Read ngakarimojong Sir 51 Bible Online

Sir 51 - ngakarimojong bible

Sir 51

¹Akilip a Yesu alokoku a Sirak Okoe Ekapolon ka erwosit, alakar ayoŋ neni kon, okoe Akuj akaiunan kaŋ, ekepuri ayoŋ iyoŋ. Alakara ayoŋ aŋuna a ekiro kon,

²anerae iyoŋ ibu toruwor ŋina ikiyokit ayoŋ ka ŋina ikiŋarakinit ayoŋ ka idau alakun ayoŋ anakinyasuno ka analoc a ŋina alokakinito ŋituŋa ŋulu irworosi itoroniarito ŋuluce, ibu iyoŋ ikilaku ayoŋ alotuŋa a ŋulu ikobete ŋakiro ŋuna ka alyokonu. Ibu iyoŋ toruwor ekeŋarakinan kaŋ alokiŋaren ŋimoe kaŋ,

³ibu iyoŋ itolaku ayoŋ alotooma akisyon kon ŋina apolon ka a ekiro kon a ŋolo eyakar apolou, ibu itolaku ayoŋ aloman a ŋulu atenitotor ikes akitasalun akiyar kaŋ, ibu itolaku ayoŋ anapedor a ŋulu ewarito alemar akiyar kaŋ ka alocan a ŋulu alalak a ŋulu abu ayoŋ edaŋidaŋ,

⁴anakim a ŋina ekerakarit ayoŋ alowaetin a daadaŋ ka alokidiŋ akim ŋina nyinokakina ayoŋ.

⁵Ibu iyoŋ itolaku ayoŋ anakibois a ŋikatwak ka anakirworo ŋakiro ŋuna aronok ka ŋuna ka alyokonu.

⁶Ibu iyoŋ itolaku ayoŋ anajamuwaro a ŋina a ŋulu nyiyookino irworosi neni ke erwosit. Abu akiyar kaŋ apaki ŋin toapiya natwanare ka abu akiyar kaŋ min nakisyakinet a akibois a ŋina a ŋikatwak.

⁷Apotu ŋimoe kaŋ ekerikaut ayoŋ alowaetin a daadaŋ ka mam ituŋanan abu ekeŋarak ayoŋ; abu ayoŋ ewar akiŋarakino aneni a ŋituŋa, ido emam ŋina abu totakanu.

⁸Aŋun, okoe Ekapolon, abu ayoŋ otamu akisyon kon ka arimao kon ŋina koloŋ, anerae ilakununui ŋulu idarito tolaku iyoŋ ido iununui iyoŋ ikes anapedor a ŋimoe kec.

⁹Abu ayoŋ elip neni kon a ne alokwap, abu okodyek iyoŋ alakun ayoŋ anatwanare.

¹⁰Abu ayoŋ ekalou otema, “Ekapolon, irae iyoŋ papa kaŋ; nyikiesik ayoŋ alorwa a ŋulu a ŋican, ŋina emamukaunor akiŋarakinet aryamunit ayoŋ aneni kon aŋuna a ŋiketurok a ŋulu akaremokino ayoŋ.

¹¹Arubakini ayoŋ epuro ekiro kon a ŋinapaki, ido aeo ŋieosyo ŋulu ka alakar neni kon.” Ibu iyoŋ Akuj kiira akilip kaŋ,

¹²anerae ibu iyoŋ ikiu ayoŋ alotooma akinyasuno ka ikilaku ayoŋ alotooma apaki ŋina a ŋican. Aŋun, alakara ayoŋ neni kon ka ekepuro ayoŋ iyoŋ, ido etopoloori ayoŋ ekiro ŋolo ke Ekapolon. Ŋuna iatakinito Ŋaburaniyae Tolakaros neni ke Ekapolon, anerae ejok iŋes, anerae erae amina keŋ ŋina a ŋikaru ka ŋikaru. Tolakaros neni ka Akuj a ŋina a ŋikipurisyo, anerae erae amina keŋ ŋina ŋikaru ka ŋikaru. Tolakaros neni a akedaran a Isirael, anerae erae akisyon keŋ ŋina a ŋikaru ka ŋikaru. Tolakaros neni keŋ a ŋina abu tosub ŋiboro daadaŋ, anerae erae akisyon keŋ ŋina a ŋikaru ka ŋikaru. Tolakaros neni keŋ a ŋina abu tolaku Isirael, anerae erae akisyon keŋ ŋina a ŋikaru ka ŋikaru. Tolakaros neni keŋ a ŋina abu tocun ŋulu eelaritae alo Isirael, anerae erae akisyon keŋ ŋina a ŋikaru ka ŋikaru. Tolakaros neni keŋ a ŋina abu todukok nabo etaun lo ka akibois keŋ ŋina asegan, anerae erae akisyon ke(...)

¹³Ani eriŋa ayoŋ adit, eriŋa ayoŋ nyeloto akilare, abu ayoŋ oŋirik anakilip kaŋ akiwarit aosou.

¹⁴Abu ayoŋ olot Kai ka Akuj akiŋita aosou, abu ayoŋ ewar iŋes ŋirwa daadaŋ ŋulu ayarya ayoŋ

¹⁵Abu aosou toruwor alakara kaŋ ŋinapei eriŋa ayoŋ asorokana akitodol apaki ŋina amojoŋia ayoŋ; abu ayoŋ etor lorot ŋolo ka akiyookino, ageun anasoroko kaŋ, abu ayoŋ ewuap ŋikukus ŋulu ka aosou.

¹⁶Abu ayoŋ epuŋok akaakit iwadio akiirar ŋuna ka aosou, ido abu oryamu aosou, abu ayoŋ oryamu aŋuna kaŋ ŋakitatameta ŋuna alalak.

¹⁷Abu ayoŋ etiya ejok alotooma aosou; etopoloori ayoŋ iŋes ŋini ikiinanakini aosou.

¹⁸Abu ayoŋ oseu akiyar ewuapit ŋuna ka aosou, ido abu ayoŋ oinakin aŋuna ka ajokis, ido emam ŋuna eketakadakinete ayoŋ.

¹⁹Abu ayoŋ ewuap ka agogoŋu ŋuna ka aosou, ido alopitesyo kaŋ, arae ayoŋ ŋolo acoikinit nooi. Abu ayoŋ ebaa ŋakan kaŋ nakuj, ido eololo aŋuna sek pa ayenia ayoŋ ŋuna ka aosou.

²⁰Abu ayoŋ oinakin anakiyar kaŋ naryamun aosou, ido anakiyookino, abu ayoŋ oryamu aosou. Aŋuna abunio ayoŋ oryamu aosou, abu ayoŋ oryamu ayenut ameun ŋinapei aryamunia ayoŋ iŋes; aŋun, nyakaŋeryo ayoŋ.

²¹Abu etau kaŋ kiburak aryamun aosou; aŋun, aryamu ayoŋ ainakinet ŋina erae ŋina kaŋ.

²²Abu Ekapolon okoinak ayoŋ aŋajep kaŋ erae eropit kaŋ, ido epuri ayoŋ iŋes a aŋajep kaŋ.

²³Toapuutu neni kaŋ iyes ŋulu nyiyenete ŋakiro, ido kiboiyoto alokai a ŋina itatamere

²⁴kaanukiro ibaakatar iyes emam ŋakiro ikiyeni, ido kaanukiro idaŋidaŋiata iyes ŋun nyicamitotor aryamun ayenut?

²⁵Abu ayoŋ erworik ŋakiro nu: Toryamutu aosou aŋuna kus emam akigyel a ŋisiliŋa.

²⁶Inakinos ka agogoŋu aryamun aosou, ido tocamakisi anakiyar kus aryamun akitatamo; epedor aosou aryamun aneni eapi.

²⁷Toanyutu iyes ŋilopeyek atemar abu ayoŋ etiya pa aŋirikinit nooi, ido aryamu ayoŋ aŋuna kaŋ ŋuna eketemokino.

²⁸Kiirasi ŋakiro ŋuna a ŋakitatameta kaŋ nai meere anaŋirikinit nooi, ido iryamunete iyes aneni kaŋ esilipa ka egolid.

²⁹Elipi tolelyan etau kon alotooma akisyon ŋina ka Akuj, ka elipi nyikiruma iyoŋ jik ŋileec akipuro iŋes.

³⁰Kitiya etic kon anapaki a ŋina ajokan, ido anapaki keŋ a alope, ebuni Akuj ainakin iyoŋ ekoniropit.