Read ngakarimojong Isa. 11 Bible Online

Isa. 11 - ngakarimojong bible

Isa. 11

¹Ijojouni ateni aneni a Yese, elomuni ateni anataagor keŋ tora.

²Eyakaun etau ŋolo ke Ekapolon neni keŋ, eyakaun etau ŋolo ka aosou ka ayenut neni keŋ, eyakaun etau ŋolo esirworiunan ka ŋolo ka apedor neni keŋ, eyakaun etau ŋolo ka ayenut ka ŋolo ka akitopoloorit Akuj neni keŋ.

³Elelyani iŋes aŋuna ka akitopoloorit Ekapolon. Nyetubi iŋes ŋakiro aŋuna ite iŋes, kori aŋuna iirari iŋes.

⁴Nai etubi iŋes ŋakiro a ŋikulyak anakiyookino, etubi iŋes anakiyookino ŋakiro a ŋulu iyapara anakwap; isicani iŋes ŋituŋa a ŋakiro aŋuna elimuni iŋes, eari iŋes ŋulu aronok a ekieŋanu a ŋolo elomuni anakituk keŋ.

⁵Eruwor akiyookino arokoba keŋ, eruwor akikinyoma arokoba ŋina ka acir keŋ.

⁶Iboiyete epeot ka ikale ŋinimesek anakibois a apei, euryanete eŋatuny ka ikale ŋinimeot a iwapei erukete kaapei itaok, eŋatuny ka ŋibaren ŋulu itumitae, ido eruwor ikoku ŋini cici iyoki ikes.

⁷Edakasi aate ka ityaŋ ŋini adedeŋan apeikibois, euryanikin ŋitak kec kaapei, egeuni eŋatuny adaka ŋinya ikwa emoŋ.

⁸Ebolyae ikoku ŋini cici anakituk a akai a emun a ŋolo aaran a akisorit irepakini ikoku ŋini epetoritae akan keŋ kai a akipom.

⁹Alomoru kaŋ a ŋolo asegan, mam nyearasi kori nyewanasi ikes, anerae ilelebikin lotuŋa daadaŋ aosou ŋina ke Ekapolon, lopite ŋolo ilelebakatar ŋakipi nanam.

¹⁰Ebunit akoloŋit ŋina eyakaunor eletonit a Yese, eruwor iŋes akitoodikinet neni a ŋituŋa a ŋakwapin, epote ŋituŋa a ŋakwapin akiŋitanar iŋes ka eruwor akibois keŋ ŋina ecai nooi.

¹¹Akoloŋit ŋin, isitiyae nabo Ekapolon apedor keŋ kinyaku ŋipiya a ŋituŋa keŋ alo Asiriya, alo Ijipit, alo Pasiros, alo Esiopia, alo Elam, alo Sinar, alo Amas ka anakwapin a ŋuna idunyito anam.

¹²Eyauni Ekapolon akitoodikinet aŋuna a ŋituŋa a ŋakwapin, ecunakini iŋes ŋituŋa a Isirael ŋulu ielara, ecunakini iŋes ŋituŋa a Yudaya ŋulu eelar; ecununi iŋes ikes alowaetin a ŋuluomwon a akwap a daadaŋ.

¹³Edaun arakao a ŋituŋa a Epuraim aŋuna a ŋituŋa a Yudaya, nyerubakinete ŋituŋa a Yudaya eryanyanikinito ŋituŋa a Epuraim.

¹⁴Nai iuwuarosi ikes kwap lowae ŋolo alo To toremo Ŋipilistin, eŋatarete ikes kaapei ŋiboro a ŋituŋa a ŋulu alo Kide. Eremete ikes ka kilout ŋituŋa a Edom ka Moab, iwuapete ŋituŋa ka Amon ŋakiro kec

¹⁵Itooni Ekapolon ecileta ŋolo ka anam a Ijipit, iyakuuni Ekapolon ekuwuam ŋolo amwanan nooi kitoon aŋolol Eupurate, ido etyakatyakae iŋes aŋolol ŋin toruwor ŋayona ŋakanikaarei, iwuakini nen erot ŋolo epedorya ituŋanan atuboror elosi a ŋakejen.

¹⁶Aŋun eyakaun erot ŋolo apolon ŋolo ebunit alo Asiriya aŋuna a ŋipiya a ŋituŋa keŋ, lopite ŋolo abunio erot toyakaun aŋuna a Ŋisirael apaki ŋina aponiata ikes anakwap a Ijipit.