoŋ etilijau ŋatalijei ŋuna ikijoikinete nooi ka apotu ŋatur kaŋ kibusyata nooi toraut ŋaraito ŋuna alalak nooi. [12]

¹⁹“Potu neni kaŋ iyes ŋulu ikiitanito ayoŋ, ido kimuja ŋaraito kaŋ kimwoko;

²⁰anerae atamunit ayoŋ, ebob akilo ao ka akituruwor ayoŋ ŋini kon, ebob akilo ŋakap ka ao.

²¹Ŋituŋa ŋulu eyarikinito neni kaŋ ikwa akimuj kec, erubakinete ecamito akiatakin ayoŋ neni kec ka ŋulu eyarikinito neni kaŋ ikwa ŋimaten kec, erubakinete ecamito akiatakin ayoŋ neni kec.

²²Ituŋanan daadaŋ ŋini iwuapi ŋuna kaŋ, nyisurumyo ŋileec ka ŋulu ikitiyae ka ayoŋ, nyesecete.” Aosou ka ŋikisila

²³Erae nu daadaŋ ŋuna ke ekitaabo a ŋolo ka acamunet a ŋina ka Akuj a ŋina alokidiama nooi, ŋikisila ŋulu abu Moses itolimok iwon ikwapei ibore ŋini emaikina eruwor ŋini a ŋatukon a ŋiletok a Yakob.

²⁴Eleleunit aosou alokisila a ŋul ikwa elelya a aŋolol Pison,

²⁵Eleleunit aosou alokisila a ŋul ikwa elelya a aŋolol Tigris apaki ŋina a ŋaraito a ŋuna esyaunak.

²⁶Elele aosou ilapit ikwa aŋolol Eupurate ka eyakar ayenut, eleleunit lopite ŋolo elelyaa Yorodan apaki ŋina elemere.

²⁷Ebukunit aosou ŋakitatameta ikwa aŋolol Nile, eleleunit ikwa elelya a aŋolol Gion apaki ŋina elemere ŋaraito a epiini.

²⁸Pa ayeni ituŋanan ŋini esyaunan aosou ejok, tari ŋini esidyon daŋ nyeyenuni aosou ejok nooi,

²⁹anerae elalak nooi ŋatameta ŋuna ka aosou akilo tari ŋakipi ananam, epolok nooi ŋakiro ŋuna iryamuni anaosou edeparito tari auwuat ŋina ecukul nooi.

³⁰Ani eruwor ayoŋ, ekoni ayoŋ akitelosit ŋina eyaunit ŋakipi anaŋolol, ekoni ayoŋ akitelosit a ŋakipi a ŋuna elelyarito lomanikor.

³¹Abu ayoŋ otema, “Ewuakini ayoŋ ŋakipi lomanikor kaŋ, acilakini ayoŋ ŋakipi lomanikor a ŋatur kaŋ.” Aŋun, abu akitelosit toruwor aŋolol, ido abu aŋolol kaŋ toruwor anam.

³²Etacauni ayoŋ nabo ŋakitatameta ikwa abaet, esileereuni ayoŋ ikes toanyuwarae tari aneni alwanan.

³³Abukuni ayoŋ nabo ŋakitatameta kaŋ ikwa ŋakiro ŋuna edwario, ido emyek ikes toruwor ŋuna a ŋanyameta a daadaŋ a ŋuna eponito.

³⁴Toyenutu atemar nyitiya ayoŋ aŋuna kaŋ bon, nai aŋuna a daadaŋ a ŋulu iwarito aosou.