Read ngakarimojong Sir 5 Bible Online

Sir 5 - ngakarimojong bible

Sir 5

¹Ŋikisila ŋulu eyarere a ŋinakoloŋit Nyikinyomit anakiyar kon a daadaŋ ebari kon, kori nyitema, “Ayakar ayoŋ ibore ŋini eketemokino.”

²Nyitamak akiwuap ŋuna ka acamit kon ka ŋuna ka agogoŋu kon anakiwuapit ekibure ŋolo ke etau kon.

³Nyitema, “Ŋae epedori akipuka ayoŋ?” Kire jik ikisicani Ekapolon iyoŋ.

⁴Nyitema, “Abu ayoŋ osec, anu apotu kitiyakin neni kaŋ?” Nyeŋoyenene Ekapolon atipei.

⁵Nyikinyomit atemar kasec daŋ, ekesyonio, ido nai torubak iyasi asecit nasecit.

⁶Nyitema, “Epol akisyon ŋina a Ekapolon, isyoni iŋes ŋasecisya kaŋ ŋuna alalak,” anerae eyakar Ekapolon akisyon ka daŋ eyakar anyunyura, ido eyakaun aŋoit keŋ neni a ŋikasecak.

⁷Nyiŋel aboŋun neni a Ekapolon, ido tojoŋo a ŋinakoloŋit atemanar eiuni moi, anerae ebuni anyunyura ŋina ke Ekapolon neni kon pa iyeni iyoŋ, ido itwani iyoŋ erae iŋes ikisicanit iyoŋ.

⁸Nyiwuakinit akikinyomit kon lobari ŋolo edemunitae ŋinice, anerae mam ajokis iryamuni iyoŋ aŋuna a ebari a ŋol akoloŋit ŋina ka akinyasuno.

⁹Nyiruwor ekerimiton ikoŋin, kori ekameton ŋirotin daadaŋ.

¹⁰Torubak itiirae anakiro a ŋuna iyeni iyoŋ, ido emaikina ŋakiro ŋuna irworo iyoŋ erae ŋunapei sek irworo iyoŋ ekiŋaren.

¹¹Torae ŋini iiranari ŋakiro atipei, nai nyikirikirak aboŋokin.

¹²Ani kiyeni iyoŋ ŋunalimuno, toboŋok ikidunyet kon, nai ani pa kiyeni, tobun a akan kon akituk kon.

¹³Erae lorwor ebunio akitopolooro ka amamukau akitopolooro, epedorete ŋaŋajepa a ŋituŋa akiteryamun ŋituŋa ŋican.

¹⁴Tocoite nyikinyarae ŋini itobobot akitub, ido nyilokununui ŋituŋa ŋuluce alorwor kon; anerae eryamununui ekokolan ŋileec ka eryamununeete ŋulu itoboboto ŋakitukwa atubokino ŋina apolon.

¹⁵Nyitiya ŋadi ŋuna alalak, kori ŋuna ekudyoko, ikotere nyiryamu ŋican,