Read ngakarimojong Sir 37 Bible Online

Sir 37 - ngakarimojong bible

Sir 37

¹Ŋikonei ŋulu alyokonok Ebala ŋolokone daadaŋ ebe, “Ayoŋ daŋ arae ekone;” nai erae ŋikonei ŋice ŋikonei a ŋirorwa bon.

²Nyerae mono ŋun akiyaloloŋ ŋina ikoni ŋina ka atwanare, erae keluwo ekone ŋolo ikimina toruwor emoit kon a?

³Okoe iyes ŋulu iwuapito ŋuna ka akitiya aronis, kaanukiro kikisubunere iyes, ido toyakaun nakwap daadaŋ aŋuna ka amodiyo kus?

⁴Elelyanete ŋirukitos ŋice, anerae elakara ekone kec anapaki a ŋina a ŋican, elukinete ikes ekone kec.

⁵Iŋarakinete ŋirukitos ŋice ekone kec aŋuna ca ka akimujia aneni keŋ, nai alojie edemarete ekone kec aupal keŋ aiunia ŋawat kec.

⁶Nyikimuryak ekone apaki ŋina iyakatar ka iŋes lojie, nyikimuryak atamunit iŋes apaki ŋina iŋasiata iyes ŋiboro ŋulu iŋatunete alomoe kus. Toyeni ŋuna kiwuapa anakiro a ŋuna ikilimokinio

⁷Ipurosi ŋituŋa daadaŋ ŋuna itatamitae ikes anakiro a ŋuna irworosi ikes nai irworosi ŋice ŋakiro ŋuna ejoikinito ikes make.

⁸Tocoikinite ŋakiro ŋuna elimuni ituŋanan, ido toyeni mono ŋuna irworo iŋes kerae ŋuna ajokak aneni keŋ bon, anerae etamatamae iŋes aŋuna keŋ bon. Acepaki nyikiseuni iŋes iyoŋ, anerae ikiremokino,

⁹ido ikilimokini iŋes iyoŋ ebe, “Ejokak ŋuna iwuapit iyoŋ,” towo anawae kiŋolik ŋuna itiyakin neni kon.

¹⁰Nyiŋit akirot adio ituŋanan ŋini ikitamakinit iyoŋ ŋakiro ŋuna aronok, kimunon ŋuna icamit iyoŋ akitiya aneni a ŋulu eyakatar arakao neni kon.

¹¹Nyiŋit aneni ka aberu atemar ŋae ace etiŋasi ka lokile keŋ kori nyiŋit ekakuryanan ŋuna ikamunito ejie. Nyiŋit emucurus ŋuna ikamunito agyelanar, kori nyiŋit ikagyelan ŋuna ikamunito agyelanar, kori ŋini nyipotonori ibore ŋuna ka akipotonor, kori ŋini nyisyoniyenene ŋuna ka arimao, kori ŋini nyecamit etic ŋuna ke etic, kori ŋini itiyae apaki ŋina euruwuana ŋuna ke etic kirikakinit, kori ikalanyanot ŋini erae iketiyan ŋuna ke etic a ŋolo agogoŋon, nyimitak ŋakiro ŋadi ŋuna ikilimokinete ikes iyoŋ.

¹²Nai torukito ka ituŋanan ŋini iwuapit ŋuna ka Akuj, ŋini iyeni iyoŋ atemar erae ŋini iwuapit ŋakiciketa, ŋini eyakar ŋatameta ŋuna iyakar iyoŋ ilope, ŋini epedori akiyaloloŋ anapaki a ŋina iryamunitor iyoŋ ŋican.

¹³Toruwor ŋini iwuapit ŋakiro ŋuna ikilimokini iyoŋ etau kon, anerae emam ibore ipei daŋ ikinyoma aneni kon akilo etau kon.

¹⁴Ŋapakio ŋace, ikilimokinete iwon ŋatameta yok ŋakiro ŋuna kiwuapa akilo ŋiketeok etaun ŋikanikaarei ŋulu iwuakinitae nakiboisyo ŋuna aoyak akirer.

¹⁵Nai akilo ŋun daadaŋ, kilip neni ka Akuj a ŋina alokidiama nooi ikotere ikitoodikini iŋes iyoŋ erot ŋolo a kire. Aosou ŋina ka amodiyo ka ŋina a kire

¹⁶Erae akiyanun ŋakiro iŋes erae akisyakinet a etic a daadaŋ, ido erae akirworiun ŋakiro mono isyauni eriŋa nyitiya etic daadaŋ.

¹⁷Ŋatameta ikes erae ataagorete a ŋipitesyo a daadaŋ;

¹⁸itolomunete ikes ŋaten ŋaomwon, ajokis ka aronis, akiyar ka atwanare; ido aŋajep erubakini ipukat ikes.

¹⁹Erae ŋituŋa ŋice ŋulu eosok nooi, ŋulu epedorito akitatam ŋituŋa ŋulu alalak, nai torae bo ŋikoŋinae anakiyar kec.

²⁰Epedorete ŋituŋa akiman ituŋanan ŋini epiiryana anakirworo; ido ekaku, eruwor iŋes ŋini icana ŋinakimuj daadaŋ,

²¹anerae awounia Ekapolon ainakinet ŋina ka alakara a ŋina emamukatar ŋakiro ŋun aneni a ituŋanan a ŋin.

²²Ani keos ituŋanan aŋuna keŋ bon, ipuryo nooi ŋiticisyo ŋulu a ŋatameta keŋ a ŋuna ajokak.

²³Itatami ituŋanan ŋini aoson ŋituŋa keŋ a ilope, ido erubakinete ŋiticisyo ŋulu a ŋatameta keŋ a ŋuna ajokak.

²⁴Eryamuni ituŋanan ŋini aoson akipuryo aneni a ŋituŋa, ido daadaŋ ŋulu iŋolikinete iŋes enyaraete iŋes ŋini elakara.

²⁵Imarar ŋirwa ŋulu ka akiyar a ituŋanan, nai ŋirwa ŋulu a Ŋisirael, nyimarar.

²⁶Ituŋanan ŋini eos alotuŋa keŋ, eryamuni akitopolooro, ido erubakini ekiro keŋ eyai ŋikaru ka ŋikaru. Ŋuna etapito akiyapara

²⁷Ikaakoku kiyokiunite akonikuwan eriŋa iyari; toyeni ŋuna eroko aŋuna kon, ido nyimyek akuwan kon itiyae ŋun;

²⁸anerae nyejokak ŋiboro daadaŋ aneni a ŋituŋa a daadaŋ ka emam ituŋanan ŋini ebobokinit ibore daadaŋ.

²⁹Nyirorokona anamuja a ŋuna ajokak a daadaŋ ka nyimuji pa ieŋanakini mono akimuj;

³⁰anerae eyauni akimuj nooi adyaka ka ikisirumi adakanu egwee.

³¹Atwaka ŋulu alalak aŋuna ka adakanu, nai ŋini ecoikinit anakitoroniyarit ŋun, itooyari akiyar keŋ.