Read ngakarimojong Sir 30 Bible Online

Sir 30 - ngakarimojong bible

Sir 30

¹Ŋuna etapito ŋidwe Ituŋanan ŋini emina ikeekoku, edai iŋes ŋinapaki edyakarya, ikotere elakar iŋes apaki ŋina eesikinia ikoku ŋin akitiya ŋuna aronok.

²Ituŋanan ŋini isicani ikoku keŋ aŋuna adyakarya, eryamuni ŋuna ajokak aneni a ikoku a ŋin ka iturokin iŋes aŋuna a ikoku a ŋin alokidiŋ ŋirukitos keŋ.

³Iŋes ŋini itatami ikeekoku einakini ŋimoe keŋ arakao aŋuna keŋ ka itopolooryo iŋes aŋuna a ikoku keŋ alokonei keŋ.

⁴Ani etwani papa keŋ etakanuni esibit nyetwanit, anerae eesikini iŋes alokaku ŋini ikwaan ka iŋes,

⁵ŋini anakiyar keŋ abu kidar iŋes ka alelyanu ka anapaki a ŋina ka atwanare emam akiyaloloŋ.

⁶Eesikinit iŋes alokaku keŋ ekenyaŋaran keŋ ŋolo inyaŋi ŋakiro a ŋimoe keŋ ka ŋini itiyae ŋuna ka arimao lokonei a papa keŋ.

⁷Ŋini daadaŋ emunaari lokoku keŋ, imadi bon ŋajemei keŋ, ka eryamuni ekeetau ŋican a ŋinakikalounet.

⁸Epedori aŋole ŋina nyitatamitae aruwor ŋina isyaana ka edia ŋolo nyerameneneo epedori aruwor ŋolo egogoŋ akou.

⁹Ani kitacamanik iyoŋ ikoku ikinipori iŋes iyoŋ, tobolyas iyoŋ ka iŋes itacamanikinit, ebuni iŋes akisiyaloloŋ iyoŋ.

¹⁰Nyikenasi ka iŋes itacamanikinit, iryamunete iyoŋ ka iŋes akiyaloloŋ, ido ekaku ikonyakini iyoŋ ŋikyal kon anaryeba.

¹¹Nyiinak iŋes alacakina anasoroko keŋ ka nyijamak ŋadyakanareta keŋ.

¹²Kiurya iŋes nyikeunit akou eroko esorokana, todaai iŋes edyakarit eroko esorokana, acepaki eruwor iŋes ekasyaat ŋolo nyepupi ŋakiro kon, ido iryamuni iyoŋ aŋuna keŋ akiyaloloŋ alotau.

¹³Kitatam ikoku kon ŋipitesyo ŋulu ajokak ka kituruwo egogos keŋ ŋolo apotyon, ikotere nyikitunyunyur iyoŋ a aleecenut keŋ.

¹⁴Ejok araakau ikulyakit toŋalee ka togogoŋ akuwan akilo abarit, ido itotiŋito ŋican akuwan.

¹⁵Ejok aŋaleu ka agogoŋu a akuwan, akilo edio golid ka ejok agogoŋu a akuwan akilo ebari ŋolo nyimarunun.

¹⁶Emam ebari ŋolo ejok akilo aŋaleu a akuwan ka emam alakara ŋina epol akilo alelyanu ŋina ke etau.

¹⁷Ejok atwanare akilo akiyar ŋina a ŋican ka akieŋun ŋina a ŋikaru ka ŋikaru akilo adyaka ŋina erae etoku. Ŋuna etapito akimuj

¹⁸Akimuj ŋina ajokan ŋina iwuakinitae nakituk a ituŋanan a ŋini edyaka, a ŋini nyepedorit akimuj, ikoni akimuj ŋina iwuakinitae kidiama alyal erae ainakinet.

¹⁹Nyo ajokis einakinere amuronot neni a etorube? Nyepedori iŋes akinyam, kori akiŋuun, ikote ŋakiro nenipei aneni a ŋini erae Ekapolon isicani;

²⁰Ite iŋes a ŋakonyen akimuj, ido ieŋa nooi lopite ŋolo ieŋar ekolup apaki ŋina etunakinor neni ka apese.

²¹Nyiinak akonikuwan ŋatameta ŋuna ka akiyaloloŋ ka nyisiyaloloŋio akonikuwan iredakinit.

²²Erae etau ŋolo elelyani akiyar ŋina ajokon alope ka itooyari alelyanu akiyar a ituŋanan.

²³Toruwor ŋini elelyani anakiyar kon, ido toyakar alakar, tolema akiyaloloŋ toeka aneni kon, anerae enyasu akiyaloloŋ ŋulu alalak, ido emam ajokis adio iryamuni iyoŋ anakiyaloloŋ.

²⁴Ituruwanunete alilit ka aŋoit akiyar ka ikirikiriuni atamatam nooi amojoŋ neni kon atipei.

²⁵Eryamunete ŋulu elakara ka ŋulu imujete ebobokinit akimuj, agogoŋu anakimuj kec.