Read ngakarimojong Sir 46 Bible Online

Sir 46 - ngakarimojong bible

Sir 46

¹Yosua ka Kaleb Arae Yosua lokoku a Nun ekile ŋolo etiron alojie ka arae iŋes abu kilunyokin napolou ekaku a Moses alotic a ŋolo ka akidwar. Abu iŋes toruwor ekaiunan ŋolo apolon a ŋituŋa ka Akuj a ŋuluseuna ikwa iteyenunitor ekiro keŋ, aŋuna ka akinyaŋarya ŋakiro a ŋimoe a ŋulu aremokino ŋituŋa keŋ ikotere eryamunete Ŋisirael ŋalup ŋuna eruwor ŋuna kec.

²Arae nooi ibore ŋini ka aumokin ŋakiro keŋ apaki ŋina ikiarya iŋes ŋakan keŋ ido kitijik a ekileŋ keŋ ŋitaunio eremokino.

³Ŋae epedori arubakin alojie ewoi alokiŋaren keŋ? Anerae aji iŋes ŋijiesyo ŋulu a Ekapolon.

⁴Meere mono aŋuna keŋ abunio akoloŋ towuoya aiwapei, ido abu apeikoloŋit tooyaar kikok ŋarwa ŋaarei a?

⁵Abu iŋes tonyara Akuj ŋina alokidiama nooi, Akuj ŋina etiron apaki ŋina erikauniata iŋes ŋimoe alowaetin a daadaŋ, ido abu Ekapolon ŋolo ka apedor toboŋok akilip keŋ, tocaku ŋakako ŋuna ka apedor keŋ a ŋina etiron.

⁶Abu iŋes kitubul ŋituŋa ŋulu ka akwap a ŋin ka abu Yosua tomunya ŋulu ajioto iŋes anadipoe a ŋimoru, ikotere eyenuniata ŋakwapin epite ŋolo agogoŋio Yosua alojie ka atemar, aji iŋes alokiŋaren Ekapolon, anerae arae iŋes ŋolo ainakina anakiwuapit Akuj ŋina etiron.

⁷Alorwa a Moses, abu Yosua kitoodiu akitopoloorit keŋ Moses ka Akuj; apotu iŋes ka Kaleb lokoku a Yepune kitoodiut nu: Apotu ikes kitepega atukot a ŋituŋa kiteesikis ŋituŋa ŋasecisya, ido kisililiŋa aronis ŋina eŋuruŋuratar ikes.

⁸Alotooma ŋikajiok ŋulu alosete a ŋakejen ŋalipyo ŋamiae ŋakanikapei, Yosua ka Kaleb bon aponi kimyekinae aŋuna ka arikoria ŋituŋa nakwap ŋina amaikina toruwor ŋina kec, nakwap ŋina elelyaata ŋakile ka ao.

⁹Abu Ekapolon inak Kaleb agogoŋu ŋina abu kidoŋ neni keŋ tari namojoŋu aŋun, abu iŋes tolot nakwap ŋina a ŋikamukumukui, ido apotu ŋidwe keŋ toryamut akwap ŋin, toruwor ŋina kec.

¹⁰Ikotere epedoryata Ŋisirael daadaŋ aanyun ajokis ŋina ka akiwuapit Ekapolon. Ŋikatubok

¹¹Erae lu daŋ ŋikatubok, elimunitoe ikes a ŋirorwa kec, arae ikes ŋulu pa apotu kiwuapa ŋakujo ŋace alotai kec, apotu ikes nyeŋero akiwuapit ŋuna a Ekapolon; Elipi torubakinae etamunitae ikes anakitopoloorit.

¹²Elipi bu akiyar ŋinakitete aneni eperyoto ŋakoyo kec, elipi kiboiyoto nabo ŋirorwa a ŋulu aponi kitopolooroe aneni a ŋipapae kec.

¹³Amina Ekapolon keŋ Samuel; arae iŋes ekadwaran ŋolo ke Ekapolon, abu iŋes kisyak apukan, ido abu kiosak akimyet neni a ŋulu apotu toruwor ŋikapolok a ŋituŋa keŋ.

¹⁴Abu iŋes totubonok atukot alokisila a Ekapolon, ido abu Ekapolon kiyok ŋituŋa a Yakob.

¹⁵Aponi kisileereunoe iŋes erae ekadwaran aŋuna ka akikinyomit keŋ Ekapolon, ido anakiro keŋ, abu iŋes toruwor eketeyenikinan ŋolo ekinyoma nooi.

¹⁶Abu iŋes tonyara Ekapolon Akuj ŋina etiron, apaki ŋina erikauniata ŋimoe keŋ iŋes alowaetin a daadaŋ, abu iŋes inak ikwa amuronot ikale ŋini ariŋa enaki.

¹⁷Abu nai Ekapolon togirok anakuj, kimyek etoil keŋ kiirarae erwo ka apedor a ŋina etiron.

¹⁸Abu iŋes toreu ŋikarikok a ŋimoe ka ŋikepukak a Ŋipilistin daadaŋ.

¹⁹Ani eriŋa Samuel nyetwana, abu tolimu ŋakiro nu aŋuna a Ekapolon ka erwosit ŋolo abu iŋes kiosak akimyet, abu tema, “Emam iborosit, emam tari ŋamuk alema ayoŋ aneni a ituŋanan a idio.” Emam ituŋanan idio abu kisitak Samuel.

²⁰Tari kedau iŋes atwanare, abu iŋes todwar, ido kiteyenik erwosit Saul epite ŋolo etwania, ido abu etoil keŋ kirworik analup edwari atemar kikisarae aronis ŋina a ŋituŋa.