Read ngakarimojong Sir 26 Bible Online

Sir 26 - ngakarimojong bible

Sir 26

¹Alelyanu a ekile aŋuna a aberu a ŋina ajokan Elakara ekile ŋolo eyakar aberu ŋina ajokan; iatakinio ŋirwa ŋulu ka akiyar keŋ.

²Eyauni aberu ŋina ikinyoma alelyanu neni alokile keŋ, ido irikakini ekile keŋ ŋikaru ŋulu a akiyar keŋ a ekisil.

³Erae aberu ŋina ajokan arereŋu ŋina apolon nooi; iteryamunio iŋes ŋarereŋisyo a ekile a ŋolo itopoloorit Ekapolon.

⁴Tari kebarit kori kekulyakana ekile ŋol, elakara iŋes alotau keŋ ka emaisyani ereet keŋ ŋisaae daadaŋ. Aronis ŋina aronon akilo iŋes aberu ŋina aronon

⁵Erae lu ŋiboro ŋiuni ŋulu itukuryanete etau kaŋ ka ŋini a ŋiomwon ŋini akerit ayoŋ nooi: Akiyanyanar alotaun, acunanakin ayeun aruruma ka akisitanakin ŋina ka alyokon, eroko ŋun daadaŋ akilo atwanare.

⁶Nai ani kelilit aberu aŋuna a nakain keŋ, eyakar iŋes aryeba ka akiyaloloŋ lotau keŋ, ido eyenunete ŋituŋa daadaŋ aberu ŋin aŋuna a ebura keŋ.

⁷Ikoni aberu ŋina aronon ayokot ŋina apoton ŋimoŋin, akikamun iŋes ikoni akikamun ekiitwan.

⁸Itolomununui aberu ŋina ameran aŋoit ŋina apolon, nyimunoni iŋes ŋikeleec.

⁹Akitopolooro bon, erae ibore ŋini emunaari aberu ŋina nyiyokuuno bon anakiyar keŋ, idupori iŋes akibuses a ŋakonyen keŋ.

¹⁰Kitee ejok ikoku ŋinipese ŋini itogogoŋit akou, acepaki keryamu iŋes apaki ŋinakitiyaet aronis, epedori akisitiya apaki ŋin.

¹¹Kitee ejok ŋakonyen keŋ ŋuna esuparak ka nyiumok erae kitiya iŋes ŋuna aronok neni kon.

¹²Lopite ŋolo eŋaarya ekaloton ŋolo enyamit akure akeekituk, tomat ŋakipi ca daadaŋ ŋuna eya diyete keŋ, aŋun epedori aberu ŋina aronon akiboikin kiŋaren asesit a ŋoloema daadaŋ, ido kidareu a nen ekile ca daadaŋ ŋolo ebuni neni keŋ. Arereŋu aŋuna ka aberu a ŋina ajokan.

¹³Italakari akibuses a aberu lokile keŋ ka itumi apiiryanut akuwan a ekile keŋ.

¹⁴Erae aberu ŋina eliliŋan ainakinet aneni ke Ekapolon ka emam ibore ejok ŋini iloit ŋipitesyo keŋ ŋulu ka apatanu.

¹⁵Aberu ŋina etyamaana, iyasi akibuses nakibuses keŋ ka emam akipimet ŋina ipimunere etyae ŋolo ka atyamaara keŋ.

¹⁶Ikoni akibuses a aberu a ŋina ajokan a ŋina esubakinit ere keŋ ejok, akoloŋ ŋina elomuni alokidiama ŋimoru ŋulu a Ekapolon.

¹⁷Lopite ŋolo enepya etaa anawoyet a ŋina asegan, ikoni nenipei ereet ŋolo ka aberu a ŋina ajokan.

¹⁸Lopite ŋolo eyakatar ŋipirin ŋulu a egolid nawoeta ŋuna a esilipa, ikote nenipei ŋakejen ŋunadiryae ŋuna nyiryaŋiryaŋasi ŋuna ka aberu a ŋina ajokan.

¹⁹Ikaakoku, kiturubak asoroko kon erae ŋina ejokya akuwan kon ka nyiinak akonigogoŋu neni a ŋigelaanotin.

²⁰Kiwaru anadipo a daadaŋ emanikor ŋolo etaroko ŋalup, ido todupak nen ekinyomit kon a ilope; kikinyomite ŋikinyom kon a ilope.

²¹Aŋun, epitunete ŋiletok kon ikinyomito eyakae a ŋikauruunak kec epolounete ikes erae ŋulu itopolooritae.

²²Itete ŋituŋa amalaat ikwaan ka akimulat ŋina emwaar, ido ikwaan aberu ŋina iisitae aneni a ŋulu eminasi iŋes ka aduketait ŋina aoyan ŋina ikiari keritakin.

²³Einakinio aberu ŋina emam ayenut Akuj neni a ekile a ŋolo nyiwuapit ŋikisila, nai einakinio aberu ŋina einakina neni ka Akuj neni a ekile a ŋolo itopoloorit Ekapolon.

²⁴Itiyae jwi jwi aberu ŋina nyirumeneneete ŋileec ŋakiro ŋuna nyejokak, nai aberu ŋina ajokan a ŋipitesyo, nyepedori tari akitiya ŋuna a ŋileec alokiŋaren ekile keŋ.

²⁵Itusubunitae aberu ŋina agogoŋon a akou aŋok, nai ŋina ecoit aryamun ŋileec, itopoloori Ekapolon.

²⁶Aberu ŋina itopoloorit lokile keŋ, ileereuni erae ŋina eos aneni a daadaŋ, nai ani pa kitopoloo iŋes lokile keŋ, alotooma akituro keŋ, eyenunete ŋituŋa daadaŋ iŋes erae ŋina nyiwuapit ŋuna ka Akuj. Elakara ekile a aberu a ŋina ajokan; ido iatakinio ŋikaru ŋulu ka akiyar a ekile a ŋol.

²⁷Aberu ŋina ecelana ka kiburana, ikoni arupepe ŋina ekutakinio akitaŋatakinia ŋituŋa ajiore ka ituŋanan ŋini eyari alopite a ŋol, iboi elemarit aŋuna ke ejie. Ŋiboro ŋiuni ŋulu ikisiyaloloŋete

²⁸Eyakasi ŋiboro lu ŋiarei ŋulu isiyaloloŋete etau kaŋ ka aŋuna a ŋini a ŋiuni, aŋoyenene ayoŋ: Ekajion ŋolo eyakar akiitanit alotooma keŋ, ŋikilyok ŋulu apiiryanak ŋulu ejamuwaritae ka ituŋanan ŋini eesikini akitiya ŋuna ka akiyookino kitiya asecit, itemokini Ekapolon ituŋanan ŋin aŋuna ke ekileŋ. Ŋakitemyeta ŋuna ka amucuruso

²⁹Nyepedori emucurus akitiya ekeetic emam akitiya ŋuna nyiyookino, kori nyebucar ekagyelanaran anakitiya asecit.