Read ngakarimojong Sir 32 Bible Online

Sir 32 - ngakarimojong bible

Sir 32

¹Ŋipitesyo ŋulu ajokak anasuban Ani kikituruwor iyoŋ ikapolokiniton ŋasuban, nyitemokino iyoŋ kitopoloor bon; toyakaun neni kec ikwa ipei alokidiŋ kec. Kiyoku mono ikes ejok, ido ekaku kiboikin nai iyoŋ kieŋu.

²Ani kirikak iyoŋ akitiya daadaŋ ŋuna ikiinakinitae akitiya, kiboikin nai nakibois kon, ikotere nai ilakarosi kaapei ka ikes, ido ikitopoloosi ikes iyoŋ aŋuna ke etic kon a ŋolo ajokan.

³Kirworo iyes ŋulu imojoŋito, anerae erae ŋin apedor kus, nai ka aosou a ŋina iyookino, nai nyemaikina iyes irworosi apaki ŋina eotor ŋituŋa.

⁴Nyitemokino iyes iruworosi ŋulu ecelasi aneni eyai abolya; nyitoodiut apiiryanut kus anapaki aŋina nyiyookino.

⁵Lopite ŋolo iwuakinere ŋamoru ŋuna ebusak lokaboboot ŋolo itiyaunitae a egolid, ikoni neni abolya ŋina eore anapaki a ŋina emasere epiini.

⁶Lopite ŋolo inaminamere egolid namoru ŋuna enyaritae emerald, ikoni nenipei aeo ŋina eoi ejok emasyo epiini.

⁷Kirworo iyes ŋulu eroko irae ŋisorok, erae kikicamakinitae akirworo, nai meere arubakin irworosi jik, nai kikicamakin nabo kirworo.

⁸Kituuruwana erwori kus, tolimutu ŋuna alalak anakiro a ŋuna ekudyoko; kileereutu irae ŋulu iyenete ŋuna alalak, nai ŋulu nyirworosi car.

⁹Ani irukito iyes ka ŋikapolok, nyitoodiunosi esibit irae iyes daŋ ŋikapolok, ido ani irworo ŋinice nyemaikina iyes irworosi.

¹⁰Ebuni mono akimilyaunet eriŋa agirokinet, aŋun, eyenunio ituŋanan atemar ejok eriŋa nyedoluno.

¹¹Torotokini anapaki a ŋina ajokan, nyejok aruwor ŋini esidyon arotokin; tolot lore kon atipei, nyiŋel akirimirim.

¹²Kitalaka akonikuwan aneni imuja, tari ŋina iyenunia iyoŋ atemar etemokin nai nyitiya asecit alotooma erwor ŋolo ka akituro.

¹³Nai akilo ŋun daadaŋ tolakar neni a akasubunan kon, Akuj ŋina ikiinak iyoŋ ŋainakineta keŋ ŋuna ajokak. ŋuna ikiinakini Akuj

¹⁴Ituŋanan ŋini iwarit ŋuna ka Akuj, ecamuni ŋuna itatami Akuj iŋes ka ikes ŋulu enyounete taparacu sek akiwarit acamit ŋina ka Akuj, eryamunete ajokis keŋ.

¹⁵Ituŋanan ŋini iwarit ayenun ŋikisila, ilelebikinio neni keŋ ŋikisila, nai igukini alokisila ŋulu a ŋisoswae.

¹⁶Ikes ŋulu itopoloorito Ekapolon, eyenunete ŋatubonokineta ŋuna iyookino; ido isileereunete akiyookino ŋina a ŋiticisyo kec lopite ŋolo ileereunio akica.

¹⁷Eŋerit ekasecan alimokino atemar nyiyookino ŋuna itiyae iŋes, ido eryamuni ŋuna etami iŋes atemar ejokak aŋuna ka akitiya ŋuna ecamit iŋes.

¹⁸Nyejamakini ituŋanan ŋini eyakar ŋatameta ŋuna ajokak atametait ŋina ajokan ŋina elimokinio iŋes, nai ituŋanan ŋini abaŋaanan, ŋini iturono, nyemitakinit ŋuna elimokinio iŋes.

¹⁹Nyitiyak idiobore nyetamatama ejok, ido ani kidau iyoŋ akitiya, nyigwor aŋuna itiya iyoŋ.

²⁰Nyimyaanakini erot ŋolo elalak ŋiboorei ŋulu ikiwanete ka nyicamak ibore ipei ikiteryamuni iyoŋ ŋican ŋarwa ŋaarei.

²¹Nyimina akikinyomit nooi erot ŋolo ajokan,

²²kitee ejok neni itori iyoŋ.

²³Kiyokiunite akonikuwan ejok aloticisyo a daadaŋ a ŋulu itiyae iyoŋ, anerae erae nen akiwuapit ŋakiciketa ŋuna ka Akuj.

²⁴Idarit ejok akuwan keŋ ituŋanan ŋini iricit ŋakiciketa ka emam ŋuna etwaniyari ŋini ikinyomit Ekapolon.