Read ngakarimojong Sir 6 Bible Online

Sir 6 - ngakarimojong bible

Sir 6

¹Ido nyiruwor emoit akilo aruwor ekone; anerae eyauni ekiro ŋolo aronon ŋileec ka ebura; aŋun, ikote nenipei ŋakiro aneni a ikasecan a ŋini itobobot akituk.

²Nyiloma nakiro ŋuna a ekibure, ani kiloma, ikikorisiyari iyoŋ ekibure lopite ŋolo ikorisiyaria emaanik ekinyi.

³Ikimunaaryo iyoŋ lopite ŋolo emunaarere ekitoe todaun ŋakuii ka ŋaraito, ikimyekinio iyoŋ ikwaan ka ekitoe ŋolo einiyarit.

⁴Inyasuununui ekibure ŋolo aronon ŋulu eyakatar ekibure ŋol, ido ituruwonori ikes ŋulu ekyenare alomoe kec. Akoneo, alyokonu ka ŋuna a kire

⁵Italalae erwor ŋolo abobon ŋikonei, italalae erwor ŋolo ajokan ŋirukitos.

⁶Emaikina ŋulu erae ŋikonei kon tolalak, nai emaikina ŋini erae ekesirworiunan kon erae ipei alotooma aliput.

⁷Ani iryamuni iyoŋ ŋikonei, toryamu ikes anakikatakin, ido nyikinyom ikes atipei,

⁸anerae eya ŋikonei ŋulu ikikoneunete iyoŋ anapaki a ŋina iitanitotor ikes aryamun ibore aneni kon, nai nyepedorete ikes akiŋarakin apaki ŋina iyakar locan.

⁹Eyakasi ŋikonei ŋulu ilocokinete ŋipitesyo kec toruwor ŋimoe kon, ido kirworo neni kon iburaete aŋuna ka akitoroniyar iyoŋ.

¹⁰Eyakasi ŋikonei ŋulu iboikinosi kaapei ka iyoŋ kimuja alomesa, nai nyepedorete ikes akiŋarakin iyoŋ apaki ŋina iyakar locan.

¹¹Ani ibari iyoŋ, imiidiun ikes neni kon, kikwaanikinos ka iyoŋ, toruwor ikes erae ŋikapolok a ŋiketiyak kon.

¹²Nai ani kikituruwor iyoŋ ikoŋinait, ikiremokin ikes iyoŋ, ido toduka nyianyunia iyoŋ ikes.

¹³Nyirukito ka ŋimoe kon ka toosokinite ŋikonei kon.

¹⁴Ikwaan ŋikonei ŋulu ikinyoma ka aduketait ŋina iunor; ituŋanan daadaŋ ŋini eryamuni ekone ŋolo ikinyoma, aryamu ebari.

¹⁵Iloito ŋikonei ŋulu ikinyoma ainakinet ŋina itiyator ibore idio; emam etyae ŋolo isikwaanikinio ka ajokis kec.

¹⁶Erae ŋikonei ŋulu ikinyoma ŋikaiunak akiyar ikwa ekitoe ŋolo ikitaŋaleuni; ido ŋulu ikinyomito Ekapolon eryamunete ŋikonei ŋulu ikote ŋul.

¹⁷Eryamununeete ŋulu ikinyomito Ekapolon ŋikonei ŋulu iyookino, anerae ikwapei ekoneokoto ikes, ŋikidunyet kec daŋ eruwor ŋulu ekoneoko. Ŋarereŋisyo ŋuna ka a aosou

¹⁸Ikaakoku, alorwa a ŋulu ka asoroko kon, toseu aruwor ŋini ijok, ido ani imojoŋi iyoŋ irubakini iryamununui aosou.

¹⁹Kitiya ka agogoŋu aŋuna ka aryamun aosou ikwa ŋini itae ka agogoŋu toek ŋikinyom lomanikor keŋ, ido kidaru apaki ŋina eryamunia ŋuna ajokak aŋuna keŋ. Ani kidupaki iyoŋ aosou, ekudyoko ŋuna itiyae iyoŋ, ido imuji iyoŋ atipei ŋuna elomunete aneni keŋ.

²⁰Etakani aosou eryenyaana neni a ŋulu nyiwuapito ŋuna elimokinitae akiwuap, nyepedorete ŋul, ŋibaŋaanotin arubakin eya naosou.

²¹Ikwaanikin aosou ka amoru ŋina apotyon aŋuna ka akikatakin ikes, ido nyidaŋidaŋete ikes, eesikinete aosou atipei.

²²Ikwaan ekiro a aosou ka aosou; nyepatana ŋikalalak aryamun iŋes.

²³Kiira, ikaakoku ka kiwuap ŋakiro kaŋ; nyiŋer ŋakiro ŋuna akalimok ayoŋ iyoŋ.

²⁴Toenik nakejen kon aosou ŋina egogoŋ ikwa ŋiriko; tonap iŋes alodokole kon ikwa ayokot alomoŋin.

²⁵Tokukum toryoŋ iŋes aloseketa kon, nyiŋayaŋayat anatyonis a ŋina ka aryamun aosou.

²⁶Bua neni keŋ a akonikiyar a daadaŋ, ido kiwuap a agogoŋ kon a daadaŋ ŋuna elimunit iŋes.

²⁷Toripiripi ka kiwar iŋes, ido iyenuni iyoŋ iŋes, ani iryamuni iyoŋ iŋes, nyiesik ikimuryak.

²⁸Ekaku iryamuni iyoŋ akieŋun ŋina ikiinanakini iŋes, ido ilocokin iŋes aneni kon toruwor alelyanu.

²⁹Eruwor nai aneni kon ŋatyokisyo ŋuna sek ekwaan ka ŋiriko ibore ŋini agogoŋon ŋini ikiuni ka eruwor ayokot ŋina sek iyakar iyoŋ ekaaso ŋolo ka apolou.

³⁰Ikwaan ayokot keŋ ka enapit ŋolo erae egolid ka ikwaan ŋiriko keŋ ka ausi ŋina kipurat-areŋan ŋina ka apolou.

³¹Inapi iyoŋ aosou ikwa ekaaso ŋolo ka apolou, inapi iyoŋ iŋes ikwa ebokot ŋolo ikitopolooritere.

³²Ikaakoku, ani kicamit iyoŋ ŋipitesyo ŋulu ajokak, iryamuni, ani kiinakina iyoŋ aryamun aosou, iruwor ŋini ios.

³³Ani kimina iyoŋ apuponokin ŋakiro, iryamuni aosou, ido ani kiwuapit ŋuna ikilimokinio, iruwor ŋini ios.

³⁴Torukito ka ŋikasikou, ŋae erae ŋini aoson? Kimorikinos ka ŋini ikoni ŋin.

³⁵Totenite akiirar ŋakiro daadaŋ ŋuna irworosi ŋituŋa ŋulu iwuapito ŋuna ka Akuj, ido nyimyek ŋakitadapeta ŋuna ka aosou ebucar aneni kon.

³⁶Ani kianyuwa iyoŋ ituŋanan ŋini epiryaana, tonyou eriŋa ataparacu tolot neni keŋ, kimyek ŋakejen kon kikusaut epuke a akai keŋ.

³⁷Toomomo ŋikisila ŋulu ke Ekapolon, ido totamatama a ŋinapaki ŋakiciketa keŋ. Erae Ekapolon ikiinakini iyoŋ apiiryanut anatameta kon. Ikiinakini iŋes iyoŋ aosou ŋina icamit iyoŋ aryamun.