Read ngakarimojong Sir 9 Bible Online

Sir 9 - ngakarimojong bible

Sir 9

¹Ŋakiro ŋuna elimunitoe aŋuna a ŋaberu Nyiruwor irakaanot aŋuna aberu kon a ŋina imina iyoŋ nooi, acepaki itatami iyoŋ iŋes ŋuna ka aronis a ŋina ikiwani iyoŋ.

²Nyicamu aberu kon ikipukae iyoŋ, nyicamu iŋes ikireuni iyoŋ aŋuna ka agogoŋ keŋ.

³Nyiapiyanari neni aberu a ŋina erae amalaat, acepaki ikisupari iŋes iyoŋ.

⁴Nyimina arukit ka apese ŋina eono ŋieosyo ŋulu ebolyare, acepaki ikimodiyarete iyoŋ ŋipitesyo keŋ ŋulu ka amodiyo.

⁵Nyitookinit ŋakonyen napese ŋina nyiryamakina ka ekile, acepaki iyai iyoŋ iŋes, ikireikin iyoŋ akiit iŋes.

⁶Nyiinakin nooi aŋuna a ŋamalaae, acepaki itwaniari iyoŋ ibore ŋini aponi ikiinakin iyoŋ.

⁷Nyiruwor ekerimiton alorotin a ŋulu ke etaun iŋoleŋole, kori nyirimit anakiboisyo a etaun a ŋuna emam ituŋanan iboiyo.

⁸Nyiteonori aberu ŋina ebusan ka nyikinir akibuses a ŋinice, anerae ariko akibuses a aberu ŋulu alalak, ido anepu ekibure kec ikwa akim.

⁹Nyimor akimuj ka aberu a ŋolocekile, kori nyimatasi ka iŋes, acepaki isupari iŋes etau kon, ido itwani iyoŋ anakitemio a ŋina ka akibuses keŋ. Aseun ŋikonei

¹⁰Nyiesik arukit ka ŋikonei ŋuluŋorok, anerae nyikwaan ŋulukitet ka ikes. Ikwaan ekone ŋolokitete ka epiini ŋolokitete; ani kiboi epiini ŋol akaoyan, imasi iyoŋ iŋes ka alakara.

¹¹Nyikiburakinit epite ŋolo eryamunitotor ŋikasecak ebari, anerae nyiyeni iyoŋ epite ŋolo esalunia akiyar kec.

¹²Nyiruwor ŋini ilakara aŋuna a ŋakiro a ŋuna italakarito ŋulu nyiwuapito ŋuna ka Akuj. totamunite atemar nyebucarosi ikes pa imaritae ŋuna esecito anakiyar kec a daadaŋ.

¹³Nyirukito ka ŋulu eyakatar apedor ŋinaaret, ikotere tomamukar akuryanu aŋuna ka atwanare. Nai ani kilot iyoŋ neni kec, tocoikinite, acepaki epedorete ikes alemar akiyar kon. Toyeni atemar ipudae iyoŋ ŋaunoi ŋuna ikirumete, ilosi iyoŋ alotaun aneni epatania iyoŋ aaro.

¹⁴Alopite a daadaŋ a ŋolo ipedorya iyoŋ, kikatak ayenun ŋikidunyet kon, kiyana ŋakiro ka ŋituŋa ŋulu aosok.

¹⁵Emaikina erae ŋituŋa ŋulu apiiryanak ianiata iyoŋ, emaikina ŋakiro daadaŋ ŋuna itubuni iyoŋ erae ŋuna ecamuna ka ŋikisila ka Akuj a ŋina alokidiama nooi.

¹⁶Emaikina erae ŋituŋa ŋulu iyookino imujata iyoŋ, emaikina akituro kon erae aŋuna itopolooritor iyoŋ Ekapolon. Ŋakiro aŋuna a ŋikepukak

¹⁷Epedoryo akipur ibore erae kerae ituŋanan ŋini eyeni akitiya ŋiboro ejok itiyaunit; aŋun, ekarikon a ŋituŋa daŋ, eyenunio atemar eos anakiro keŋ.

¹⁸Ekeritae alotaun ituŋanan ŋini irworo ecela nooi ka eremokino ŋituŋa a etaun ituŋanan ŋini irworo ŋakiro car.