Read ngakarimojong Sir 43 Bible Online

Sir 43 - ngakarimojong bible

Sir 43

¹Akibuses ŋina ka akoloŋ Akibuses ŋina ka akica a ŋisubuna a ŋulu alokidiama iŋes ŋina ileereo ibore daadaŋ alokidiama yok. ibus nooi kidiama iŋolikini.

²Ŋina elomunia akoloŋ, esibit iserae atemar alomu ayoŋ, erae iŋes ibore ŋini esubunit Akuj ejok nooi, etic ŋolo a ŋakan keŋ.

³Itooni iŋes akwap kidiŋ apaaran ka ŋae epedori akidaŋidaŋ amwanis keŋ?

⁴Epedori ituŋanan ŋini itiyae lokitet akidaŋidaŋ amwanis alokitet, nai emwana ŋina ka akoloŋ ŋarwa ŋauni akilo, enomiyari amwanis keŋ tari ibore ŋini elomunit alomoru. iwuari amwanis keŋ nooi ka ikinwuakete ŋikoi keŋ ŋakonyen.

⁵Epol Ekapolon ŋolo abu tosub akoloŋ analimunet a ŋina ke Ekapolon ionyanakini akoloŋ aneni itorenene. Akibuses ŋina ke elap

⁶Erae elap etyakatyakat ŋapakio ŋuna a ekaru, ipukat ŋarwa, itoodiununui iŋes ŋakiloconokineta ŋuna a ŋikaru ka ŋikaru.

⁷Erae elap iwuapitae iwuanakinio ŋapakio ŋuna a ŋasuban, ecaununui akica keŋ nooi, ido tonyipinyipiyo.

⁸Elap ŋolokitete ikwapei enyaritere a ekiro a ŋol, itoodiunit akitetyanut keŋ; erae iŋes ŋolo ibus nooi apaki ŋina elomununuya kikeun einanakini iŋes akica neni a ŋikacer a ŋulu ecayete anariwo a ŋina alokidiama. Akibuses ŋina a ŋikacer ka alokakinet

⁹Erae akibuses a ŋikacer eyaunit akibuses ŋina alokidiama, ŋisubuna ŋulu emilimilete ibakito alokidiama aneni abu Ekapolon tosub.

¹⁰Ewuaasi ikes anakiboisyo kec a ŋuna abu Ekapolon ŋolo asegan kiwuak ikes toyakaun. Nyejoŋoeneneete ikes akitiya ŋuna itiyaunitere ikes.

¹¹Kiŋolikisi mono iyes alokakinet, ido kipuro iŋes ŋina etiyauni iŋes; ibus iŋes nooi anamilimil keŋ.

¹²Eluguruuni iŋes ibore ŋini esibit atutubet a ekorobe ŋini ebusan alokidiama ŋini erae ŋakan ka Akuj a ŋina alokidiama nooi ikes epetanakinete iŋes. Akibuses ŋina a ŋisubuna ka Akuj

¹³Analimunet a ŋina ka Akuj iyakuuni iŋes ekuno ŋolo ekeri, ido kikirikiriun akimilyaunet ŋina ka atubonokin keŋ.

¹⁴Aŋun, eŋaar ŋipukei ŋulu a ŋisitowae keŋ, ido eporete ŋidouwon lopite ŋolo eporyoto ŋikeny.

¹⁵Einanakini iŋes anailiil keŋ ŋidouwon agogoŋu kec, ido tobwaŋabwaŋaun ŋakako edisyak.

¹⁶Ani irworikini iŋes, iguryakin akwap enomorito ŋakiro; emaranikinete ŋimoru aŋuna ka agogoŋu keŋ.

¹⁷Anacamit aŋina ka Akuj, ekutuni ekuwuam alowae a ŋolo alokwap, ekutuni ŋolo ipiripiri ŋolo apolon alo Kuju, iyakununui iŋes ekuno todou kwap lopite ŋolo edooto ŋikeny kwap, epetakin ekuno ŋol kwap lopite ŋolo epetakinor emaase kwap tokilikil akwap.

¹⁸Ilorei ŋakonyen akibuses ŋina ka akwaŋis keŋ, ido eumokinete ŋatameta apaki ŋina edoiunio iŋes kwap.

¹⁹Ecakuni iŋes ekwok a ekuno torapuwa akwap ikwaan ka acumbi ido kidikok lokito ŋulu a ŋatur ka ŋikukwa erae ŋakako.

²⁰Ekutuni ekuwuam ŋolo alilimon alo Kuju, ido kidikokis ŋakako anakipi; ido toyakaun nataparin daadaŋ ŋuna eya ŋakipi, tonapa ŋakipi ikes ikwa arapet anatorobu.

²¹Emunyanari Akuj ŋimoru ka icunyanari aloŋisat, ido itirinyiyonori ŋinya ŋulu alibunak lopite ŋolo itirinyiyonorya akim.

²²Itojokuni elwac atipei ibore daadaŋ; eyaununeete ŋakopi akitetyanut nibore ŋini sek emunaarit amwanis.

²³Anayeunet keŋ, abu Akuj kiturubak ŋanamyo pa iryaŋiryaŋasi ido abu kiwuak ŋiculeta tooma kec.

²⁴Elimununeete ŋulu elosete ananam a ŋameeli ŋatyokisyo ŋuna eya nen, ido ikiumonokini iwon aŋuna ikipupi.

²⁵Eyakasi tooma anam ŋisubuna ŋulu ebusak, eyakasi ŋikabilae a ŋisubuna a ŋulu eyarete daadaŋ ka ŋityaŋ ŋulu aburok nooi ikes ŋipiwa.

²⁶Aŋuna ka Akuj itiyaete ŋikiyakia keŋ daadaŋ etic kec ejok ka alotooma akirot keŋ, imorikina ŋiboro daadaŋ kaapei.

²⁷Kikipedo iwon alimun ŋuna alalak, nai nyikipedori alimun daadaŋ; emyekisi toruwor akirot ŋina esidyon na ebe “Akuj erae ibore daadaŋ.”

²⁸Ai ikipedorya iwon aryamunia agogoŋu ŋina ipurere iŋes? anerae epol iŋes akilo ŋiticisyo keŋ daadaŋ.

²⁹Ikitubuli Ekapolon ka epol iŋes nooi, ido ikituumokini akeepedor.

³⁰Kipur Ekapolon ka akitopoloorit iŋes alopite a ŋolo ipedorya iyoŋ, anerae iloit iŋes tari ŋun. Ani itopoloori iyoŋ iŋes, tocunak iwapei agogoŋu kon daadaŋ ka nyikiup, anerae nyipedori iyoŋ akipur iŋes ejok.

³¹Ŋae adau aanyuwar iŋes, ido kitam neni ikoni iŋes? Kori ŋae epedori akipur iŋes lopite ŋolo emaikina kipurore iŋes?

³²Elalak ŋiboro ŋulu epolok akilo lu ŋulu iwuaitae, anerae adau ayoŋ akiŋolikin, nai ŋidikudyo bon aloticisyo a ŋulu ka Akuj;

³³anerae Ekapolon etiyauni ŋiboro daadaŋ ka ainaki iŋes aosou neni a ŋulu iwuapito ŋakiro ŋuna ka Akuj.