Read ngakarimojong Sir 39 Bible Online

Sir 39 - ngakarimojong bible

Sir 39

¹Etic a eketataman a ŋikisila Etya ai epite ŋolo egelaania ŋini einakina nakisyom ŋikisila ŋulu ka Akuj a ŋina alokidiama nooi! Iwarit iŋes ayenun aosou a ŋituŋa a ŋulu a koloŋ, ecamit iŋes jik ayenun ŋakiro ŋuna keponi todwarae;

²iŋadae iŋes ŋakiro ŋuna ajokak ŋuna kirworosi ŋituŋa ŋulu ayenen, ido esyomi ŋakiro daadaŋ ŋuna ajokak nooi anakitadapeta;

³iwarit iŋes ayenun apolou ŋina nyileere anakitadapeta ka iboi iŋes alore etami ayenun apolou ŋina nyileere anakitadapeta.

⁴Itiyae iŋes neni eyakasi ŋikapolok, ido eyakaunun iŋes neni a ŋikepukak, elosenene iŋes nakwapin a ŋituŋa a ŋulu egelegelya, ido toyenu a nen ŋuna ajokak ka ŋuna aronok ŋuna itiyaete ŋituŋa.

⁵Iwuakinit iŋes etau keŋ anyounun eriŋa ataparacu aŋuna ka akilip neni a Ekapolon a ŋolo abu tosub iŋes ka adyekitoi neni ka Akuj a ŋina alokidiama nooi; irworo iŋes ilipi, ido iŋita akisyonio aŋuna a ŋasecisya keŋ.

⁶Ani kecamunit Ekapolon ŋolo epol akilo, ilelebikinio iŋes etau ŋolo ka ayenun; ebukuni iŋes ŋakiro ŋuna ka aosou ŋuna erae ŋuna keŋ, ido tolakar iŋes neni ke Ekapolon anakilip.

⁷Iteni Ekapolon iŋes anakiro keŋ ka anaosou keŋ, apaki ŋina etamatamaa iŋes ŋakiro ŋuna imunono.

⁸Itoodiuni iŋes aosou anakiro a ŋuna adau iŋes ayenun, ido epoloor iŋes alotooma ŋikisila ŋulu ka acamunet a Ekapolon.

⁹Ipurete ŋikalalak ayenut keŋ ŋakiro; nyelemaryo jik aneni keŋ ayenut ŋin. Nyimuryakin iŋes aneni a ŋituŋa, ido erubakini ekiro keŋ eyai ananyameta a daadaŋ.

¹⁰Erubakinete ŋakwapin irworosi ŋuna ka aosou keŋ, ido iseraete ŋituŋa anatukot ipurosi iŋes.

¹¹Ani kiboi iŋes ekaoyan, eesikini iŋes ekiro keŋ erae ŋolo etamunitae adepar ŋulu a ŋituŋa ŋulu edeparito tari aliput; ido ani ketwana iŋes, etemokin akiyar keŋ aŋuna keŋ. Eete ŋolo ka akipuro Akuj

¹²Ayakar ayoŋ ŋuna alalak ŋunalimuno anatameta kaŋ; ileleba ŋakiro neni kaŋ lopite ŋolo eupya akica ke elap akwap eyai kidiama kidiŋ akuwar.

¹³Kiirasi ŋakiro kaŋ, ŋidwe kaŋ ŋulu ikinyoma, ikotere totakana irae ŋulu ajokak ikwa aturot ŋina epoloe alodiyete ayonae ŋina eya ŋakipi.

¹⁴Kitoodiutu ŋipitesyo ŋulu ajokak lopite ŋolo ebunio eure ŋolo ajokan aneni a ekinyate, ido kitoodiutu akibuses kus lopite ŋolo ibusyata ŋatur a ecomocomo. Kitoodikisi ŋituŋa daadaŋ ajokis kus, ido toeo ipurosi Ekapolon; tolakaros neni a Ekapolon aŋuna a ŋiticisyo a daadaŋ.

¹⁵Kiserata itopoloorito ekiro keŋ, ido tolakaros neni keŋ alotooma akipuro, toeo ka torama ŋaduŋgui; ŋakiro nu ikes ilimunete iyes ilakarosi neni keŋ:

¹⁶“Ejokak nooi ŋiticisyo ŋulu ke Ekapolon daadaŋ ka ŋinibore icikakini iŋes, itiyakin alotooma apaki ŋina eseunit iŋes.

¹⁷Emam ituŋanan etemari, ‘Nyo en?’ Kori ‘Nyo ŋin?’ Anerae anapaki a ŋina itemokinitoe, eboŋokinio ŋakiŋiseta ŋun. Analimunet a ŋina ka Akuj, apotu ŋakipi towua aiwapei, abu Akuj tosub neni ewuatar ŋakipi.

¹⁸Ani elimuni Akuj akirot, iyookin daadaŋ ŋuna ecamit iŋes, emam ŋini iretakini iŋes kecamit aiun a apedor keŋ.

¹⁹Eyakasi kiŋaren keŋ,ŋiticisyo daadaŋ ka mam ibore ŋini nyepedorit iŋes akiŋolikin.

²⁰Ŋinapei anakisyakinet tari nasalunet ŋina a ŋikaru, ite iŋes ibore daadaŋ ka emam aneni keŋ ibore nyepedorit iŋes akiŋolikin.

²¹Emam ituŋanan etemari, ‘Nyo en?’ Kori ‘Nyo ŋin?’ Anerae esubunitae ibore daadaŋ aŋuna ka akitiya ibore idio.

²²“Erapuwarit arereŋu keŋ akibois ŋina eonit, lopite ŋolo erapuwaryata ŋakipi a aŋolol ilapi akibois ŋina aonon.

²³Nai iritari iŋes a anyunyura keŋ ŋituŋa a ŋakwapin, lopite ŋolo abunio iŋes kilocokinio akwap ŋina aya ŋakipi kituruwo acumbi.

²⁴Iyookino aneni a ŋulu enupito iŋes akiwuapit iŋes, nai etyonikinit nooi ŋulu aronok akiwuapit ŋuna ka Akuj.

²⁵Ŋinapei anakisyakinet aponi tosubunae ŋiboro erae ŋulu ejokak aŋuna ka akitiya ŋuna ajokak, nai aŋuna a ŋikasecak aponi, tosubunae ŋiboro ŋulu ajokak ka ŋulu aronok.

²⁶Ŋiboro ŋulu iitanit ituŋanan anakiyar keŋ erae ŋakipi, akim, ŋasuwa, acumbi, ŋakirya ŋuna a ŋaganoi, ŋakile, ao ka epiini ŋolo ecuunitae, akimyet ta ŋilowi.

²⁷Ejokak lu daadaŋ aŋuna a ŋini iwuapit ŋuna ka Akuj, nai ŋikasecak eŋerete ikes ŋun toloto akitiya aronis.

²⁸“Eyakasi ŋikuwuamisinei ŋulu itiyaunitae aŋuna ka akinyaŋarya ŋakiro, ido anaryenyeo kec epedorete ikes aukor ŋimoru aneni sek eya; alotooma akoloŋit ŋina ka akinyasuno, ebuni aneni kec agogoŋu ŋina aryenyaanan, ido kitidipokis aŋoit a ekasubunan kec.

²⁹Aponi tosubunae nu daadaŋ aŋuna ka akinyaŋia ŋakiro: Akim, ŋakako, eron, edeke,

³⁰ŋityaŋ ŋulu anyamak, ŋikiitonia, ŋapomya, ka ŋiboro ŋulu isitiyaete ŋituŋa aarya ŋulu nyiwuapito ŋuna ka Akuj ikotere tomunyarae.

³¹Elelyanete ŋulu iwuapito ŋuna ka Akuj itiyaete ŋuna ecamit Akuj, etenito jwi jwi akitiyanakin Akuj anakwap a na, ido ani ebuni apaki ŋina a ŋican, nyeŋerete ikes akiwuapit akirot ŋina ka Akuj.”

³²Aŋun, ŋinapei anakisyakinet adau ayoŋ acamun nu daadaŋ, ido adau atamatam ejok ka ewuak nakigireta ikote ne:

³³Ejokak ŋiticisyo ŋulu ke Ekapolon daadaŋ ka ikiinakini iŋes ŋinibore iitani daadaŋ anapaki a ŋina itemokino.

³⁴Emam ituŋanan etemari, “Nyejok en ikwa ŋin,” anerae ejokuni ŋinibore daadaŋ anapaki aŋina itemokinitoe aŋuna keŋ.

³⁵Aŋun tokona, toeok ekipur a etau kon a daadaŋ ka a etoil kon ka tolakar aŋuna a ekiro a Ekapolon.