Read ngakarimojong Isa. 13 Bible Online

Isa. 13 - ngakarimojong bible

Isa. 13

¹Erae nu ŋakiro ŋuna abu Akuj kisileerek Isaya lokoku ka Amos aŋuna a ŋituŋa a Babilon.

²kikyaasi abendera ŋina ke ejie alokamukumukut a ŋolo emam ŋikito, tocelutu neni a ŋasigarya kus; kikyaasi ŋakan kus itoodiunito atemar tolomasi ikes alopukei a ŋikapolok.

³Adau ayoŋ akicik ŋasigarya kaŋ ŋunaseuna, adau ayoŋ anyaraun ŋikajiok kaŋ kisiyookis anyunyura kaŋ, ŋikajiok kaŋ ŋulu elelyanete aŋuna ka akiloun.

⁴Kiirasi ecelet ŋolo ebunit alomoru esibit ecelet a ŋituŋa a ŋulu alalak, kiirasi ecelet a ŋituŋa a ŋapukasinei ecelet a ŋakwapin aŋuna ecunasi nakibois apei! Esubanakini Ekapolon ŋolo a ŋajoresyo ŋasigarya aŋuna ke ejie.

⁵Eponito ikes anakwapin a ŋuna alwanak, anakisaleta a akwap, ebunit Ekapolon enyunyura eyakar ŋiboro ŋulujiet ka akinyasun akwap a Babilon daadaŋ.

⁶Kiwololoto, anerae aapuu akoloŋit ke Ekapolon, ebuni akoloŋit ŋin erae akoloŋit ŋina emunyarya Ekapolon akwap.

⁷Aŋun, epalagagunete ŋakan a ŋituŋa a daadaŋ, iyalaar ŋitai a ŋituŋa a daadaŋ

⁸ka ekadakini ikes. Eyakaun ikes napipilu ka naryeba, eryebakinosi ikes nooi ikwa aberu ŋina eapi akidoun. Itekinosi ikes make eumokinito, eyakaun ŋileec loreetin kec.

⁹Kiirasi, adolu akoloŋit ŋina ke Ekapolon, akoloŋit ŋina ka adedeŋu, ŋina ka anyunyura ka aŋoit ŋina amunyaran. Erae akoloŋit ŋin ŋina ituruworere akwap ŋina a silon ŋina emunyarere ŋikasecak anakwap.

¹⁰Akoloŋit ŋin, nyecaunete ŋitopon ka ŋikacer iryonuni akoloŋ apaki ŋina elomunia, nyecauni elap.

¹¹Irworo Ekapolon ebala, “Esicani ayoŋ akwap aŋuna ka asecit, esicani ŋulu aronok aŋuna a ŋasecisya kec etasaluni ayoŋ akituro ŋina a ŋikesupak ka eturuwori ayoŋ ŋiryenyaanotin ŋulu iapara.

¹²Etukudiouni ayoŋ ŋituŋa anakwap totyonior aryamun ikwa egolid ŋolo ajokan ka totyonior aryamun ikwa egolid ŋolo a Opir

¹³Aŋun, etamaranikini ayoŋ kidiama ka emaranikini akwap anakisyakinet keŋ aŋuna ka anyunyura a Ekapolon a ŋolo a ŋajoresyo itiyakin ŋun akoloŋit ŋina ka aŋoit keŋ a ŋina adedeŋan.

¹⁴Eemete ŋituŋa a Babilon daadaŋ lotuŋa kec, eemete daadaŋ nakwapin kec a ŋilopeyek, eemete ikes ekerete nooi lopite ŋolo eemya agete ŋina irisitae, kori ielarosi ikwa ŋamesekin ŋuna emam ituŋanan ecunakini.

¹⁵Ituŋanan daadaŋ ŋini eryamunio, irusokinio ka ŋini ikamunio daadaŋ earyo a ekileŋ.

¹⁶Enyilinyilaaryo ŋidwe kec ŋulu enakete iteete ikes, eŋataryo ŋiboro anakais kec ka ereikinio ŋaberu kec akiryamakin ka ŋikilyok ŋulu nyerae ŋulu kec.

¹⁷Kiirasi, ewuakini ayoŋ ekibure neni a Ŋimedes toremo Babilon, nyemisito Ŋimedes esilipa, nyiitanito ikes aryamun egolid.

¹⁸Earyo ŋisorok kec a ŋikaleŋeleŋe, nyisyoniyete ikes tari ŋiŋweya, nyisyoniyete ikes ŋidwe ŋulu cicik.

¹⁹Inyasunio Babilon akwap ŋina sek itopolooritae alotooma ŋakwapin, daadaŋ akwap ŋina ibus ka ŋina iturotor Ŋibabiloniyae. Ikwaanikin iŋes ka Sodoma ta Gomora apaki ŋina ekamarya Akuj ikes.

²⁰Mam ituŋanan iboikin nabo Babilon, kori eyakaun nabo nen tari ananyameta a daadaŋ. Nyedukokinete Ŋimarabui ŋiemae kec nen, nyimyekinete ŋikeyokok ŋamesekin kec euryanete a nen.

²¹Nai epote ŋityaŋ ŋulu ka ariet akiboi a nen, eruwor neni iboiyoto ŋitulae, elomete ŋikaleeso nen ka epote ŋamee ŋuna ka ariet abolya a nen.

²²Epote ŋibuin arwore anaduketa keŋ a ŋuna aoyak ka elomarete ŋikweei nakais kec ŋuna ka apukan, aapuu apaki ŋina inyasunere Babilon, adaun ŋirwa keŋ.”