Read ngakarimojong Sir 31 Bible Online

Sir 31 - ngakarimojong bible

Sir 31

¹Epite ŋolo etiŋitere ebari ejok Ituŋanan ŋini etamatamae jik aŋuna ke ebari, einiyari akuwan keŋ ka elemari akiyaloloŋ aŋuna ke ebari ŋajo,

²atamatam jik anakiyaloloŋ, elemari ŋajo ŋuna ajokak ido elemari adyak ŋina apipilan ŋajo.

³Itiyae ekabaran nooi aŋuna ka akitalal ebari keŋ, ido apaki ŋina ieŋunia iŋes, eyakaun lotau keŋ akiyar ŋina ka akileile.

⁴Itiyae ka agogoŋu ituŋanan ŋini ekulyakana aryamun epite idio ŋolo eyarya, ani ca ketema iŋes eeŋu, eryamuni atemar eyakar akiitanit.

⁵Ituŋanan ŋini emina egolid, nyetubokinio erae ŋini iyookino; ituŋanan ŋini emina ŋisiliŋa ecakarete ŋisiliŋa akiyar keŋ.

⁶Enyasunosi ŋikalalak aŋuna a egolid ido aryamut ikes akinyasuno kec iteete ikes.

⁷Erae egolid apuŋure ŋina esigukinan ŋulu erorokoka aŋuna ka aryamun iŋes ka ikamari aroroko aŋuna a egolid ibaŋaanot daadaŋ.

⁸Erereŋ ikabaran ŋini eryamunio emam ŋuna itoroniyaritere, ŋini nyiwuakinit akiyar keŋ naryamun egolid.

⁹Ŋae iŋes, ikotere epuro iwon iŋes? Anerae etiya iŋes ŋaumonokineta alotuŋa keŋ.

¹⁰Ŋae adau alomar nakikatakino ŋina a egolid, ido toryamunae iyookino? Emaikina ituŋanan ŋin kiturokin aŋuna ka akiyookino keŋ. Ŋae eyakar apedor ŋinabilet ŋikisila, ido nyebil ka akitiya aronis ido nyitiya?

¹¹Iturubakinio ebari keŋ elosi kiŋaren ejok ka iseraete ŋituŋa anatukot ŋiticisyo keŋ ŋulu iŋaranakinia ŋuluce. Ŋipitesyo aneni imujere

¹²Iboi iyoŋ aneni imujata ŋituŋa ŋulu apolok a? Nyitoodiu a nen atemar irorokana iyoŋ, ido nyitema, “Etya ai, akimuj eyai nege!”

¹³Totamunite atemar erono ayakau ka akoŋu ŋina ka aroroko. Nyo ibore ice esubunitae erorokana akilo akoŋu? Aŋun, eracuni iŋes ŋakiyo aŋuna a ŋakiro a daadaŋ.

¹⁴Nyiopeyo akonikan nibore ŋini iŋolikini iyoŋ daadaŋ, nyilosenene neni a ikidunyet kon apaki ŋina imuja iŋes.

¹⁵Toyenu mono iyoŋ ilope ŋuna etami ikidunyet kon ka anakiro a daadaŋ, torae ŋini itamatamae nooi.

¹⁶Kimuj akimuj ŋina iwuakinitae kiŋaren kon ikwa ituŋanan ŋini itopolounitoe alopite a ŋolo ajokan ka nyinyakaa irae ŋini irorokana, acepaki itoŋoi iyoŋ ŋinice.

¹⁷Torae ŋini eŋarenon anakirikakin akimuj, itoodiuni nen atemar iyakar iyoŋ ŋipitesyo ŋulu ajokak, ido nyirae ŋini nyimwonene, acepaki itoŋoi iyoŋ ŋinice.

¹⁸Ani kiboi iyoŋ aneni eya ŋituŋa ŋulu alalak, nyigeu ŋinibore ikiinitae iyes eriŋa ikes.

¹⁹Itemokino ituŋanan ŋini eyakar ŋipitesyo ŋulu ajokak akimuj tari kedit, nyieŋa iŋes eperi erae ŋini eumonokini aŋuna ka akoro.

²⁰Eyauni akimuj ŋina itemokino ŋajo ŋuna ajokak neni a ituŋanan ani ekenyuni iŋes taparacu sek, eryamuni iŋes akuwan eŋale. Eponeneete ŋican ŋulu ka akikoler ka acamit akilek ta akibelibelo iperi neni a ŋulu edakaka.

²¹Ani kikitebukinit iyoŋ akimuj nooi, tonyou tolopu tolek, ido toryamu akiwuarar.

²²Kiira ŋakiro kaŋ, ikaakoku ka nyikiŋer ayoŋ, ido ekaku ibuni iyoŋ alakar aŋuna a ŋakiro kaŋ. Itemokino torae ŋini iyapara alotooma ŋuna itiyae iyoŋ daadaŋ, ido emam adyak ŋina ikilouni iyoŋ.

²³Iterereŋete ŋituŋa ituŋanan ŋini einanakini ikes akimuj ka irworosi ikes ŋakiro ŋuna a kire aŋuna a ituŋanan a ŋin.

²⁴Epedorete ŋituŋa alotaun akiŋuruŋura aŋuna a ŋini emini a akimuj ka irworosi ikes ŋuna iyookino aŋuna ka aminiu keŋ. Atyamarit anakimat epiini

²⁵Nyikatak agogoŋu kon anakimat epiini, anerae enyasu epiini ŋulu alalak.

²⁶Lopite ŋolo ikatakinere alokitet etic a eketyakan ŋasuwa, epiini daŋ ikatakini ŋitai kisileereu ŋuna eya lotau apaki ŋina iburaata ŋulu eŋoyete.

²⁷Erae epiini akiyar alotuŋa erae kemasi ŋolo itemokino. Nyo akiyar aneni a ŋini nyetukanari epiini? Aponi kitiyaunae epiini aŋuna ka akituruwor ŋituŋa ŋulu elakara.

²⁸Epiini ŋolo emasyo anapaki a ŋina iyookino ka ŋolo itemokino, erae alelyanu a etau ka alakara a akiyar.

²⁹Epiini ŋolo emasyo elal, ikirikori naŋoit ŋina ke etau, ikirikori lobura ka naryamun ŋican.

³⁰Iyatakini ameranu aŋoit neni a ibaŋaanot, ido eryamuni iŋes ilope ŋican edaun agogoŋu aneni keŋ ka iyatakin ŋajemei neni keŋ.

³¹Nyitoŋo ikidunyet kon anasuban a ŋuna imasyata iyes epiini, nyijamuwa iŋes alotooma alakara keŋ. Nyilimu akirot ŋina itoŋoi iŋes ka nyitoroniya iŋes anakiitanit atemar totac ibore ŋini ikijaarit iŋes iyoŋ.