Read ngakarimojong Sir 47 Bible Online

Sir 47 - ngakarimojong bible

Sir 47

¹Nasan Ekaku a Samuel, abu Nasan kisyak akidwar alorwa a Daudi. Daudi

²Aponi toseunae Daudi alokidiŋ Ŋisirael, lopite ŋolo eseunere asepwae anainakinet a ŋina ka amuronot.

³Abu iŋes toreu ŋiŋatunyo esibit erae ŋimee ka abu toreu ŋityaŋ ŋulu adedeŋak esibit erae ŋikaalei ŋulu a ŋamesekin,

⁴pa mono abu iŋes anasoroko keŋ toar ekile ŋoloti aoyan, ido tolema ŋileec alotuŋa keŋ apaki ŋina ecutarya iŋes amoru anadoe keŋ, ido kimas ka toar eketuron Golias a?

⁵Abu iŋes tonyara Ekapolon Akuj ŋina alokidiama nooi, ido abu Akuj inak agogoŋu nakan keŋ ŋina aloteten aŋuna ka akiar ekajion ŋolo agogoŋon ikotere kitopoloosi ŋituŋa apedor ŋina a ŋituŋa a Daudi.

⁶Aŋun, apotu ŋituŋa kitopoloosi Daudi aŋuna elounia ŋalipyo ŋatomotomoe ŋuna a ŋimoe keŋ ka apotu ŋituŋa kipuro iŋes aŋuna ka arereŋu a ŋina abu Ekapolon inak iŋes apaki ŋina ainakinere iŋes ebokot ŋolo ka apolou.

⁷Abu iŋes tomunya ŋimoe keŋ alowaetin keŋ a daadaŋ ka kitasalu jik ŋimoe keŋ daadaŋ Ŋipilistin; abu iŋes kinyasu apedor kec todaun tari alorwa yok a lu.

⁸Alotooma ŋuna daadaŋ abu iŋes kitiya, abu iŋes tolakar neni ka Akuj a ŋina asegan, a ŋina alokidiama nooi, kisera apolou ka Akuj; abu iŋes toeok ipuro a etau keŋ a daadaŋ, ido amina iŋes akasubunan keŋ.

⁹Abu iŋes kiwuak ŋikaeok kiŋaren namuroet, aŋuna ka aeikinio a ŋitoilon kec ŋieosyo ŋulu abobok.

¹⁰Abu iŋes kisibus ŋapakio ŋuna a ŋasuban, ido kiwuak ŋapakio ŋuna emaikina itiyaere ŋasuban alotooma ekaru daadaŋ, ipurosi ŋituŋa ekiro ŋolo asegan ŋolo ka Akuj. Abu akipuro Akuj toyakaunun nakibois ŋina asegan.

¹¹Abu Ekapolon tolema ŋasecisya a Daudi, ido kitopoloo apedor keŋ ŋikaru ka ŋikaru; abu inak iŋes acamunet ŋina ka arwosiyo ka apolou ŋina ka akipuka alo Isirael. Solomon

¹²Ekaku keŋ, abu lokoku keŋ ŋolo aoson toruwor ekepukan, abu iŋes kiboi emam ŋace, anerae aris Daudi kereu ŋimoe.

¹³Abu Solomon kipuka alokaru a ŋulu ke ekisil, anerae abu Akuj inak iŋes ekisil ka ŋikidunyet keŋ, ikotere nai iŋes edukokini akai aŋuna a ekiro ka Akuj, ido kiwuak akibois ŋina asegan ŋina eyakaun ŋikaru ka ŋikaru.

¹⁴Okoe irae iyoŋ ituŋanan ŋini aoson eriŋa iyoŋ isorokana! Abu ayenut kilapar aneni kon lopite ŋolo ilapia aŋolol Nile.

¹⁵Abu akipuro aosou kon kiryam akwap daadaŋ, ido ibu iyoŋ kilelebik naosou kon ŋakitadapeta ŋuna epolok nooi apolou kec.

¹⁶Abu arwonu kon todol loculeta ka anam ŋulu alwanak nooi, ido aponi itominakin iyoŋ aŋuna ka apukan kon a ŋina ke ekisil.

¹⁷Apotu ŋituŋa a ŋakwapin toumokis aŋuna a ŋieosyo kon, a ŋakitadapeta ka ŋakiro ŋuna nyileere apolou kec ta ŋaboŋonokineta ŋuna ibu iyoŋ toboŋonok.

¹⁸Alokiro a Ekapolon a Akuj a ŋina enyaritae Akuj a Ŋisirael, ibu iyoŋ tocunak egolid ikwa asuwat ŋina enyaritae Tin ka esilipa ŋolo alalan ikwa asuwat ŋina enyaritae lead.

¹⁹Nai ibu iyoŋ yau ŋaberu topero alosyep kon, ido ibu iyoŋ kimyek amunyaro kon itoruni nakuwan kon.

²⁰Ibu iyoŋ kinyasu apolou kon ka tomunaiya eyakae a ŋituŋa a ekal kus, ido anakiro aŋun, ibu iyoŋ yau anyunyura neni a ŋidwe kon, ido apotu ikes toryamut ŋican aŋuna ka abaŋao kon.

²¹Apotu ŋican ŋul yaut atyakatyaka anakwap kec, apotu ŋikaŋerok apukan tolomut alo Epuraim.

²²Nai nyeesikini Ekapolon arubakin eyakar akisyon, kori nyimyekini adio anakiro a ŋuna iikinit iŋes eŋopiyari; nyikisari iŋes jik ŋiletok a eseuna keŋ, kori nyemunyari alyasit a ekal a ŋolo amina Ekapolon. Aŋun, abu iŋes inak ŋipiya neni a Yakob ka abu yau alokal a Daudi ŋini edupakini ekal keŋ. Reoboam ka Yeroboam

²³Abu Solomon totwan ka aponi tonukae neni anukitae atapapa keŋ, ido toesik iŋes alokaku keŋ ipei alodwe keŋ, ŋolo alal nooi abaŋao ka ŋolo amamukar ayenut, arae ŋol Reoboam ŋolo apotu ŋuna atubuni iŋes inakis ŋituŋa atukun aruruma ŋinaŋeryet iŋes. Abu nai Yeroboam lokoku a Nebat toriko Ŋisirael nasecit, kitogeu ŋituŋa a Epuraim akiwuapit ŋuna ka asecit.

²⁴Apotu ŋasecisya kec kiyatakin akilo, akitodol ŋina arikorere ikes anakwap kec;

²⁵anerae apotu ikes kiwara akitiya ŋinaronis daadaŋ akitodol ŋina enyaŋarere aneni kec ŋuna etiyaete ikes.