Read ngakarimojong Sir 34 Bible Online

Sir 34 - ngakarimojong bible

Sir 34

¹Emam apolou eyai nakirujaeta Ŋakiro ŋunakoŋinae ka alyokonu ikes erae akigeno a ŋulu emamukatar ayenut, ido elakanarosi ŋibaŋaanotin nooi aŋuna a ŋakirujaeta.

²Ituŋanan daadaŋ ŋini enupit neni a ŋakirujaeta, ikwaan ka ŋini ecamit akikamun etorube keŋ, kori ŋini irisit ekuwuam.

³Ibore ŋini etakani anakirujaeta, erae etorube a ŋini sek eyai natameta, etorube ŋolo ikoni ŋolopei kon iŋolikini anaroet.

⁴Ipedori mono iyoŋ aroa anibore a ŋini eeŋoryana ido totakanu etorube kon ejok a? Epedori mono ibore ŋini nyerae ŋini a kire aruwor ŋini a kire a?

⁵Nyerae ŋuna a kire akidwar ŋuna aronok, ŋakikukujaeta ka ŋakirujaeta, ido lopite ŋolo eyakaunor aberu naryeba ŋina ka akidoun, ŋatameta daŋ, eyakatar ŋitorubei ŋulu sek ikitatamitae iyoŋ aŋuna kec.

⁶Mati erae etorube ŋol akisileerekinet aneni ka Akuj, nyimitak ŋuna irujae iyoŋ;

⁷anerae amodikis ŋakirujaeta ŋulu alalak, ido amunyarosi ŋulu iwuakinito akigeno kec nakirujaeta.

⁸Ani kemamukaun amodiyo ŋina ikoni ŋin, isiyookinio ŋuna a ŋikisila ka iyookin ŋuna ka aosou alorwor a ŋulu eyakatar akikinyoma. Isikwaanitae eketataman ka ituŋanan ŋini itiyat ŋikaru ŋulu alalak

⁹Eyeni ituŋanan ŋini esyomit ŋiboro ŋulu alalak ka ŋini itiyat ŋikaru ŋulu alalak, eyeni ŋuna irworo iŋes.

¹⁰Ituŋanan ŋini nyitiyat ŋikaru ŋulu alalak, eyeni ŋiboro ŋulu ekudyoko,

¹¹nai ituŋanan ŋini elosit nakiboisyo ŋuna alalak, eryamunit aosou ŋina alalan.

¹²Anyu ayoŋ ŋiboro ŋulu alalak analosenen kaŋ nakiboisyo ka ayenu ayoŋ ŋuna alalak ŋuna nyapedorit alimun daadaŋ.

¹³Abu ayoŋ ŋapakio ŋuna alalak oyakaun locan ŋulu adikino atwania, nai abu obucunun aŋuna abunio oyenunia epite ŋolo ibucunor. Kitopoloorito Ekapolon

¹⁴Eyarete ŋitai a ŋulu itopoloorito Ekapolon,

¹⁵anerae eyai akigeno kec neni a ŋolo eiununui ikes.

¹⁶Emam ekaile eyakaun neni a ŋulu itopoloorito Ekapolon, kori nyekuryaketa ikes, anerae Ekapolon erae akigeno kec.

¹⁷Elakara akiyar a ituŋanan a ŋini itopoloorit Ekapolon.

¹⁸Neni a ŋae iwuakinit iŋes ŋatameta keŋ? Ŋae ekeŋarakinan keŋ?

¹⁹ite Ekapolon ŋulu eminasi iŋes, erae iŋes aupal ŋina ka apedor ka ekeŋarakinan ŋolo agogoŋon, ekemukoron alokuwuam a ŋolo ekusi nooi ka etolim anapaki a ŋina emwania akoloŋ kidiŋ apaaran, eketenan ikotere nyikigukis ŋatyokisyo, ekeŋarakinan ikotere nyibusokin.

²⁰isimukyanakini iŋes akiyar, ido inak ŋakonyen akikieny ejok, ikiinakini iŋes aŋaleu a ŋawat, akiyar ka arereŋu. Ainanakin ŋamuronisya

²¹Ani keinaki ituŋanan amuronot ŋina edemunitae ŋinice, erae ainakinet ŋin ŋina itoroniyaritae;

²²nyecamunio ŋainakineta a ŋulu nyiwuapito ŋikisila ka Akuj.

²³Nyitalakarito Akuj ŋina alokidiama nooi ŋainakineta a ŋulu nyiwuapito ŋuna ka Akuj, kori nyisyoni iŋes ŋasecisya kec aŋuna a ŋamuronisya a ŋuna alalak.

²⁴Ikwaan ituŋanan ŋini einakini amuronot aloboro a ekulyakit ka ŋini eari lokoku a ŋinice alokiŋaren papa keŋ.

²⁵Erae akimuj akiyar aneni a ŋulu a ŋican; ŋini edemari ikes akimuj, aar ikes erae akiar.

²⁶Ani kilema iyoŋ ibore ŋini eyarya ikidunyet kon, erae aarit iarit iyoŋ iŋes.

²⁷Ani kimik iyoŋ eketiyan eropit keŋ, erae akiar iarit iyoŋ iŋes.

²⁸Ani keduki ipei, ido toritaanari ŋinice, nyo eryamunete ŋituŋa ŋul akilo etic ŋolo agogoŋon?

²⁹Ani kilipi ipei, ido kilama ŋinice, ŋakiro a ŋae epupokini Ekapolon?

³⁰Ani kiloŋar ipei kedau akitap ikatwan, ido totap nabo, nyo aryamu iŋes anakiloŋar keŋ?

³¹Aŋun, ani kiredak ituŋanan akiron aŋuna a ŋasecisya keŋ, ido toboŋok nabo akisec, ŋae iirari akilip keŋ? nabo nyo eryamuni iŋes anakitiditeun bon?