Read ngakarimojong Sir 4 Bible Online

Sir 4 - ngakarimojong bible

Sir 4

¹Ŋiticisyo ŋulu emaikina kitiyae lokulyak ka neni a ŋulu iteryamunitae ŋican Ikaakoku nyitunae ŋikulyakanotin anakiyar kec, nyiturubak ikes ikidarito iyoŋ akiŋarakin ikes.

²Nyisiyaloloŋ ŋulu enyamit akoro, kori nyitoŋo ŋini eyakar akiitanit.

³Nyiyatak ŋican neni a ŋulu eryamunito ŋican, kori nyiŋel ainakin ibore neni a ŋulu eyakatar akiitanit.

⁴Nyiŋer ŋulu ilipanar aŋuna a ŋican, kori nyimwaŋ ŋulu ekulyakaka.

⁵Nyimulen ŋulu eyakatar akiitanit, ido nyicamak ituŋanan idio eyakaunor ŋakiro ŋuna ikicenio iyoŋ;

⁶anerae ani kenomosi ituŋanan ŋakiro etau, epedorete ŋice akicen iyoŋ, iirari ekasubunan kec akecekilip.

⁷Toruwor ŋini imina ayakau natukot ŋina ilipyata ŋituŋa; toryedik aneni a ŋulu itopolooritae.

⁸Topupok ŋakiro ŋuna elimunete ŋikulyak, ido toboŋok ekecemalas pa iryenyaana.

⁹Toiu ŋulu isicanitae aneni a ŋulu isicanito ka nyikuryaniar akitub ŋakiro aŋuna kec.

¹⁰Toruwor papa a ŋikokyok ka kikwaanikin aneni a toto kec ka ekile keŋ; ikwaanikin nai iyoŋ ka ikoku a papa a ŋolo alokidiama nooi, ido ikiminakini iŋes iyoŋ akilo neni ikiminar toto kon. Ŋiropito ŋulu ka aosou

¹¹Itatami aosou ŋidwe keŋ ka iŋaranakini ŋulu iwarito iŋes.

¹²Ituŋanan ŋini emina aosou emina akiyar, ido ŋulu iwarito aosou ŋinapei taparacu ilelebikin alelyanu.

¹³Ituŋanan daadaŋ ŋini emina nooi aosou, eryamuni apolou, ido iterereŋi Ekapolon akibois ŋina elomari iŋes.

¹⁴Ŋituŋa daadaŋ ŋulu itiyaete ŋuna ka aosou, itiyanakinete Akuj ŋina asegan; emina Ekapolon ŋulu eminasi aosou.

¹⁵Ŋituŋa daadaŋ ŋulu iwuapito ŋuna ka aosou, eruwor ŋikatubok anakwapin, ido ŋulu daadaŋ iwuapito ŋuna ka aosou iboiyete erae ŋulu eiuna.

¹⁶Ani kerubakis ŋituŋa ŋul ikinyoma, eryamunete aosou; eryamunete ŋiletok kec daŋ aosou;

¹⁷anerae isitori mono aosou ikes lorotin ŋulu atyonok, einakini ikes ekabule totamakis atemar nyipedori akiyar ikoŋina, toyenut ŋakiro akitodol ŋina ikinyomia aosou ikes; ido isicani aosou ikes alotooma akitatamun, ido ikatakini aosou ikes alotooma ŋuna etubunit iŋes.

¹⁸Eboŋuni nai ebuni aosou neni kec, ido inak ikes alelyanu, ido kisileerek ikes ŋakiro keŋ ŋuna imunono.

¹⁹Ani keoliyosi ikes, eŋeri aosou ikes, ido kipotok ikes nakinyasuno kec.

²⁰Kiteunito ŋapakio ŋuna ajokak ka toyenete ŋuna aronok, ido nyikiruma ŋileec tojamuwaros make.

²¹Eyai aleecenut ŋina ikiyai nasecit ka eyai aleecenut ŋina ikiyai nakitopolooro ka nakitojokyo.

²²Nyirae ŋini iikinit epeiwae, ido yau akinyasuno nakuwan kon, kori nyipega ŋakiro ŋuna iyookino, ido kidupo akiyar kon.

²³Nyiwou akirworo apaki ŋina emaikina kirworya ka nyiwua aosou kon;

²⁴anerae eyenunio aosou anakiro a ŋuna irworoe ka eyenunio ŋuna iyeni iyoŋ alotooma ŋakiro ŋuna elimunio.

²⁵Nyemaikina kirwor itoroniyarit ŋuna a kire, nai ikiruma ŋileec aŋuna ka abaŋao kon.

²⁶Nyikiruma ŋileec alimor ŋasecisya kon ka emam ajokis akiretakin ŋakipi ŋuna eleleete anaŋolol.

²⁷Nyiruwor irukitos a ibaŋaanot, kori ŋini nyicamit arukit ka ekepukan.

²⁸Toji tari natwanare aŋuna a kire, ido eji Ekapolon Akuj aŋuna kon.

²⁹Nyirworo alorwor kon ŋakiro car, kori nyikalanyana ka nyijamaana aloticisyo kon.

³⁰Nyidedeŋ alore kon ikwa eŋatuny, kori nyitamatamae atemar kori itiyaete ŋiketiyak kon ŋuna aronok.

³¹Nyiopeyo akan kon aŋuna ka akijaun ibore, ido tomukite bo iyoŋ akan kon ainakin ŋinice ibore.