Read ngakarimojong Sir 28 Bible Online

Sir 28 - ngakarimojong bible

Sir 28

¹Eryamunete ŋikenyaŋak akinyaŋaro aneni ke Ekapolon, anerae imarit Ekapolon ŋasecisya daadaŋ ŋuna itiyato ikes.

²Kisyoni ikidunyet kon aŋuna ka adyakaret a ŋina itiyat neni kon, ido ikisyonio iyoŋ aŋuna a ŋasecisya kon apaki ŋina ilipya.

³Eyai mono ituŋanan idio ŋini ililiŋia aŋoit aŋuna a ŋinice, ido kiitanite akitaŋaleuno aneni ke Ekapolon a?

⁴Ani pa keyakar ituŋanan akisyon ituŋanan ŋinice ŋini ikwaan ka iŋes, epedori nai iŋes akiwarit akisyonio aŋuna a ŋasecisya keŋ a?

⁵Ani kerubaki ŋini erae ituŋanan koŋin iricit anyunyura, ŋae nai elemuni amuronot aŋuna ka amookuno keŋ aŋuna a ŋasecisya keŋ?

⁶Totamunite apaki ŋina esalunia akiyar kon, ido tolema aneni kon akimanit ŋuluce, totamunite ŋuna ka atuna ka atwanare, ido torae ŋini a kire anakiwuapit ŋakiciketa.

⁷Totamunite ŋakiciketa ka nyiŋoik ikidunyet kon, totamunite acamunet kon ka Akuj ŋina alokidiama nooi, ido nyimitak ŋadyakanareta kon.

⁸Toesik ŋipegeta, ido ekudyokunete ŋasecisya kon; anerae isinepi ituŋanan ŋini apegan nooi epeget.

⁹emunaari ekasecan akoneo, ido eekini iŋes atyakatyaka neni a ŋulu iboiyete ke ekisil.

¹⁰Enepi akim alotyae a ŋolo eyakatar ŋakito, iatakin epeget daŋ alotyae a ŋolo epeganakinotor ŋituŋa; iata aŋoit a ituŋanan alotyae a ŋolo ka agogoŋu keŋ ka lotyae a ebari keŋ iŋes iatar anyunyura keŋ.

¹¹Eyaununui ebura ŋolo iburuburakinitae ejie, ido eyaununui epeget ŋolo iburuburunitae atwanare. Aŋajep ŋina aronon

¹²Ani kitulek iyoŋ ekatyenyityenyit a akim, enepuni, ani kimwaak iyoŋ ŋakimul neni keŋ, eduŋe; torae bo nakituk kon elomunitotor ekuwuam ka ŋakimul.

¹³Kilama ŋulu irworotor ŋuluce ka ŋulu itojokasi alorwor kec, anerae emunaarito ikes ekisil a ŋikalalak.

¹⁴Etukuryan akinyaŋanar ŋikalalak, ido elielaya ikes anakwap ka apei ka a ŋinace daŋ; amunaa akinyaŋanar ŋitaunio ŋulu agogoŋok, eeliel ŋakais a ŋikapolok.

¹⁵Etodoonok akinyaŋanar ŋaberu ŋuna ikinyoma alorerya kec ka etoŋopia ŋiboro ŋulu ajokak ŋulu itiyato ikes.

¹⁶Nyeryamunete ŋulu ebobokinit akinyaŋanar akieŋun, kori nyiboikinosi ikes ke ekisil.

¹⁷Itonyouni aramat a adaset amuny a akuwan, nai inyaadiyari akirot ŋina aronon ŋina elimuni ituŋanan ŋakoyo a akuwan.

¹⁸Amunya ŋikalalak ekileŋ, nai nyelalak ŋul akilo ŋulu amunya aŋajep ŋina irworo ŋakiro ŋuna aronok.

¹⁹Erereŋ ituŋanan ŋini iretakinit aŋajep keŋ anakirworo ŋuna aronok, ŋini nyeyakauna naŋoit ŋina ka aŋajep, ŋini nyetapa ŋican ŋulu eyauni aŋajep ka ŋini nyeena aŋuna a ŋakiro a ŋuna irworo iŋes;

²⁰anerae erae ŋakiro ŋuna ka aŋajep ŋuna egogoŋ ikote asuwat ka egogoŋ ŋakiro keŋ ikote ŋiriko ŋulu itiyaunitae a eburonis.

²¹Erae atwanare keŋ atwanare ŋina ka asecit ka nakibois a ŋikatwak iŋes emaikina yae aŋajep.

²²Emamukar aŋajep apedor aneni a ŋulu iwuapito ŋuna ka Akuj, nyicunyaryo ikes a arira a ŋina a aŋajep.

²³Elomarete napedor ŋina ka aŋajep ŋulu eesikinete Ekapolon; itirirauni aŋajep ŋakiro daadaŋ alokidiŋ kec ka nyililiŋiyarete ŋakiro ŋun aneni kec, eryetarete ŋakiro ikes lopite ŋolo eryetarya eŋatuny ibore, enyilinyiliyarete ŋakiro ikes lopite ŋolo enyilinyilya eris ibore.

²⁴Ikwa iwua iyoŋ a ŋikukwa ŋiboro kon, aŋun, kitiyau epuke ka egoliet ŋolo ka akituk kon.

²⁵Ikwa igolokinitor iyoŋ esilipa ka egolid kon nibore idio, aŋun, toyenu epite ŋolo irworor iyoŋ.

²⁶Tocoikinite nyikitedyaka aŋajep kon, ido toloma neni a ŋini idarit atemar todyeka iyoŋ alorwor kon.