Read ngakarimojong Sir 45 Bible Online

Sir 45 - ngakarimojong bible

Sir 45

¹Ka ŋolo amina Akuj ka tominas ŋituŋa, arae iŋes Moses ŋolo eriŋa ŋuna etamunitere iŋes erae arereŋu.

²Abu Akuj kitopoloo Moses ikwa ŋimalaikan, abu iŋes topoloor kituruwo ŋimoe keŋ ŋulu akuryaka aŋuna keŋ.

³Abu iŋes anakiro keŋ kitiya ŋakujuwuanisya ŋuna ka atipei; abu Ekapolon kitopoloo iŋes alokiŋaren ŋirwosi. Abu inak iŋes ŋakiciketa aŋuna a ŋituŋa keŋ, ido abu kisileerek neni keŋ apolou keŋ.

⁴Abu Akuj toseu iŋes aŋuna ka akikinyoma keŋ ka akiyapara keŋ; abu toseu iŋes alotooma ŋituŋa daadaŋ.

⁵Abu tocamak iŋes iirari etoil keŋ, ido toriko iŋes tooma lodou ŋolo eryono inak iŋes ŋakiciketa iteosi ka Akuj; inak iŋes ŋikisila ŋulu ka akiyar ka aosou, ikotere itatamia iŋes Yakob ŋakiro ŋuna ka acamunet ka itatamia Ŋisirael ŋakiro ŋuna etubunit iŋes. Aron

⁶Abu Akuj kitopoloo Aaron ekile ŋolo eyookino ikwa Moses ŋolo arae lokaato a Moses, ŋolo arae ŋolo ke ekabila a Lepi.

⁷Abu kiwuak acamunet ŋinaruba ka iŋes, ido inak iŋes asacaradotonu aŋuna a ŋituŋa. Abu Akuj kiterereŋ iŋes a ŋiboro a ŋulu amilimilak, ido kitanapik iŋes ekaaso ŋolo ka apolou.

⁸Abu kitanapik iŋes ŋilowi ŋulu ebusak nooi ka kitogogoŋ iŋes anainakin ŋiboro ŋulu itoodiunito apedor a ŋilowi a ŋulu amilimilak a ŋulu enapio alotooma ŋuluce, ekaaso ŋolo aoyan ta arapet.

⁹Kitanap iŋes elou ŋolo aya ŋikatelitel ŋulu ekwaan ka ŋaraito a ekitoe a ŋolo enyaritae pomegranate a ŋolo ikwaan ka ekacikicikit, abu kitanap iŋes ŋitworoi ŋulu alalak ŋulu etiyaunitae a egolid ŋulu ani elosi iŋes kiirarae alokai ka Akuj, ikotere totamu Ekapolon ŋituŋa keŋ.

¹⁰Abu kitanap iŋes ŋilowi ŋulu a etal ŋulu ewuanakinitae egolid, ŋilowi ŋulupusiyek ka ŋulu kipura ŋulu adonyunit ekadonyon ŋolo eyeni akidony ka eboli ŋolo etubere ŋakiro ka ŋolo ayai ibore ŋini isileereununui ŋakiro ŋini anyaritae Urim ka ŋini iyoonokini ŋakiro ŋini anyaritae Sumim.

¹¹Tonapite ausi ŋina kipurat-areŋan ŋina esonyunit ekasonyan ŋolo eyeni akisony; toyakas ŋamoru ŋuna epol egyelit ŋuna iciekinitae ŋirorwa, ŋuna ewuanakinitae egolid ŋolo itiyaunit ŋini itiyae ŋiboro ŋulu amilimilak; ŋulu ewuakinitae narapet akitatamunia Ekapolon ŋikabilae a Isirael ŋulutomon ka ŋiarei.

¹²Tonapite ebokot ŋolo ayai nakopiya, ŋolo etiyaunitae a egolid, akopiya ŋina egiritae ebe, “Asegis” akopiya ŋina etiyaunitae ejok nooi ŋina etiyaunit ituŋanan ŋini eyeni akitiya ejok, ŋina ebusan iŋolikini, ŋina esibusitae a ŋiboro a ŋulu alalak.

¹³Amam ŋiboro ŋul eriŋa iŋes nyitopolooro, emam ekapolon ece anapit ŋiboro ŋul nai ŋidwe keŋ ŋulusapa bon ka ŋiletok keŋ erubakinete enapito ŋiboro ŋul ŋikaru ka ŋikaru.

¹⁴Epeyo ŋamuronisya keŋ, ibore daadaŋ ŋarwa ŋaarei a ŋinakoloŋit jik.

¹⁵Abu Moses kituruwo iŋes esacaradoti ka kiosak iŋes akimyet ŋina asegan; arae ŋin acamunet ŋina a ŋikaru ka ŋikaru aŋuna keŋ ka aŋuna a ŋiletok keŋ ŋirwa ŋulu eyakar nakuj, aŋuna ka akitiyanakin Ekapolon ka akitiya etic keŋ ikwa esacaradoti ka akiterereŋ ŋituŋa a Ekapolon alokiro ke Ekapolon.

¹⁶Abu Akuj toseu iŋes alokidiŋ ŋituŋa ŋul daadaŋ a ŋuna ka aayenen ŋamuronisya neni ke Ekapolon, akicunyanakin ekinyate ikwapei eure ŋolo abobon ŋolo etamunitor Ekapolon ŋituŋa keŋ ka amookunun ŋituŋa anasecisya kec.

¹⁷Abu Akuj anakicikakinet keŋ, anakiro a ŋuna etubunit iŋes ka alokisila inak iŋes apedor, abu inak iŋes akitatam ŋiletok a Yakob ŋakiteyenikineta ka akisileeronokin Ŋisirael ŋikisila keŋ.

¹⁸Apotu ŋituŋa ŋulu agelaaka totukut akitidiŋ iŋes, ido apotu torakaaketa aŋuna keŋ analoŋisat. Arae ŋul Dasan, Abiram ka ŋikewuapak kec ta ŋirukitos a Kora, abu anyunyura ka aŋoit min neni a ŋul.

¹⁹Abu Ekapolon kiŋolik ŋun, ido abu nyelakar, ido anaŋoit keŋ a ŋina arirae, aponi ikes tomunyarae; abu Akuj kitiya ŋaumonokineta itoroniyarit ikes, tomunya ikes a akim a ŋina erirae.

²⁰Abu kiyatak apolou neni ka Aaron, ido inak iŋes ŋiboro ŋice, abu totyakaki neni keŋ ŋaraito ŋuna ajokak ŋuna esyaunak, ido kitemok ŋamugati ŋuna alalak ŋuna a ŋaraito a ŋuna esyaunak;

²¹anerae anyamete ikes ŋamuronisya ŋuna einakinitae neni a Ekapolon, akimuj ŋina ainakinitae neni keŋ ka ŋiletok keŋ.

²²Nai anakwapin a ŋuna akorakinitae ŋituŋa, emam ŋina erae ŋina keŋ ka amamukar iŋes atutubet alokidiŋ ŋituŋa; amam akibois arae ŋina keŋ, arae Ekapolon arae ŋolo keŋ ka akibois keŋ. Pineas

²³Abu Pineas lokoku a Eleasar toruwor ŋolo a ŋiuni anapolou aŋuna araakar iŋes ŋolo alelakinit akitopoloorit Ekapolon ka pa aŋayaŋayat ananupit keŋ apaki ŋina aŋerioto ŋituŋa Akuj; alotooma ainanakin ŋina a etau keŋ, abu tomooku Ŋisirael.

²⁴Aŋun, aponi kiwuakinae acamunet ŋina ka akoneo keŋ ka Ekapolon atemar itemokino iŋes toruwor ekarikon ŋolo ka akibois a ŋina asegan ka ŋolo a ŋituŋa keŋ ka atemar eryamunete iŋes ka ŋipapae keŋ apolou ŋina ka asacaradotonu ŋikaru ka ŋikaru.

²⁵Lopite ŋolo kiwuakinere acamunet ka Daudi lokoku a Yese a ŋolo alokabila a Yuda, atemar emaikina ŋini eruwor erwosit erae lokoku a erwosit, aŋun, ŋuna amaikina ŋiletok ka Aaron daŋ toryamut iŋes aruwor ŋisacaradotin.

²⁶Tokona, kipuroe Ekapolon ŋolo ikiinak iyoŋ apolou. Elipi kiwuak Ekapolon aosou natameta kon ikotere totub ŋakiro a ŋituŋa kon iyookino, ikotere nyedaun epite ŋolo itiyaata ikes ejok, ido torubak apolou kec ananyameta kec a daadaŋ.