Read ngakarimojong Sir 48 Bible Online

Sir 48 - ngakarimojong bible

Sir 48

¹Eliya Ekaku, abu ekadwaran Eliya toyakaun, arae iŋes ekadwaran ŋolo ekote ŋakiro keŋ eriraete akim ka eleereete ŋakiro keŋ ekote neni enokia atoc.

²Abu iŋes yau eron neni kec ka analelakinit keŋ akitiya ŋun, kitukudiou ekimar kec.

³Abu iŋes togolok nakuj alotooma akirot ŋina a Ekapolon ka nabo abu kitodou akim ŋarwa ŋauni.

⁴Okoe Eliya arae ŋakujuwuanisya kon ŋuna ka aumokin! apolou a ŋae ikwaan ka ŋina kon?

⁵Ibu iyoŋ kiteyaru ituŋanan ŋini atwanit, ibu kiteyaru iŋes anakibois a ŋikatwak alotooma akirot ka Akuj a ŋina alokidiama nooi.

⁶Ibu iyoŋ kitasalu arwonu a ŋirwosi ka apotu kinyasunos ka ibu kinyasu alokitaadae kec ŋikilyok ŋulu ayenen ŋulu aperete.

⁷Ibu iyoŋ kiira akieyakino ŋina a Ekapolon alo Sinai ka atubokino alo Oreb akinyaŋar a Ekapolon ŋakiro a ŋimoe keŋ.

⁸Ibu iyoŋ kitaleu a akimyet ŋirwosi aŋuna ka ayaunia akisicanio ka ŋikadwarak aŋuna ka akilunyokin lorot kon.

⁹Aponi ikiyai iyoŋ kidiama alokuwuam a ŋolo epiripiri tonoki, aponi ikiyai iyoŋ a agaari a ŋina eritae a ŋaŋolei a ŋuna anepete.

¹⁰Anapaki a ŋina eseunitae igiritae atemar, ikicamakinitae iyoŋ akitidipokin anyunyura ŋina ka Akuj eriŋa nyebukuno alotooma aŋoit, aŋuna ka akibelekinio ŋitai a ŋikauruunak tominakis ŋidwe kec ka akinyakun ŋikabilae a Yakob.

¹¹Elakara ŋulu ikiŋolikinito iyoŋ, ido apotu ikes tojokyata aŋuna ka amina kon ikes; anerae isua daŋ ikiyari kire. Elisa

¹²Ani itolomaryo Eliya lokuwuam ŋolo epiripiri, abu etau ŋolo ke Eliya kilelebikin neni ke Elisa. Abu iŋes kitiya ŋakujuwuanisya ŋuna alalak ŋarwa ŋaarei akilo ŋuna etiyat Eliya ka ŋuna alimununui iŋes a akituk keŋ, erae daadaŋ ŋuna ka aumokin. nyemaranikina iŋes apaki daadaŋ anakiyar keŋ alokiŋaren edio kepukan; kori pa apedori idio akitukuryanikin iŋes tari iwadio daŋ.

¹³Amam ibore agogoŋ aneni keŋ ka ani etwani iŋes, abu akekuwan torubak itoodi ŋakujuwuanisya.

¹⁴Abu iŋes kitiya anakiyar keŋ ŋaumonokineta ka alotooma atwanare keŋ, apotu ŋiticisyo keŋ toruwor ŋulu ka aumokin.

¹⁵Tari anakitiyanakiniata a ŋun a daadaŋ, apotu ŋituŋa nyekiwa, apotu daŋ nyeŋero ŋasecisya kec, akitodol ŋina ekamarere ikes anakwap kec, ido kielakinae nakwapin daadaŋ. Aponi toesikinae ŋituŋa ŋidikudyo nooi alokimar, nai toyakatar ekepukan ŋolo alokal a Daudi.

¹⁶Apotu ŋice kec kitiyata ŋuna pa eyookino, nai apotu ŋice torubakis eseceneneete jik. Esekia

¹⁷Abu Esekia todukok etaun keŋ ka arwatata, ido abu yau ŋakipi tooma lotaun, abu kiciek a ŋasuwa akitelosit ŋina itorunete ŋakipi ka abu tobok ŋakare a ŋakipi.

¹⁸Alorwa a ŋulu epukator iŋes, abu Senakerib torem akwap keŋ; abu Senakerib kiyakiya ekapolokiniton a ŋasigarya keŋ nakwap a Esekia, nai toboŋo iŋes. Abu ŋol kiniŋiniŋ akan keŋ itoroniyarit Sion, ido kitiya ŋuna ka akituro alotooma akisupa.

¹⁹Apotu nai ŋitai a ŋituŋa a Sion tomaranikis kaapei ka ŋakan kec; ido toryabakinos ikes lopite ŋolo eryabakinor aberu edoli akidoun.

²⁰Nai apotu ikes tonyarata Ekapolon ŋolo isyoniono, apotu ikes kitiyata ŋun epetarito ŋakan kec neni a Ekapolon. Abu ŋolo asegan kiira anakuj ikes atipei, ido tolaku ikes kisitiya Isaya aŋuna ka alakun ikes.

²¹Abu Ekapolon tomunya ajore ŋina ka Asiriya aneni eboiyo, ido abu emalaika a Ekapolon kitoŋopiya ikes daadaŋ;

²²anerae abu Esekia kitiya ŋuna etalakarito Ekapolon ka abu iŋes torubak iwuapit ŋuna etiyat papaa keŋ Daudi, lopite ŋolo alimokinitor iŋes ekadwaran Isaya, ŋolo apolon ka ŋolo ekinyoma anakisileerekineta keŋ. Isaya

²³Alorwa a ŋulu ka Isaya, abu akoloŋ toboŋo neni sek alomunia, ido abu Isaya kitooyaa akiyar ŋina ke erwosit.

²⁴Aŋuna ka atitinyikinit a etau keŋ, abu iŋes kiŋolek ŋuna aponito alokiŋaren, ido abu kisirworiu ŋulu egworosi alo Sion.

²⁵Abu iŋes kisileereu ŋuna elosete atakanun apaki ŋina edaunor ibore daadaŋ ka ŋiboro ŋulu etakanunete ŋulu sek nyetakanuna.