Read ngakarimojong Sir 36 Bible Online

Sir 36 - ngakarimojong bible

Sir 36

¹Akilip ŋina a ŋituŋa ka Akuj Okoe Akuj ŋina a daadaŋ, kisyoni isua,

²ido inak ŋituŋa a ŋakwapin a daadaŋ ikitopoloosi iyoŋ.

³Kitoodiu apedor kon iremokino ŋakwapin ŋuna egelaaka, kimyek ikes kiŋolikis apedor kon.

⁴Ikwapei ikisitiyaa iyoŋ isua akitoodikin ikes asegis kon, aŋun, kisitiya ikes ikitoodikis isua apolou kon.

⁵Aŋun, eyenunete ikes lopite ŋolo ikidaunia isua ayenun atemar emam Akuj ace, nai iyoŋ bon okoe Ekapolon.

⁶Kitoodiu ŋakujuwuanisya ŋuna ekitetyaka ka kitiya ŋaumonokineta ŋace;

⁷kilou ikes a apedor kon a ŋina etiron ka a akan kon a ŋina aloteten.

⁸Kitonyou aŋoit kon, ido tobuk anyunyura kon;

⁹tomunya ŋulu ikiŋoikinito iyoŋ, ido kitoŋopiya ŋikonimoe.

¹⁰Kitadau apaaran atipei, ido totamunite apaki ŋina etubunitoe ka kimyek ŋituŋa kimarut ŋiticisyo kon ŋulu ka aumokin.

¹¹Kimyek ŋipiya tomunya anyunyura kon ŋina aryenyaanan, ido elipi kiryama ŋulu ewanawanaete ŋituŋa kon ka amunyaro.

¹²Kinyaadiya ŋakyes a ŋikepukak a ŋulu aryenyaanak, a ŋulu ebasi, “Emam ituŋanan ice eyeni ŋuna yok, nai iwon bon.”

¹³Tocunak ŋikabilae ŋulu a ŋituŋa a Yakob daadaŋ,

¹⁴kilelebik kai [14] kon ŋina alomukura Sion apolou kon ka ŋieosyo ŋulu ka akipuro.

¹⁵Kirwor aŋuna a ŋituŋa kon a ŋulu ibu iyoŋ tosub anakisyakinet; kisiyook ŋakiro ŋuna aponi kirworoe edwaryo alokiro kon.

¹⁶ido inak ikes ŋakiboisyo kec lopite ŋolo ayakatar ekiŋaren.

¹⁷Okoe Ekapolon, kisyoni ŋituŋa kon ŋulu enyaritae a ekiro kon, Ŋisirael ŋulu iinak iyoŋ aruwor ŋikiyae kon.

¹⁸Kisyoni etaun kon ŋolo eyai akibois kon ŋina asegan, Yerusalem akibois ŋina iboiyo iyoŋ.

¹⁹Kilelebik ailiil kon Sion ka kilelebik Kai kon apolou kon.

²⁰Toruwor esuuda aneni a ŋulu ibu iyoŋ tosub ekiŋaren, ido kisiyook ŋakiro ŋuna edwaritae ŋuna aponi kirworoe alokiro kon.

²¹Torop ŋulu ikidarito iyoŋ, ido kimyek ŋikadwarak kon toryamunae erae ŋulu a kire.

²²Okoe Ekapolon, kiira akilip a ŋiketiyak kon, lopite ŋolo eyakar acamit kon ŋina ajokan neni a ŋituŋa kon, ido eyenunete ŋulu eya nakwap daadaŋ atemar irae iyoŋ Ekapolon Akuj ŋina a ŋikaru ka ŋikaru. Ŋakiro ŋuna ka atyakatyaka

²³Epedori akook acamun akimuj ca daadaŋ, kikote neni daŋ eyai akimuj ŋina ejok aneni keŋ akilo ŋunace.

²⁴Lopite ŋolo eyenunia tooma akituk alokidiama ajokis, kori aronis a ibore iiri, aŋun, eyenunete ŋatameta ŋuna epiiryaka ŋakiro ŋuna ka alyokonu.

²⁵Eyaunete ŋatameta ŋuna aronok akiyaloloŋ, nai iŋes ŋini sek itorit nakiro ŋun, epedori akiloun ŋakiro a ŋatameta a ŋun.

²⁶Epedori apese acamun ekile daadaŋ toruwor lokile keŋ, nai ejok apese ikwaan ka ŋinace.

²⁷Enirari akibuses a aberu ŋakonyen a ekile, ido emamukaun icebore iitani iŋes akilo.

²⁸Ani kitoodiu aberu ŋin arimao ka akitiditeuna alorwor keŋ, eruwor ekile keŋ ŋolo eyakar arereŋu akilo ŋikilyok ŋuluce.

²⁹Ekile ŋolo eryamuni aberu, aryamu iŋes ituŋanan ŋini eruwor ŋini keŋ jik, akeŋarakinan ŋina itemokino aŋuna keŋ, akegaŋakiniton ŋina erae epir.

³⁰Neni emam awuas, eŋataryo ŋiboro a nen, ido neni emam aberu, eruwor ekile keŋ ekerimiton ka ekaperepereton neni daadaŋ eryamunia akuwar.

³¹Ŋae epedori akikinyom ekokolan ŋolo erimiton, ŋolo irimit alotaun a epei tari lotaun ŋoloce? Aŋun, ŋae epedori akikinyom ekile ŋolo emam neni iboiyo, nai ŋolo eperi neni daadaŋ eryamunia iŋes akuwar?