Read ngakarimojong Isa. 10 Bible Online

Isa. 10 - ngakarimojong bible

Isa. 10

¹Ekaŋ iyes ŋulu iyeete ŋikisila ŋulu nyiyookino, iyes ŋulu igirete ŋakiro ŋuna isicanere ŋituŋa,

²aŋuna ka akiteesikin ŋikulyak akitiya ŋuna iyookino ka alemarya akiyookino alotuŋa kaŋ a ŋulu erae ŋikulyak; itiyaete iyes ŋun aŋuna ka aŋatarya ŋapuseru, ikotere inyamete ŋawat a ŋikokyok.

³Anukiro ipote iyes akitiya akoloŋit ŋina ikisicanere iyes, akoloŋit ŋina ikidolokinioto iyes ŋican ŋulu eponito aneni alwanan? Neni a ŋae iemete iyes aryamun akiŋarakino ka ai imyekiniata iyes ebari kus,

⁴ikotere nyijoro aneni eya ŋienan, kori nyitwanikis neni a ŋulu earitae? Tari kitiyakina ŋun, eriŋa Ekapolon eŋoikinit Ŋisirael, eriŋa iŋes erubakinit isicani ikes.

⁵Okoe iyes ŋituŋa ka Asiriya! Anaŋoit kaŋ, ekesitiyae ayoŋ iyes, napedor kus eyai ebela ŋolo ka anyunyura kaŋ.

⁶Eyakiyari ayoŋ ŋituŋa ka Asiriya akirem ŋituŋa ŋulu nyiwuapito ŋakiro ŋuna ka Akuj. Alimokini ayoŋ ikes toremo ŋituŋa ŋulu anyunyurikina ayoŋ, kiwoko ŋiboro kec ka toŋatasi ŋiboro kec ka kipudata ikes lopite ŋolo ipudaere aoret alorotin a etaun.

⁷Nai nyecamit erwosit ka Asiriya akitiya ŋun, nyetami daŋ iŋes ŋakiro ŋun, nai eya lotau keŋ ŋakiro ŋuna ka akinyasun ka amunyar ŋituŋa a ŋakwapin a ŋuna alalak;

⁸anerae ebala iŋes, “Nyerae mono ŋikapolok a ŋasigarya kaŋ daadaŋ ŋirwosi a?

⁹Nyikwaan mono Calino ka Carikemis a? Nyikwaan mono Amas ka Aripad a? Nyikwaan mono Samaria ka Damasko a?

¹⁰Ikwapei abunio ayoŋ elounia ŋapukasinei ŋuna a ŋituŋa a ŋulu ilipete neni a ŋakujo, a ŋituŋa a ŋulu eloito ŋitorubei a ŋakujo kec ŋulu a Yerusalem ka Samaria,

¹¹nyetiyakini mono ayoŋ neni a Yerusalem ka lotorubei a ŋakujo keŋ ŋuna abu ayoŋ etiya neni a Samaria ka neni a ŋitorubei a ŋakujo keŋ a?”

¹²Kedau Ekapolon akitiya etic keŋ daadaŋ alomukura a Sion ka alo Yerusalem, isicani iŋes erwosit ka Asiriya aŋuna ka akisupa ka akituro keŋ;

¹³Anerae ebala erwosit ka Asiriya, “Abu ayoŋ etiya ŋun a agogoŋu kaŋ a elope ka a aosou kaŋ, anerae ayakar ayoŋ ayenut. Adau ayoŋ alemar ŋikukworwo a ŋituŋa a ŋakwapin ka abu oŋata ŋisiliŋa kec. Lopite ŋolo ereunia emaanik ŋuluce, abu ayoŋ oreu ŋikepukak ŋuluce.

¹⁴Adau ayoŋ alemun ebari a ŋituŋa a ŋakwapin lopite ŋolo elemunia ituŋanan ŋabeyei alokai a ikyenyit, ikwapei ecunakiniata ŋituŋa ŋabeyei ŋuna imyekinitae, acunak ayoŋ ŋakwapin daadaŋ; mam apei ŋina abu eketijik ayoŋ, kori toramak eli.”

¹⁵Nai irworo Ekapolon ebala, “Epedori mono aep atemar apol iŋes akilo ituŋanan ŋini isitiyae iŋes a? Kori epedori erigi atemar eloit iŋes ituŋanan ŋini isitiyae iŋes? Nyepedori adaset akikyaar ituŋanan ŋini etiŋit iŋes, kori ebala akikeun ituŋanan ŋini iceunit iŋes!”

¹⁶Aŋun, ebuni Ekapolon ŋolo etiron, Ekapolon ŋolo a ŋajoresyo akiyakikin erogo neni a ŋikajiok keŋ a ŋulu atumak, anapolou keŋ, emwakunete ŋawat kec lopite ŋolo emwanunia ibore inokakinio akim.

¹⁷Eruwor Akuj ŋina erae akica a Isirael akim, eruwor Akuj ŋina asegan ŋina a Ŋisirael arira a akim ka enomiyari ŋikukwa keŋ alotooma akoloŋit apei.

¹⁸Inyasuni Ekapolon akibuses ŋina a ŋamon ka Asiriya ka ŋalup keŋ ŋuna ataronok, inyasuni Ekapolon ŋitai ka ŋawat a ŋituŋa ka Asiriya lopite ŋolo inyasunia edeke ŋolo aaran ituŋanan.

¹⁹Idoŋete ŋipiya a ŋikito a ŋulu a amoni keŋ ekudyoko erae ŋulu epedori tari ikoku akimarun.

²⁰Akoloŋit ŋin, nyikinyomete nabo ŋipiya a Ŋisirael ka ŋulu aponi nyeari aloletok a Yakob ekepukan ŋolo abu toar ikes, nai epote ikes akikinyom anakiro a ŋuna a kire Ekapolon, Akuj ŋina asegan ŋina a Isirael.

²¹Eboŋunete ŋipiya, eboŋunete ŋipiya a ŋiletok a Yakob neni ka Akuj a ŋina etiron.

²²Tari ŋina sek alalaata ŋituŋa a Isirael atyaakatar elalak asinyon alokipetot a anam, ŋituŋa ŋulu erae ŋipiya bon eboŋunete. Alimun ŋuna ka amunyaro, ido acamut ŋituŋa akisicanio anakiyookino;

²³anerae Ekapolon Akuj ŋina a ŋajoresyo iŋes itasaluni ibore daadaŋ lopite ŋolo alimunio iŋes aŋuna ka akwap daadaŋ.

²⁴Aŋun alimu Ekapolon, Akuj ŋina a ŋajoresyo ebe, “Okoe ŋituŋa kaŋ ŋulu iboiyete alo Sion, nyikuryaketa aŋuna a ŋituŋa ka Asiriya a ŋulu ikisicanito iyes, a ŋulu ikitiŋakinito iyes ŋibelae ikimanito lopite ŋolo ikimanitotor iyes Ŋijipitian;

²⁵anerae alotooma apaki ŋina euruwuana ajoŋoe ayoŋ aŋoikinit iyes ka eruwor ikes anyunyurikin ayoŋ omunya.

²⁶Ayoŋ Ekapolon ŋolo a ŋajoresyo adai ikes a adaset lopite ŋolo abunio odaiya ŋituŋa a Midian anataaba a Oreb; esicani ayoŋ ŋituŋa ŋulu eya nanamyo, lopite ŋolo abunio esicania ŋituŋa a Ijipit.

²⁷Akoloŋit ŋin, alemari ayoŋ ŋican ŋulu iryamunito iyes aneni a erwosit ka Asiriya, elemaryo ŋican aneni kus lopite ŋolo elemarere ayokot alomosiriŋ.” Itiyakin ŋun, anerae arotoki erwosit ka Asiriya alo Rimon,

²⁸alot Aias atubor alo Migiron, eŋadak ŋiboro keŋ Mikimas.

²⁹Atuborosi iŋes ka ŋasigarya keŋ alorot, aperiyosi Geba. Abul ŋituŋa ŋulu iboiyete alotaun Rama, aema ŋituŋa ŋulu eboiyete alo Gibea a ŋina a Saul.

³⁰Okoe iyes ŋituŋa a Galim kigworo! okoe iyes ŋituŋa a Laisa topupokisi! Okoe iyes ŋituŋa ka Anasos kitiro ŋun!

³¹Epumarosi ŋituŋa ŋulu iboiyete alo Madimena, aema ŋituŋa ŋulu iboiyete alo Gebim aŋuna ka aiun akiyar kec.

³²Akoloŋit napei na, ieŋunete ŋimoe alotaun Nob, iniŋiniŋokinete ŋakan kec aŋuna a ŋituŋa a ŋulu iboiyete alomukura Sion ka aŋuna a ŋituŋa a ŋulu iboiyete alo Yerusalem.

³³Kiirasi, ielielaari Ekapolon ŋolo a ŋajoresyo ŋasigarya ka Asiriya ka apedor keŋ a ŋina apolon nooi. Emunyari Ekapolon ŋikarikok a ŋasigarya ka Asiriya, ituruwori Ekapolon ŋulu eturok ŋulu itiditeuna bon.

³⁴Emunyari Ekapolon ikes lopite ŋolo eyepakinere kwap a aep amoni ŋina isijija, ilouni Ekapolon ŋolo etiron ŋituŋa a Lebanon.