Read ngakarimojong Sir 35 Bible Online

Sir 35 - ngakarimojong bible

Sir 35

¹Ŋikisila ka ŋamuronisya Eyaununui ituŋanan ŋini iwuapit ŋikisila ŋainanakineta ŋuna alalak,

²einanakini ituŋanan ŋini iwuapit ŋakiciketa ŋainakineta ŋuna ke ekisil.

³Ituŋanan ŋini itiyae ŋuna ka arimao neni a ŋulu itiyaete ŋun neni keŋ, ikwaan ka ainakinet ŋina a ŋikinyom a ŋulu ajokak

⁴ka ŋini iŋaranakini ŋuluce, einakini ŋainakineta ŋuna ka alakara neni ka Akuj.

⁵Elakar Ekapolon erae keŋer ituŋanan akitiya ŋuna aronok ka erae akiŋer ŋuna nyiyookino amookun.

⁶Nyitoodiyar kiŋaren Ekapolon pa iyakar ibore idio,

⁷anerae ŋini daadaŋ iinakini iyoŋ, erae akisiyookinet ŋina a ŋakiciketa.

⁸Ecamunio anamuroet ŋainakineta a ŋulu iyookino ka eremi kidiama eure kec ŋolo akukunyon neni ka Akuj a ŋina alokidiama nooi.

⁹Ecamununuyo ŋainakineta a ŋulu iyookino ka nyimuryakin jik.

¹⁰Ani ilipete iyes neni ka Akuj, yaununeete ŋainakineta ŋuna alalak, ido nyiŋero ainakin iŋes ibore idio ŋini itiyaunete iyes ekiŋaren.

¹¹Kitoodiunete ereet ŋolo emaisyani apaki ŋina ipotorya ainakinet kon, kitaleiyo neni ka Akuj ainakinet kon alotooma ŋitomon ka alakara.

¹²Inak neni ka Akuj a ŋina alokidiama nooi ikwaŋina ikiinakinia iŋes iyoŋ ka inak lopite ŋolo ikiinakinia iŋes iyoŋ ka alopite a ŋolo ipedoritor iyoŋ.

¹³Ekapolon iŋes ikiinakini, ido ikiinanakini iŋes iyoŋ ŋarwa ŋakanikaarei. Akiyookino ŋina ajokan

¹⁴Nyiinak Akuj akaluŋuluŋut, anerae nyecamuni iŋes;

¹⁵Nyiwuakinit akikinyomit kon namuronot ŋina ka amodiyo, anerae Ekapolon iŋes erae ekatubon ka emam ŋini eriitotor iŋes.

¹⁶Nyeriyete Akuj ka ŋikulyak; nai epupokini iŋes akilip a ŋini itiyakinitae ŋuna nyiyookino.

¹⁷Nyejamuwari iŋes adyekitoi a ŋikokyok, kori ŋina ka apuserut apaki ŋina igworor aŋuna a ŋican keŋ.

¹⁸Nyeleleete mono ŋakiyo ka apuserut alokelyo keŋ,

¹⁹apaki ŋina igworonokinio iŋes ŋini isigori iŋes a?

²⁰Ecamuni Akuj ituŋanan ŋini ejok aneni keŋ, ka edoli akilip keŋ lodouwon.

²¹Ipori alodowon akilip a ŋulu itiditeuna bon, ido nyililiŋiyaryo mati kitiyak akilip ŋin ŋuna ecamit ituŋanan ŋin. Erubakini ituŋanan ŋin ilipi tari ŋina eboŋokinio Akuj ŋina alokidiama nooi akilip keŋ,

²²ido kitiya ŋuna iyookino aŋuna a ŋulu iyookino ka totub ŋakiro. Ŋuna a kire, nyedidi Ekapolon ikwa ekajion, nyetitinyikini iŋes, mati kinyasu ŋulu nyeyakatar akisyon;

²³ido kinyaŋa ŋuna apotu ŋituŋa a ŋakwapin kitiyata akitodol ŋina inyasunia iŋes ŋulu alalak ŋulu eturok, tolema apolou aneni a ŋulu nyiyookino.

²⁴Akitodol ŋina inyaŋarya iŋes ŋakiro a ŋituŋa lopite ŋolo itiyatotor ikes ka ŋiticisyo daadaŋ lopite ŋolo a ŋatameta kec;

²⁵akitodol ŋina etubio iŋes ŋakiro a ŋituŋa keŋ, ido kituruwo ikes ŋulu elelyanete anakisyon keŋ.

²⁶Erae akisyon ŋina ka Akuj ŋina emaikina kijaunae anapaki a ŋina a ŋican, lopite ŋolo ijaunere ŋidouwon ŋulu eyaunete akiru anapaki a ŋina eonitor akwap.