Read ngakarimojong Sir 50 Bible Online

Sir 50 - ngakarimojong bible

Sir 50

¹Simon lokoku a Onias Arae Simon lokoku a Onias ŋolo arae esacaradoti ŋolo apolon, ekarikon a ŋikaitotoi keŋ ka ŋolo eturotor ŋituŋa keŋ; abu iŋes alorwa a ŋulu ka akiyar keŋ tosubak nabo Akai ŋina ka Akuj ka abu todukok ŋarwatatain kiryama Akai ŋina ka Akuj anapaki keŋ.

²Abu iŋes kiwuak akisyakinet a ŋarwatatain a ŋuna arae ŋaarei, ŋarwatatain ŋuna aoyak ŋuna awuaunito Akai ka Akuj anawae.

³Alorwa keŋ, aponi tobokakinae akare aŋuna a ŋakipi, akibois ŋina eyakaun ŋakipi, ŋina ekoni anam elolom.

⁴Abu iŋes toyeu epite ŋolo eiunia ŋituŋa keŋ anakinyasuno, ido abu todukok arwatata kiŋa etaun itoroniyarit akirikauno.

⁵Arae ŋolo etopoloorito ŋituŋa nooi ka ewuakinito iŋes ŋituŋa kidiŋ apaki ŋina elomunia iŋes anakibois a ŋina asegan nooi.

⁶Eleere iŋes ikwa etop ŋolo ka ataparacu alokidiŋ ŋidouwon, eleere ikwa elap eyai kidiama apaki ŋina itiyaere ŋasuban.

⁷Eleere iŋes ikwa akoloŋ inwakit Akai ka Akuj a ŋina alokidiama nooi, eleere ikwa alokakinet ileerete ŋiraŋgi keŋ alodowon;

⁸eleere iŋes ikwa ŋatur ŋuna kipura-areŋak alorwa a ŋulu a ŋaraito a ŋuna eŋarenok, eleere iŋes ikwa ŋatur a ecomocomo a ŋolo elomunit alodiyete ŋicowae ŋulu eya ŋakipi, eleere iŋes ikwa elibuniata ŋikito alo Lebanon ŋirwa ŋulu ikamuunio akwap.

⁹Eleere iŋes ikwa akim ŋina icunyere ekinyate anisipirya, eleere iŋes ikwa ibore ŋini ityekunitae a egolid, ŋini isibusitae a ŋamoru a ŋuna egelegelya a ŋuna epol egyelit.

¹⁰Eleere iŋes ikwa ekitoe ŋolo ka Olipa ŋolo ileleba ŋaraito ka ikwa ŋikito a cipres ŋulu ileŋoro alodowon a ŋulu ewato.

¹¹Ani enapi iŋes ekaaso keŋ ŋolo ka apolou, ido tonap ŋilowi ŋulu ajokak ŋulu ebusak, ido tolot namuroet ŋina asegan, eturuwonori iŋes alapatu ŋina ka Akai ka Akuj ŋina eyai apolou ŋina ailiilon iŋolikini.

¹²Ani ijaari iŋes ŋatutubeta a ŋamuronisya anakan a ŋisacaradotin, apaki ŋina ewoya iŋes alodiyete ekeno ŋolo anamuroet ka irimokinito iŋes kidiŋ ŋikeŋarakinitok keŋ, ekwaan iŋes ka ekitoe a Cedar alo Lebanon ŋolo eriŋa edit ŋolo ewuakinito ŋikito ŋulu a ŋiŋolya kidiŋ.

¹³Apotu ŋidwe ka Aaron daadaŋ ŋulusapa anapolou kec, todaka ŋainakineta ŋuna a Ekapolon anakan kec alokiŋaren atukot daadaŋ ŋina a Ŋisirael.

¹⁴Ani kedau Simon akirikakin etic anamuroet ka akisibak ŋainakineta ŋuna einakinitae neni ka Akuj a ŋina alokidiama nooi, Akuj ŋina etiron,

¹⁵eopeonori iŋes akan keŋ alemun ekopo, ido tobukok ainakinet ŋina a ŋimaten ŋina a epiini a ŋolo areŋan puu; tobukok kwap nawoeta anamuroet, erae akitalakaret ŋina ebob eure neni ka Akuj a ŋina alokidiama nooi, erwosit a daadaŋ.

¹⁶Ani ecelunete ŋidwe ka Aaron ŋulusapa, akutanakinete ikes ŋarupepe kec ŋuna etyekunitae a ŋasuwa; tokutakis ikes a ŋitoilon a ŋulu acelasi ikwapei ibore ŋini emaikina Akuj ŋina alokidiama nooi kiira.

¹⁷Apaki ŋin nai, amaikina ŋituŋa daadaŋ toryediko, kijuuroto atipei todolo ŋireetin kec kwap, kilipa neni a Ekapolon kec, Akuj ŋina etiron, Akuj ŋina alokidiama nooi.

¹⁸Ido apotu ŋikaeok kipuro iŋes a ŋitoilon kec a ŋulu aeosi ejokak ka togelegelaaka eosi kaapei.

¹⁹Apotu ŋituŋa a Ekapolon a ŋolo alokidiama nooi kirworo ŋakilipasinei kec neni a ŋolo esyonon, akitodol ŋina erikakiniata ikes akilip neni a Ekapolon lopite ŋolo etemokinitere ka apotu ikes kirikakis etal keŋ.

²⁰Abu nai Simon todoku kwap anamuroet, kikyaa ŋakan keŋ natukot daadaŋ ŋina a Ŋisirael alimor arereŋu ŋina ke Ekapolon ka akitopoloor ekiro ŋolo a Ekapolon;

²¹ido apotu ikes kijuuroto ilipete apaki ŋina a ŋaarei aŋuna ka akijaun arereŋu aneni ka Akuj a ŋina alokidiama nooi. Akiterereŋ

²²Tokona nai epuro Akuj ŋina a daadaŋ, ŋina itiyae anakwap a daadaŋ ŋiticisyo ŋulu ka aumokin, Akuj ŋina ikitopoloe iwon ŋinapei anakidouno ka ŋina ikiyokit iwon lopite ŋolo eyakar akisyon keŋ.

²³Elipit ikiinak iŋes iwon alakara ŋina a ŋitai ka elipit toyakaun ekisil alorwa yok tooma Isirael, lopite ŋolo ayakar alorwa a ŋulu a koloŋ.

²⁴Elipit ikiinak iŋes iwon akisyon keŋ ka ikilaku iŋes iwon alorwa yok. Ŋuna esidyok

²⁵Eŋerit ekaatau ŋituŋa a ŋakwapin a nu a ŋaarei ka ŋina a ŋauni nyerae ŋituŋa keŋ tari ŋituŋa:

²⁶Ŋituŋa ŋulu iboiyete alo Seir ka Pilistin ka ŋituŋa ŋulu baŋaanotin ŋulu iboiyete alo Sekem.

²⁷Adau ayoŋ Yesu lokoku a Sirak a ŋolo arae lokoku a Eleasar a ŋolo alo Yerusalem, akigir ŋakiro ŋuna ka aosou kaŋ daadaŋ lokitaabo lo aŋuna ka akitatamya ŋuluce ka aryamunia aosou.

²⁸Erereŋ ŋulu iwarito anakiyar kec ŋakiro ŋun ka ŋulu iwuakinito ŋakiro ŋun lotai kec, eruwor ikes ŋulu eosok.

²⁹Ani kitiyata ikes iwuapito ŋakiro ŋun, egogoŋioto ikes alotooma ŋinibore daadaŋ, anerae erae akitopoloorit Ekapolon erot kec.