Read ngakarimojong Sir 8 Bible Online

Sir 8 - ngakarimojong bible

Sir 8

¹Ŋuna elomunete aneni a ituŋanan ka ayakar ŋatameta Nyiloiloasi ka ŋituŋa ŋulu eyakatar ŋapedorosyo, acepaki ikitiŋete ikes iyoŋ erono.

²Nyiburaete ka ŋikabarak, acepaki ikilounete ikes iyoŋ aŋuna a ŋiboro kec; anerae enyasu ebari ŋolo a egolid ŋulu alalak, ido amunaiya ŋatameta a ŋirwosi.

³Nyipegenakinosi ka ikutukanot ka nyituk ŋakiro nakiro kec lopite ŋolo etukere ŋakito nakim.

⁴Nyisoloorito ŋulu eyakatar ŋipitesyo ŋulu aronok, acepaki epedorete akiyany atapapaa kus.

⁵Nyitoŋoa ŋini eesikini akitiya ŋuna ka asecit; totamunito atemar emaikina iwon daadaŋ ikisicani.

⁶Nyijamuwarit anatameta kon ituŋanan ŋini emojoŋit, anerae iwon daŋ ŋice ikiruwor ŋulu ikimojoŋit.

⁷Nyilakara aŋuna ka atwanare a ŋinice; totamunito atemar iwon daadaŋ ikilosi atwakare.

⁸Nyijamuwarit ŋakiro ŋuna irworosi ŋikaosok, nai toripiripi iyoŋ ŋakitadapeta kec ŋuna irworotor ikes; anerae iyenuni iyoŋ aneni kec ŋipitesyo ŋulu ajokak ka epite ŋolo itiyanakinia ŋirwosi.

⁹Nyiŋer akiirar ŋuna irworosi ŋulu emojoŋito, anerae apotu ikes daŋ toyenut ŋun aneni a ŋikauruunak kec; erae neni kec iŋes iyenunia iyoŋ ŋakiro, ido ipedori aboŋokin ŋakiro apaki ŋina ikiŋisere.

¹⁰Nyiinak ŋikasecak apaki ace ŋina esecata, acepaki ikinyamete iyoŋ ŋakiro ŋuna itenepunito ikes.

¹¹Nyicamak ŋulu abenyak ikireunete iyoŋ, acepaki epedorete ikes adapun iyoŋ aŋuna a ŋakiro kon.

¹²Nyidenik ituŋanan idio ŋini egogoŋ akilo iyoŋ ibore; nai ani kidenik iyoŋ iŋes ibore, kimarak atemar nyeriŋa iryamuni.

¹³Nyitema alakuni ituŋanan a ibore a ŋini alalan todit bo ŋini iyakar iyoŋ; nai ani kitema iyoŋ alakuni ituŋanan, kitemokino akitac.

¹⁴Nyisitak alokisila ekatubon ŋakiro, anerae ŋuna etubunio, eruwor ŋuna eriitotor ŋituŋa ka iŋes aŋuna eraakar iŋes ekatubon ŋakiro.

¹⁵Nyimina arukit ka ŋulu nyiyookino bon, acepaki eruwor ikes atyonis aneni kon; anerae itiyaete ikes lopite ŋolo italakarit ikes, ido alotooma abaŋao kec itwakete iyoŋ ka ikes.

¹⁶Nyicamu ajikin ka ituŋanan ŋini epatana akiŋo, ido nyirukito ka ikes anariet aneni asilon, anerae nyekerito ikes akiar ituŋanan, ido ani kemam ŋini ikiuni, ikiarete ikes iyoŋ.

¹⁷Nyiŋitanar ŋakiro aneni a ŋibaŋaanotin, anerae nyepedorete ikes akimunon ŋuna imunonitae.

¹⁸Nyitiya ŋadi ŋuna imunonitae alokiŋaren ŋigelaanotin, anerae nyiyeni iyoŋ ŋuna etakanunete.

¹⁹Nyisileereu ŋuna itami iyoŋ neni a idiotuŋanan, acepaki iritari iyoŋ alakara ŋina sek iyakar.