Read ngakarimojong Sir 3 Bible Online

Sir 3 - ngakarimojong bible

Sir 3

¹Ŋiticisyo ŋulu emaikina kitiyae neni a ŋikauruunak Okoe ŋidwe, topupokinae ayoŋ papa kus; kitiyata lopite ŋolo emaikina itiyaata, ikotere toyara irae ŋulu iuna.

²Itopoloorit Ekapolon papa alodwe keŋ. ido itogogoŋiyorit ŋapedorosyo a toto alodwe keŋ.

³Emookun anasecisya kec ŋulu itopoloorito papa kec,

⁴ido ŋulu itopoloorito toto kec, ikwaan ka ŋulu idyasete ebari kec.

⁵Eryamunete ŋulu itopoloorito papa kec alelyanu alodwe kec a ŋikulepek, ido ani apaki ŋina ilipyata ikes, iiraryo ŋuna ilipasi ikes.

⁶Eryamunete ŋulu itopoloorito papa kec akiyar ŋina aoyan, ido ŋulu itopoloorito toto kec iwuapito ŋuna ke Ekapolon;

⁷itiyanakinete ikes ŋikauruunak kec ikwapei ŋikapolok kec.

⁸Kitopoloorite papa kon anakiro a ŋuna ilimuni iyoŋ ka aloticisyo a ŋulu itiyae iyoŋ, ikotere ebuni arereŋu neni kon.

⁹Itogogoŋi akiterereŋiet a papa ŋikalya a ŋidwe, nai elemarete ŋilam a toto ŋipitesyo a ŋidwe ŋinapei anakisyakinet.

¹⁰Nyitopoloor bon aŋuna ka ajamuwarya papa kon, anerae ani pa itopoloorit iyoŋ papa kon, nyiruwor iyoŋ ŋini ipol.

¹¹Akitopoloorit papa kon iŋes iruworor ŋini ipol ka erae amamu ajokis aneni a ŋidwe amamu akitopoloorit toto kec.

¹²Ikaakoku, kiŋarak papa kon alorwa a ŋulu ka amojoŋu keŋ, ido nyisiyaloloŋi iŋes eriŋa ca iŋes eyari;

¹³tari kejoŋo iŋes atamatam, totitinyik aŋuna keŋ; anerae iyakar iyoŋ daadaŋ ŋuna emaikina kitiya neni keŋ, nyijamuwa iŋes.

¹⁴Nyimuryakin arimao ŋina itiyae iyoŋ neni a papa kon, ido ikiŋarakini iyoŋ akiya ŋasecisya kon.

¹⁵Etamuni Ekapolon arimao ŋin aŋuna ka akiŋarakin iyoŋ anapaki a ŋina iryamunitor iyoŋ akiyaloloŋ, epuripuryaar ŋasecisya kon lopite ŋolo epuripuryaaror ekuno ibusuuni akoloŋ,

¹⁶ŋini daadaŋ imyekini papa keŋ, ikwaan iŋes ka ŋini iyanyi Akuj, ido ŋini daadaŋ itoŋoi toto keŋ, erae iŋes ŋini icenen aneni a Ekapolon. Akitiditeuna

¹⁷Ikaakoku kitiya ŋuna emaikina iyoŋ kitiya alotooma akitiditeuna; ido ikiminakinete iyoŋ ŋulu adau Akuj acamun.

¹⁸Ani ikitopolooryo iyoŋ, emaikina iyoŋ kikatak akitiditeuna bon; [2]

²⁰epol nooi agogoŋu ŋina ke Ekapolon; nai itopoloorito iŋes ŋituŋa ŋulu itiditeuna make.

²¹Nyiwar aryamun aŋuna kon ŋiboro ŋulu nyepatana aryamun, kori nyimina ŋuna nyerae ŋuna ka apedor kon.

²²Totamatama ŋuna adaun akicikakin iyoŋ akitiya, anerae nyerae ŋuna iwuaitae ŋuna emaikina iyoŋ totamatama.

²³Nyiloma nakiro ŋuna nyipedorit akirwor, anerae adaun ainakin iyoŋ ayenun ŋuna alalak ŋuna edeparito ŋuna emaikina toyenu.

²⁴Aoliyosi ŋulu alalak aŋuna a ŋakiro a ŋuna etamete ikes, ido arapuwasi ŋakiro ŋuna aronok ŋuna etamete ikes epite ŋolo etubioto ikes ŋakiro.

²⁵Ani pa ekyenyete ŋakonyen, emam akica; ani imamukar ayenut, emam aosou.

²⁶Ŋatameta a ituŋanan a ŋini isyaana, eyaunete neni a ituŋanan ŋican ekaku. ido ŋini emina akitiya ŋuna aronok, etwanikini nakitiya ŋuna aronok.

²⁷Ŋatameta a ituŋanan a ŋini isyaana, eruwor ŋuna einakinito ituŋanan ŋin ŋican, ido iyaasi ekasecan asecit nasecisya.

²⁸Ani epote ŋatyokisyo neni a ituŋanan a ŋini eturon, nyieŋari ituŋanan ŋin anatyokisyo a ŋun, anerae adupakin aronis tooma keŋ ikwa ekitoe.

²⁹Itojokito ŋatameta a ipiiryanot ŋakitadapeta, ido erae acamit a ikaoson akiirar ŋakitadapeta irworoe. Ŋainakineta aŋuna a ŋikulyak

³⁰Lopite ŋolo ituduŋeoto ŋakipi arira ŋina ka akim, ikwaaŋinapei, ikimookunete anasecit ŋainakineta neni a ŋikulyak

³¹Ituŋanan ŋini iŋaranakini ŋuluce alotooma arimao keŋ, etami aŋuna a ŋakiro a ŋuna eponito, anerae ani apaki ŋina eryamunia iŋes ŋican, iŋarakinio.