Read ngakarimojong Sir 42 Bible Online

Sir 42 - ngakarimojong bible

Sir 42

¹Emaikina ikirumito iyoŋ ŋileec aboŋokin akirworo ŋuna iira iyoŋ ka alimor ŋakiro ŋuna imunono. Ani kitiya iyoŋ ŋun, itoodiuni iyoŋ ŋuna iyookino anamamukau ka ŋileec, ido iruwor iyoŋ ŋini ijok aneni a ŋituŋa a daadaŋ. Nyikiruma ŋileec alotooma ŋiboro lu ka nyisec aŋuna ka akitopoloorit ŋituŋa ŋuluce:

²Nyikiruma ŋileec aŋuna a ŋikisila a ŋulu ka Akuj a ŋina alokidiama nooi ka aŋuna ka acamunet keŋ ka aŋuna ka atubokin ŋulu nyiwuapito ŋuna ka Akuj.

³Nyikiruma ŋileec aŋuna ka akiyokit ŋisiliŋa a irukitos kon, kori a ŋini irukitotor iyoŋ ilosete ka akikor ŋiboro ŋulu sek eyakatar ŋikonei.

⁴Nyikiruma ŋileec akisitiya ŋakipimeta ŋuna iyookino ka aryamun ŋiboro ŋulu alalak, kori ŋulu ekudyoko

⁵ka aryamun epoida anagyelanakin ŋimucurus ŋiboro ka akitatam ŋidwe a ŋinapaki ŋipitesyo ŋulu ajokak ka akibuŋa ipito ŋini aronon tari kelomut ŋaokot alokaku.

⁶Neni eyai aberu ŋina nyikinyoma, emaikina kiwuakinae akikoŋiet; ido neni eya ŋituŋa ŋulu alalak, emaikina egolitoe ŋipukei aŋuna a ŋiboro.

⁷Ani kiŋadak iyoŋ ibore idio, emaikina kimarae, kori kipimae etyae, ido ani ipotori, kori ijauni iyoŋ idiobore, emaikina ŋun daadaŋ kigiritetei.

⁸Nyikiruma ŋileec alimokin ŋini nyeyeni, kori ibaŋaanot atemar nyiyookino ŋuna itiyae iŋes, kori ŋini emojoŋit ŋini iilit aŋuna ka amalao keŋ. Ani kitiya iyoŋ ŋun, itoodiuni asyomit kon, ido ijokyar iyoŋ aneni a daadaŋ Ŋidwe ŋulupesur ka atapapa

⁹Eyakar papa atamatam jik ŋina imunono aŋuna a ikoku keŋ a ŋinipese ka iyaloloŋi iŋes aŋuna keŋ nyejotoonor. Ani eriŋa apese ŋin esorokana, etamatamae papa keŋ atemar kori acepaki nyiisyo iŋes, kori ani kiisi, etamatamae iŋes atemar kori elakio;

¹⁰ani nyiryamakina ke ekile, etami iŋes atemar itamalaanio, ido kitopoti iŋes alore a papa keŋ; kori ani keryamu ekile, epedori acepaki adokin, kori tari kiisi, epedori acepaki aruwor ŋina ekolupana.

¹¹Tocoikinite ka agogoŋu ikoku kon ŋinipese ŋini egogoŋ akou, acepaki ikituruwori iŋes iyoŋ ŋolo ikikyenatar ŋimoe kon, ŋolo ikirworotor ŋituŋa alotaun ka anatukot a ŋituŋa, ido ikisurum iŋes iyoŋ ŋileec aneni etukokin ŋituŋa. Taanyu atemar mam ŋidirisae anagule keŋ, ka emam nenimukur neni irereo iŋes ŋirotin ŋulu epote kai.

¹²Nyiesik iŋes itoodiunit akibuses keŋ alokiŋaren ekile edio, kori erukito ka ŋaberu ŋuna iitit,

¹³anerae eponeneete ŋakimom alonapen ka neni ka aberu etakanunia aronis ka aberu.

¹⁴Ejok aryenyeo a ekile akilo aberu ŋina itojoka; erae aberu eyauni ŋileec ka elemanari ajokis. Ŋiticisyo ŋulu ka Akuj alosubuna keŋ

¹⁵Atamuni tokona ayoŋ ŋiticisyo ŋulu ke Ekapolon ka alimori ayoŋ ŋuna eŋolik. Apotu kitiyakin ŋuna acamit Akuj alotooma akirot keŋ ka itiyaete ŋisubuna keŋ daadaŋ acamit keŋ.

¹⁶Inwakunit akoloŋ alokidiama ibore daadaŋ a akica keŋ ka ileleba apolou ŋina a Ekapolon loticisyo keŋ.

¹⁷Nyeinakina Ekapolon apedor tari neni a ŋimalaikan keŋ akimarun ŋiticisyo keŋ daadaŋ ŋulu ka aumokin. ŋulu adau Ekapolon ŋolo etiron akiwuakin, ikotere etakani ibore daadaŋ isileereunit apolou a Ekapolon.

¹⁸Eripiripi iŋes ŋauwuata ka ŋitai a ŋituŋa; Eyeni iŋes ŋuna iwuaitae alotooma kec; anerae eyeni Akuj ŋina alokidiama nooi ŋuna daadaŋ emaikina toyenunae; ite iŋes ŋinapei koloŋ ŋiboro ŋulu etakanunete.

¹⁹Isileereuni iŋes ŋuna koloŋ sek ayakasi ka ŋuna etakanunete, ido isileereuni iŋes neni kitorunete ŋiboro ŋulu iwuaitae.

²⁰Mam atametait ebucar aneni keŋ ka emam ibore iwuaitae ŋini nyeyeni iŋes.

²¹Esibak iŋes ejok akibuses ŋina ka aosou keŋ; erae iŋes ŋinapei koloŋ Akuj ŋinapei ŋin. Mam ibore epedoryo akiyatakin neni keŋ, kori alemar aneni keŋ, ido nyiitanit idiobore toruwor ikesirworiunan keŋ.

²²Okoe etya ai epite ŋolo ikiburitotor ŋiboro daadaŋ ŋulu itiyaunit iŋes ka etya ai amilimil ŋina eyakatar ikes iŋolikini!

²³Eyakasi ŋiboro lu daadaŋ ka erubakinete eya ŋikaru ka ŋikaru; iturubakinitae ŋinisubuna eyai aŋuna ke etic a ŋolo esubunitere.

²⁴Eponeneete ŋiboro daadaŋ a ŋiarerei, erae ipei ŋiniberu ka ipei ŋinikile ka mam ibore asubu iŋes pa itiyaunitae erae ŋini ejok.

²⁵Irikanakini ibore ipei ajokis a ibore a ŋinice. Ŋae eupi akitere apolou ŋina ka Akuj alorwa keŋ a daadaŋ?