Read ngakarimojong Sir 41 Bible Online

Sir 41 - ngakarimojong bible

Sir 41

¹Ŋuna etapito atwanare Okoe atwanare, erae ibore ŋini aronon atamatam ŋuna kon aneni a ituŋanan a ŋini eyakar ekisil aloboro keŋ, a ŋini emam ŋuna emaikina kiyaloloŋio ido itiyae ejok alotooma ŋuna itiyae daadaŋ ka ŋini eriŋa egogoŋ aŋuna ileileya akimuj keŋ!

²Okoe atwanare, erae ibore ŋini ajokan ayakaun iyoŋ neni a ituŋanan a ŋini eyakar akiitanit, ido tomamukar agogoŋu, a ŋini anyamun aŋuna ka amojoŋu ka akiitanit ŋina a ŋibore a daadaŋ; erae atwanare ibore ŋini ajokan aneni a ŋini epegana ka nyepedorit akidaŋidaŋ.

³Nyikerit atubokino atwanare; totamunite ŋulu adaut atwakare eriŋa iyoŋ ka ŋulu etwakete ekaku kon.

⁴Erae ŋun ŋuna etubunit Ekapolon aŋuna a ŋituŋa a daadaŋ; kaanukiro nai iŋeryo iyoŋ acamit ŋina ka Akuj a ŋina alokidiama nooi? Tari keyar ituŋanan ŋikaru ŋitomon, kori amiat, kori aliput, mam ŋakiŋiseta ŋuna iŋisyo iŋes anakibois a ŋikatwak. ŋican ŋulu eryamunete ŋituŋa ŋulu aronok

⁵Erae ŋidwe a ŋikasecak ŋisiilyanotin ka erubakinito ikes eya nakituro ŋina a ŋulu nyiwuapito ŋuna ka Akuj.

⁶Eŋopiyarete ŋiboro ŋulu irumete ŋidwe a ŋikasecak aneni atapapa kec ka eruwor ŋidwe kec ŋulu emam ajokis ŋikaru ka ŋikaru.

⁷Itoroniyarete ŋidwe papa kec ŋolo pa ewuapit ŋuna ka Akuj, anerae alemar ajokis aneni kec aŋuna keŋ.

⁸Ekaŋ iyes ŋulu nyiwuapito ŋuna ka Akuj, iyes ŋulu iŋero ŋikisila a Akuj a ŋina alokidiama nooi!

⁹Ani kiyakatar iyes ŋidwe, eryamunete ikes ŋican, iuruunete iyes ikes aŋuna ka akigworo bon. Ani ikigukini iyes, eyakaun alyokonu ŋinaruba ka ani itwakete iyes, ŋicen ikes irumete iyes.

¹⁰Ibore daadaŋ ŋini ebunit alokwap eboŋori kwap, aŋun, ŋulu nyiwuapito ŋuna ka Akuj, elomarete locen ka namunyaro.

¹¹Erae akuwan a ituŋanan ŋina iburiburi anyamun atipei, nai nyikisaryo ekiro ŋolo ajokan.

¹²Kitojokite ekiro kon, anerae erubakini iŋes eyai akilo tari kitwana iyoŋ, erubakini iŋes eyai akilo tari egolid ŋolo ileleba ŋisitowae aliput.

¹³Imaruna ŋirwa ŋulu ka akiyar a ŋina ajokan, nai erubakini ekiro ŋolo ajokan ŋikaru ka ŋikaru.

¹⁴Ŋidwe kaŋ, toruworos ŋulu a kire anakiro a ŋuna ikitatamitae iyes, ido toyakatar ekisil alokidiŋ kus. nyaani ajokis eyai kidiŋ ŋunaarei nu, aosou ŋina iwuaitae ka ebari ŋolo nyiteo? Ŋakiro ŋuna alalak ŋuna nyikwaaniara

¹⁵Ejokak ŋituŋa ŋulu iwuaito abaŋao kec, akilo ŋulu iwuaito aosou kec.

¹⁶Aŋun, kitoodiutu akitopoloorit ŋakiro kaŋ; anerae nyejok aryamunit ŋileec anakiro a daadaŋ, kori nyejok acamakin ŋakiro daadaŋ ŋuna ikisirumete ŋileec.

¹⁷Emaikina iyoŋ ikirumito ŋileec aŋuna ka aryamun ŋikauruunak kon iyoŋ irae imalaanot ka erae ŋileec alyokonu alokiŋaren erwosit, kori ekepukan;

¹⁸emaikina ikirumito iyoŋ ŋileec alokiŋaren ekatubon aŋuna isecitor iyoŋ ka ikirumito ŋileec alokiŋaren atukot a ŋituŋa aŋuna ka ajamakinit ŋikisila; emaikina ikirumito iyoŋ ŋileec alokiŋaren aberu kon, kori ekile kon, kori ekone kon; aŋuna nyitiyaa iyoŋ ŋuna iyookino.

¹⁹Emaikina ikirumito iyoŋ ŋileec aŋuna ka akoko anakibois a ŋina iyai iyoŋ. Emaikina ŋileec ikirumito iyoŋ akiŋer ŋuna idau iyoŋ akikoŋ, kori acamun ka ŋinice, kori akiwuakinit akan kon nabokony iyai neni imujere; kori akitoodiunit esiŋir ŋolo ka aŋoit apaki ŋina ijaunia ibore, kori ŋina ipotorya ibore.

²⁰Emaikina iyoŋ ikirumito ŋileec akililiŋ alokiŋaren ŋulu ikimalaete iyoŋ; kori akiŋoliyarit neni a amalaat

²¹ka akiŋer adyekitoi ŋina a iyenet kon; kori alemar ibore ŋini ekorakinitae ŋinice, kori einakinitae ka akitere aberu, kori ekile a ŋinice.

²²Emaikina iyoŋ ikirumito ŋileec akituruwor aketiyan, kori eketiyan a ŋinice aberu kon, kori ekile kon, ido nyiyapiya tari lokitaada keŋ; emaikina iyoŋ ikirumito ŋileec akirworo ŋakiro ŋuna a ŋiyany alokiŋaren ŋikonei kon ka nyiyanyi ŋuluce kidau ainakin ibore.