Read ngakarimojong Sir 7 Bible Online

Sir 7 - ngakarimojong bible

Sir 7

¹Ŋace ŋuna ikilimokinitae akiwuap Nyitiya aronis, ido nyebuni aronis neni kon.

²Tolwana aneni itiyaere ŋuna nyiyookino, ido eboŋori aronis aneni kon.

³Nyiekis nawat kus akitiya ŋuna nyiyookino, anerae ipedorete aryamun ŋican ŋulu alalak.

⁴Nyiwarit atemar eketopoloo Ekapolon, kori ikisiboik erwosit lokicoloŋ ŋolo ka apolou.

⁵Nyimaima Ekapolon acamun atemar iyookino iyoŋ, kori nyitoodiunit aneni a erwosit atemar ios iyoŋ.

⁶Nyiwarit aruwor ekatubon ŋakiro, acepaki nyipedori iyoŋ alemar amamukau akiyookino; ipedori iyoŋ akirii ka ŋulu eyakatar ŋapedorosyo, nai imunaari iyoŋ ayenon kon irae ŋini ijok.

⁷Nyitiya neni a ŋituŋa ŋadi ŋuna aronok ka nyilema ajokis kon ŋina sek ijokya alotuŋa kon.

⁸Nyiboŋonokini ŋarwa ŋaarei akitiya asecit, nyikiesikinio iyoŋ akisician tari kitiya apei daŋ.

⁹Nyitema, “Etamuni Akuj ŋainakineta kaŋ ŋuna alalak, ido ani kaya ayoŋ neni ka Akuj a ŋina alokidiama nooi ainakinet kaŋ ecamuni iŋes.”

¹⁰Nyikiup iyoŋ akilip, ido nyijamak ainanakin ibore neni a ŋikulyak.

¹¹Nyikyenar ituŋanan ŋini itoŋoitae, anerae Ekapolon iŋes epedori akitiditeun ka akitopoloor.

¹²Nyiyeu ŋuna ka alyokonu aŋuna alokaato kon, kori nyitiya ŋuna ikote ŋun neni alokone kon.

¹³Toŋer alimun ŋuna ka amodiyo ka adio, anerae erae amodiyo anaiyaret ŋina eyauni ŋuna nyejokak.

¹⁴Nyirwor ŋakiro ŋunakoŋinae anatukot a ŋikasikou, ido nyiboŋonokini iyoŋ ŋakiro ilipi.

¹⁵Nyiremokino ŋiticisyo ŋulu agogoŋok, kori etic ŋolo ke emanikor, etic ŋolo erae Akuj ŋina alokidiama nooi ewuakini.

¹⁶Nyimorikinosi ka ŋajoresyo a ŋikasecak, totamunite atemar nyedidi akisicanio.

¹⁷Kitiditeun bon nooi, anerae ŋulu nyiwuapito ŋuna ka Akuj, isicanio ka akim ka ŋikur. Erukitene ka ŋuluce

¹⁸Nyigyela ekonikone aŋuna a ŋisiliŋa, kori nyigyela lokaato kon ŋolo ilomunito ka iyoŋ anakook ka apei aŋuna a egolid a ŋolo ka Opir.

¹⁹Nyirita aberu ŋina aoson kori ŋina ajokan, anerae iloit ajokis keŋ ŋina ke egolid.

²⁰Nyiyenyi ŋipi ŋulu itiyaete alotooma akikinyoma, kori ŋikelejilejak ŋulu einakina aŋuna a etic kec.

²¹Tominak alotau kon ŋipi ŋulu epiiryaka; nyilema aneni kec alacakina kec.

²²Iyakar iyoŋ ŋaatuk a? Kiyok ikes; ani kiryamunit iyoŋ idiobore aneni kec, kiyok ikes ejok.

²³Iyakar iyoŋ ŋidwe a? Kitatam ikes toyakatar ŋipitesyo ŋulu ajokak, ido kituruwo ikes ŋulu iwuapito ŋakiro ŋinapei anasorokanu kec.

²⁴Iyakar iyoŋ ŋidwe ŋulupesur a? kiyokiunite ikes ka nyicamak ikes itiyaete ŋuna aronok ŋuna ecamito.

²⁵Kipoto nakoku kon kiitae, apaki ŋin iŋes irikakinia iyoŋ etic kon ŋolo apolon; nai inak iŋes neni a ekile a ŋolo ejokak ŋatameta.

²⁶Iyakar iyoŋ aberu ŋina ikitalakarit iyoŋ a? Nyilak iŋes; nai nyiwuak akikinyomit kon neni a ŋini iŋerit iyoŋ.

²⁷Kitopoloorite papa kon a ekonitau a daadaŋ ka nyikimuryak aryeba a toto kon apaki ŋina ikidounere iyoŋ.

²⁸Totamunite atemar erae ŋikauruunak kon ikiuruunete iyoŋ; alipite itaca iyoŋ ŋuna apotu ikes kitiyata aŋuna kon?

²⁹Kitopoloorite Ekapolon a akonikiyar a daadaŋ ka kitopoloorite ŋisacaradotin keŋ.

³⁰Tomina ekasuban kon a agogoŋu kon a daadaŋ ka nyijamakinit ŋiketiyak keŋ.

³¹Kitopoloorite Ekapolon ka kitopoloorite ŋisacaradotin ka inanak iŋes atutubet keŋ lopite ŋolo ikicikakinitere iyoŋ ainakin iŋes: Ŋaraito ŋuna eŋarenok, ŋainakineta aŋuna ka asecit, ŋiseketa ŋulu a ibarasit a ŋini erae amuronot, amuronot ŋina eyaununuyo aŋuna ka akiteseguno ka ŋaraito ŋuna eŋarenok ŋuna a ŋikinyom.

³²Inanakinete ibore neni a ŋikulyak, ikotere ŋarereŋisyo kus ilelebikinio.

³³Inanak ka alelyanu neni a daadaŋ a ŋulu eyarete; nyilema arimao tari aneni a ŋikatwak.

³⁴Nyiker akitor neni a ŋulu igworosi, kigworo kaapei ka ŋulu igworosi.

³⁵Nyiŋayaŋaya adolokin ŋulu edyakasi, anerae adolokin kon ikes iŋes ikiminakinere iyoŋ.

³⁶Alotooma ŋuna daadaŋ itiyae iyoŋ, totamunite asalunet ŋina ka akiyar kon, ido nyiseci iyoŋ jik.