Read ngakarimojong Sir 33 Bible Online

Sir 33 - ngakarimojong bible

Sir 33

¹Emam aronis eyakaun neni a ŋini itopoloorit Ekapolon, nai erubakinio eiununiyo ŋini ikoni ŋin anakikatanakineta.

²Nyitoroniyarete ŋulu eosok ŋikisila, nai ŋini a ŋisoswae ŋini itoroniyarit, ikwaan ka ataker ŋina iryaŋiryaŋi ekuwuam ŋolo agogoŋon.

³Epedori ituŋanan ŋini eyakar ayenut akikinyom ŋikisila, anerae aneni a ŋini ikoni ŋin, erae ŋikisila ŋakiro ŋuna eyarya iŋes ŋuna edwarakinit iŋes Akuj.

⁴Kitemonok ŋuna ilosi iyoŋ alimun, ido ani irworikini iyoŋ, ikipupokinete iyoŋ ŋituŋa; kisitiya ŋakiro ŋuna ikitatamitae iyoŋ aŋuna ka aboŋonokinio ŋuna ikiŋisyo.

⁵Ikwaan etau a ibaŋaanot ka akokoro ŋina ka agaari, ido ikote ŋatameta keŋ ibore ŋini irimi atipei.

⁶Ikwaan ekone ŋolo ikijamuwarit ka aŋole ŋina emam ituŋanan adokaki amere, ŋina etirono apaki ŋina edokakinia ekiŋaren ituŋanan ca daadaŋ. Agelaanut a ŋinibore esubunitae ka ŋina a ŋituŋa

⁷Kaanukiro itopolooritere nooi apei koloŋit, akilo ŋinace, torae bo akica ŋina a ŋinapaaran alotooma ekaru ŋina ebunit aneni ka akoloŋ?

⁸Alotooma aosou ŋina ke Ekapolon, aponi totyakatyakae ŋirwa, ido abu iŋes kiwuak ŋapakio ŋuna egelegelya ŋuna ka akieŋun ka ŋuna a ŋasuban.

⁹Abu iŋes kitopoloo ŋirwa ŋice toruwor ŋulu esegak ka ŋice toruwor ŋulu nyitopolooritae.

¹⁰Itiyaunitae ŋituŋa daadaŋ analup. Arae nalup etiyaunere Adam.

¹¹Alotooma aosou keŋ ŋina apolon, abu Akuj tosub ŋisubuna keŋ egelegelya, ido inanak ikes ŋiticisyo ŋulu egelegelya.

¹²Abu iŋes kiterereŋ ka kitopoloo ŋice ka abu kituruwo ŋice ŋulu esegak, ido kiwuak diyete keŋ, nai abu kilam ŋice, kitiditeu ikes, ido kirita ikes anakiboisyo kec.

¹³Ikwa ecoto eyai nakan a ekayen aŋuna ka ayeunia ibore lopite ŋolo ecamitor iŋes, eyakasi ŋisubuna daadaŋ nakan a ekasuban kec aŋuna ka ainakino ŋinibore daadaŋ etubuni iŋes.

¹⁴Ani kiseu ajokis, iŋeri aronis ka ani kiseu akiyar iŋeri atwanare, aŋun eseunit ikasecan ŋuna eŋerit ŋini iwuapit ŋuna ka Akuj.

¹⁵Kiŋolik mono iyoŋ ŋiticisyo daadaŋ ŋulu ka akuj a ŋina alokidiama nooi, eponeneete ikes a ŋiarei, ipei eŋerikino ka ŋinice.

¹⁶Abu ayoŋ oruwor ŋolo esidyon anakitiya etic, abu ayoŋ ekwaanikin ka ekesokotan ŋolo iwuapit ŋikalemak ŋaraito a epiini.

¹⁷Alotooma arereŋu a Ekapolon, abu ayoŋ odol anapaki a ŋina etemokino ka ikwa ekaleman ŋaraito ŋuna a epiini, abu ayoŋ elelebik akipany kaŋ ŋina ecuyere epiini.

¹⁸Totamunito atemar nyebukoro ayoŋ ŋakinyinyir kaŋ aŋuna kaŋ bon, nai aŋuna a daadaŋ a ŋulu iwarito akitatamo.

¹⁹Kiirasi ŋakiro kaŋ, iyes ŋulu irae ŋikapolok alokidiŋ ŋituŋa ka iyes ŋikarikok a ŋatukon a ŋikelipak, topupokisi ŋakiro kaŋ! Ajokis ŋina ka akiuryaro bon

²⁰Alotooma apaki daadaŋ ŋina iyarya iyoŋ nyiinak apedor neni a lokoku, kori a aberu, neni a lokaato kori a ekone, ido nyiinak ŋiboro kon neni a ŋinice, acepaki ibelekini iyoŋ ŋakonitameta, ido kiŋit ikinyakakin.

²¹Ani eriŋa iyoŋ iyari ka ieŋa, nyicamak ituŋanan idio ilunyokin nakibois kon;

²²anerae ejok erae ŋidwe kon iŋitasi aneni kon, akilo iyoŋ akiŋita akiŋarakino aneni a ŋidwe.

²³Kitiya daadaŋ ŋuna emaikina iyoŋ kitiya; nyiyau ŋiyany napolou kon.

²⁴Alotooma ŋirwa ŋulu edaunotor ŋirwa ŋulu ka akiyar kon, edoli esaa ŋolo ka akiridakin, emaikina nai tokorak ŋiboro kon neni a ŋiletok kon a ŋulu emaikina kiruma. Epite ŋolo etiŋitere ŋipi

²⁵Emaikina esigirya einakinio ŋinya, ibuŋao ka isitiyao etic ŋolo agogoŋon. Emaikina ipito einanakinio akimuj, itatamio akiwuapit ŋipitesyo ŋulu ajokak ka isitiyao.

²⁶Inak ipito kon etic, ido iyakaun iyoŋ inapakina ŋatameta; ani kimyek iyoŋ iŋes emam etic, iwari iŋes akitiya ŋuna ecamit.

²⁷Itatamete ayokot ka ŋarukanes emosiriŋ a ecuugat akitiya, ido ani eruwor ipito ŋini aronon itatamete iŋes ŋiticisyo ŋulu agogoŋok ka akidicio.

²⁸Inak iŋes etic ikotere nyiboikin iŋes emam etic,

²⁹anerae etamatamae iŋes akitiya aronis erae kemam etic itiyae.

³⁰Inak iŋes etic ŋolo itemokino iŋes kitiya ka ani pa kiwuap iŋes ŋun, inak iŋes etic ŋolo agogoŋon nyirubak imyeanakini akisican ituŋanan idio ka nyitiya idiobore ŋini nyiyookino akitiya.

³¹Ani kiyakar iyoŋ ipito ipei, kidar iŋes lopite ŋolo idaritor iyoŋ akuwan kon, anerae igyelu iyoŋ iŋes anabukor ŋakinyinyir. Ani kiyakar iyoŋ ipito ipei, kidar iŋes ikwa lokaato kon, anerae iitani iyoŋ iŋes lopite ŋolo iitanitor iyoŋ akiyar kon toyai.

³²Ani kitiŋ iyoŋ iŋes erono, ido itoesik iŋes iyoŋ toem aneni kon,

³³erot ali itupakini iyoŋ ilosi akiwarit iŋes?