Read ngakarimojong Sir 40 Bible Online

Sir 40 - ngakarimojong bible

Sir 40

¹Akiyaloloŋ a ŋituŋa Aponi kiwuakinae etic ŋolo agogoŋon aŋuna a ŋituŋa a daadaŋ ka aponi kiwuakinae ayokot ŋina apotyon neni a ŋiletok ka Adam, aponi kiwuakinae ŋun ameun anapaki a ŋina alomuniata ikes anakookyes atatoto kec akitodol akoloŋit ŋina eboŋoryata ikes nalup ŋuna etiyaunere ŋituŋa daadaŋ.

²Aŋayaŋayat ka akuryanu ŋina ke etau erae ŋuna kec ka erae ŋina kec akiyaloloŋ a ŋatameta kec aŋuna ka akoloŋit a ŋina ka atwanare kec.

³Eyakaun ŋun neni a ŋini eyai lokicoloŋ ŋolo ka apolou akitodol neni a ŋini eperi aŋuna a ŋican keŋ napuwa ka lokuron.

⁴eyakaun ŋun neni a ŋini enapit ŋilowi ŋulu kipura ka ebokot, akitodol neni a ŋini enapit ŋiguniyae,

⁵eyakasi anyunyura, alilit, ŋican ka amamukau akieŋun, akuryanu aŋuna ka atwanare ka aŋoit ta ebura. Ani ŋina ieŋunia ituŋanan alokitaada keŋ, isiguryaete ŋajo keŋ nakwaare ŋatameta keŋ.

⁶Ieŋununui iŋes apaki ŋina edit, kori nyieŋununui; ikolerit iŋes anajo lopite ŋolopei nyejotoo naparan. Iteryamunito iŋes ŋitorubei ŋulu eya natameta keŋ ŋican ikwa ituŋanan ŋini abucun alojie.

⁷Ani edoli iŋes neni eiunor, tokyenyu, ekenyuni nai iŋes ebulit etami atemar kemam ibore emaikina iŋes ebulitor.

⁸Eyakaunun nu neni a ŋisubuna a daadaŋ, neni a ŋituŋa ka ŋityaŋ nai eyakaunun nooi ŋarwa ŋakanikaarei neni a ŋikasecak,

⁹eyakaun atwanare, aara, ejie, aara a ŋileŋia, ŋican, eron ka akinyasuno ta ŋidekesyo.

¹⁰Aponi tosubakinae ŋun daadaŋ aŋuna a ŋulu aronok ka aŋuna kec abu bu akalele.

¹¹Eboŋorete kwap daadaŋ ŋulu erae ŋulu ka akwap ka ŋulu alokidiama eboŋorete kidiama. Nyerubakini amamukau akiyookino elosi kiŋaren

¹²Elemaryo jik ŋakaluŋuluŋui ka amamukau akiyookino, nai erubakini anupit ŋina ajokan ŋikaru ka ŋikaru.

¹³Edaun ebari a ŋulu emamukatar akiyookino lopite ŋolo edaunotor ŋakipi anaŋolol, eŋopiyarete lopite ŋolo eŋopiyarya agirokinet a akiru a ŋina apolon.

¹⁴Ikwapei eyakar ituŋanan ŋini arimaanan ŋakiro ŋuna emaikina tolelyania, aŋun, emunaar nooi ŋulu ebilibiliyete ŋikisila.

¹⁵Eyakaunotor ŋidwe a ŋulu nyiwuapito ŋuna ka Akuj ŋarereŋisyo ŋuna ekudyoko, ikwaanikin ikes ka ekitoe ŋolo elomunit anataaba aneni ekudyoko ŋalup.

¹⁶Erutoryo atipei eot ŋolo elomunit alodiyete ŋakipi, kori alokipetot ka aŋolol, itiyao ŋun eriŋa nyerutoro ŋinya ŋuluce.

¹⁷Nai ikoni arimaanut emanikor ŋolo eyakatar ŋarereŋisyo, ido erubakini ainanakin ŋainanakineta eyai ŋikaru ka ŋikaru. Alelyanu ŋina ka kiyar

¹⁸Erae eropit ŋolo a elap, kori a koloŋit ka apei ibore ŋini itoboboe akiyar, nai aryamun ebari iloit ŋuluarei ŋul.

¹⁹aryamun ŋidwe kori adukokin etaun, iturubakini ekiro a ituŋanan, nai aryamun aosou iloit ŋulaarei ŋul. Ani eyakar ituŋanan ŋaatuk, kori emanikor a ŋikito a ŋaraito, elosi akiyar keŋ kiŋaren ejok, nai ejok aberu ŋina nyitoroniyaritae akilo ŋuluarei ŋul.

²⁰Italakarete etau epiini ka aeo, nai ejok nooi amina ŋina a ŋikonei akilo ŋuluarei ŋul.

²¹Eyaunete eruye ka apilu ka aduŋgu aeo ŋina abobon, nai ejok nooi etoil ŋolo eo ejok akilo ŋuluarei ŋul.

²²Iburit akoŋu akiŋolikin ajokis ka akibuses, nai ejok akilo ŋuluarei ŋul akiŋolikin ŋikinyom elomunete.

²³Ijaunitae ekone, kori irukitos ŋapakio daadaŋ, nai ejok aberu ŋina aoson akilo ŋuluarei ŋul.

²⁴Erae ŋiyeneta ka ŋikeŋarakinak ŋulu iitana apaki ŋina a ŋican, nai iikiunete ŋainakineta ŋuna iinanakini iyoŋ ŋuluce akilo ŋuluarei ŋul.

²⁵Itabarete egolid ka esilipa ituŋanan, nai akitatamo ŋina ajokan, iloit ŋuluarei ŋul.

²⁶Ikiinakinete ebari ka agogoŋu akikinyoma bon, nai akitopoloorit Ekapolon, iloit ŋuluarei ŋul. Emam ibore icanakin ituŋanan anakitopoloorit Ekapolon, ido ani kitopoloorit ituŋanan Ekapolon, emam ajokis akiwarit akiŋarakino.

²⁷Ikwaan akitopoloorit Ekapolon ka emanikor ŋolo eyai arereŋu, ido ilopiyarito ŋun ituŋanan akilo adiopolou. Aronis ŋina ka akilipanar

²⁸Ikaakoku nyiruwor ikelipanaran anakiyar kon; ejok atwanare akilo akilipanar.

²⁹Ani kiŋolyanakini ituŋanan ibore ŋini eyai lomesa a ŋinice, nyetamakinio akiyar keŋ erae akiyar. Itajamuwar ituŋanan ŋuluce aŋuna a ŋamuja kec, nai ituŋanan ŋini epiiryana ka kitatamitetei, ecoikinit ŋuna ikote ŋun.

³⁰Ebobokinit ŋikelipanarak akirworo ŋakiro ŋuna ka akilipanar nai eyenete ikes atemar nyejokak ŋun aneni a ŋuluce.