Read ngakarimojong Sir 29 Bible Online

Sir 29 - ngakarimojong bible

Sir 29

¹Ainakin mono ka akisideniyor Einanakinete mono ŋulu esyoniok ibore neni a ŋikidunyet kec; anakiŋaranakin kec ŋuluce, iwuapito ikes ŋakiciketa.

²Inak mono ikidunyet kon ibore anapaki a ŋina iitanitor iŋes; totac ikidunyet kon edoli apaki ŋina icamunito iyes.

³Kiricakinite ŋuna ibu iyoŋ kikoŋ, ido kirworo ŋuna a kire aneni a ŋini iikinit iyoŋ, iryamuni iyoŋ a ŋinapaki ibore ŋini iitanit.

⁴Nyemitakinito ŋikalalak eden erae ibore ŋini emaikina totacae, ido iteryamunito ŋulu apotu kiŋarakis ikes ŋican.

⁵Ibaanakini ipei ŋinice ŋakan tari ŋina isidenikinere iŋes ibore, ido irworo iŋes itopoloorit ikidunyet keŋ aŋuna a ŋisiliŋa keŋ; nai ani edoli apaki ŋina ka akitac eŋeli iŋes akitac ka irwori iŋes ŋakiikineta ŋuna ka alyokonu, ido irwori ŋuna ka alyokonu ikotere iŋarakinio apaki ŋin.

⁶Ani kepedori iŋes akitac, nyeryamuni ekesideniyoron keŋ tari ŋina erae anus a ibore a ŋini edeniyorit iŋes ka ejamuwari iŋes ŋakiro ŋun erae ŋuna ka alyokonu. Ani pa ketac iŋes, adema iŋes ŋini esidenikini iŋes ŋisiliŋa keŋ ka eturuwo iŋes ŋin ekeemoit pa ecamakina; ido eruwor iŋes ŋini icenio ka ŋini iyanyio, akilo akitopolooro.

⁷Eŋerito ŋituŋa ŋulu alalak akisidenikin ŋinice ibore meere aŋuna eraakatar ŋulu ewounitotor ŋikeceboro, nai aŋuna ka akuryanu amodianakino ŋina nyemaikina itiyao.

⁸Kikote neni daŋ, toyakatar akiyapara neni a ŋulu ekulyakaka ka nyimyek ikes ikidarito iyoŋ kiŋarak ikes.

⁹Aŋuna a ŋakiciketa, kiŋarak ŋikulyak ka anakiitanit kec, nyirita ikes eororete ŋakan.

¹⁰Kipoto esilipa kon aŋuna alokaato, kori aŋuna ke ekone ka nyimyek ikes iroiroi alokwap amoru, ido tocakar.

¹¹Kisitiya ebari kon lopite ŋolo ecamakinitotor ŋakiciketa ŋuna ka Akuj a ŋina alokidiama nooi, ido ikiteryamunete iyoŋ ŋun ŋuna ajokak akilo akiŋadat ŋisiliŋa kon.

¹²Kiŋada ŋiboro kon aŋuna ka ainakin neni aŋikulyak, ikiunete iyoŋ ŋun alotooma ŋulucan daadaŋ.

¹³Ejokyata ŋun aneni kon akilo aupal ŋina ebutur ka akwara ŋina agogoŋon, ikiŋarakinete ŋun iyoŋ, itiyaete ŋimoe kon aŋuna kon. Ŋuna ka ainanakin eden

¹⁴Epedori ituŋanan ŋini ajokan aruwor ŋini ewoi aŋuna a ikidunyet keŋ, nai iŋes ŋini aesiki ŋuna ka ayenut ŋuna a ŋileec, nyiŋarakini ŋinice.

¹⁵Nyikimuryak arimao a ŋini abu towo aŋuna kon, anerae abu iŋes tojal akiyar keŋ aŋuna kon.

¹⁶Epedori ikasecan akicanican ŋiboro a ŋini abu towo aŋuna keŋ,

¹⁷ido ituŋanan ŋini nyelakanar neni a ikaiunan keŋ, eesikini ikaiunan keŋ.

¹⁸Etukulyakan ŋituŋa ŋulu alalak akiwo aŋuna a ŋidenio a ŋuluce, ido esiguryak akulyako ikes lopite ŋolo iguryatar ŋikaguragurae a ŋakipi ananam. Erita ŋulu eyenete akisirwor ŋuluce nakwapin ŋunagelae, ido irimito ikes anakwapin a ŋunagelae.

¹⁹Ebuni ikasecan akisiyaloloŋ ŋinice aŋuna ka atemar towoikinae, ŋuna elosikinit ikasecan erae aryamun epoida, nai elomari natubokino.

²⁰Kiŋarak ikidunyet kon alopite a ŋolo ipedorya iyoŋ a daadaŋ, nai tocoite nyiloma iyoŋ locan. Ere ka akijaunun ŋipeyok

²¹Ŋiboro ŋulu iitanit akiyar ikes lu: ŋakipi, akimuj ka ŋilowi ta daŋ akai aŋuna ka akitiyaa ŋuna icamit iyoŋ bon ilope.

²²Ejok akiyar a ikulyakit erae keperi tari kai ŋina enyamuna kidiama akilo akiramiram akimuj ŋina ajokan alokai a ŋinice.

²³Kimwonikina a ŋini edit kori a ŋini elal, ido nyiirari iyoŋ ŋiyany aŋuna iraakar ipeyonon.

²⁴Erae akiyar ŋina a ŋican akirimit anakais a ŋituŋa, ikwapei ipeyonon, nyemaikina italalat ŋakiro ŋuna irworo;

²⁵epatana iyoŋ akijaun epeyonon inak ŋakipi, ido emam ŋini etemari neni kon alakara, meere ŋun bon, nai iirari iyoŋ ŋakiro ŋuna ikote nu:

²⁶“Bua laalo, igelaanot, kitemok akimuj lomesa, acamit ayoŋ akimuj ŋina iwuak iyoŋ nen.

²⁷Tolot, igelaanot, anerae eyai epeyonon nege ŋolo itopolooritae; abu lokaato kaŋ akipeyon ayoŋ ka eitanit ayoŋ agule ŋina a ŋipeyok.”

²⁸Nyepatana ituŋanan ŋini eyakar ŋatameta akidaŋidaŋ ŋakiro nu, akiŋenyanakino aŋuna aneniperot ka akiyenyo aneni a ŋulu ideniyonorete ŋisiliŋa.